Read Kurmanji Încîl, 2009 Zebûr 62 Bible Online

Zebûr 62 - Kurmanji Încîl, 2009 bible

Zebûr 62

¹Canê min, tenê bi aramî li benda Xwedê ye, Rizgariya min bi wî ye.

²Ew e zinar û rizgariya min, Birca min a bilind ew e, ez nahejim.

³Wek dîwarek xwarbûyî, wek sêncek ji ciyê xwe çûyî, Heta kîngê, hemû bi hev re, Ji bo pelçiqandinê, Hûnê êrîş bikin ser wî?

⁴Tenê ew, wî ji şerefa wî xistinê dişêwirin. Ji derew zewk distînin. Bi devê xwe xêr û dûa dikin, Di dilê xwe de nalet dikin.

⁵Ey canê min, tu tenê bi aramî Xwedê bipê, Çimkî hêviya min ew e.

⁶Zinar û hêviya min ew e, Birca min a bilind ew e, ez nahejim.

⁷Rizgarî û berziya min bi Xwedê ye, Zinarê hêza min, dera stara min Xwedê ye.

⁸Ey gelê min, hergav tu bi wî ewle be, Dilê xwe birêje ber wî, Çimkî Xwedê stargeha me ye.

⁹Zarokên xelqê tenê hilmek in, Beyzade jî derew, Gava ku ketin mêzînê, Herdû jî siviktir in ji hilmê.

¹⁰Pişta xwe nedin zordariyê, pesnê xwe nedin bi talanê, Serwet zêde bibe jî, dilê xwe pê ve girê nedin.

¹¹Xwedê carekê got, Min ev du car bihîst: Hêz ya Xwedê ye,

¹²Kerem jî ya te ye, ya Reb! Çimkî li gor karê wan, tu bergîdanê didî hemû kesan.