Read Kurmanji Încîl, 2009 Zebûr 60 Bible Online

Zebûr 60 - Kurmanji Încîl, 2009 bible

Zebûr 60

¹Te em ji xwe avêtin, ey Xwedê te em şikandin, Tu hatî xezebê, me li halê me yê berê bizivirîne!

²Te erd hejand, te erd çirand; Qelşên wê bi hev ve bizeliqîne, erd diheje.

³Te tengahî bi gelê xwe da kişandin, Şeraba sermestkirinê bi me da vexwarin.

⁴Da ku riya rastiyê vebibe, Te al da yên ji te ditirsin.

⁵Da yên ku tu ji wan hez dikî, bibînin rizgariyê, Bi destê xwe yê rastê azad ke, me bibersivîne!

⁶Xwedê ji ciyê xwe yê pîroz got: «Ezê şa bim, Şexemê parve kim, Berriya Sukkotê bipîvim.

⁷Gilad, ya min e, Manasse jî ya min, Efrayim kumzirxê serê min, Cihûda gopalê padîşahiya min.

⁸Moav legana min a şûştinê, Edomê li ber lingê min e, Ezê bi serfirazî, bi ser Filîstê ve biqîrim.»

⁹Ma wê kî min bibe bajarê bi sûr? Wê kî rêberiya min bike heta Edomê?

¹⁰Ey Xwedê, ma te em ji xwe neavêtin? Ma êdî tu bi ordiyên me re naçî?

¹¹Li hember dijmin ji me re bibe alîkar, Çimkî pûç e alîkariya mirov.

¹²Em bi Xwedê mêrxasiyê dikin, Ew dipelçiqîne dijminên me.