Read Kurmanji Încîl, 2009 Zebûr 72 Bible Online

Zebûr 72 - Kurmanji Încîl, 2009 bible

Zebûr 72

¹Ey Xwedê, tu dadperweriya xwe bide padîşah, Rastdariya xwe bide kurê padîşah.

²Bila gelê te bi rastdariyê, Belengazên te, bi dadperweriyê dadbar bike!

³Bila çiya, firehiyê ji gel re bînin, Bila gir jî, rastdariyê!

⁴Bila ew mafê bindestan bide, Zarokê belengazan xelas ke, Û zordaran bipelçiqîne!

⁵Heta ku roj û heyv hebin, Bila ew, nifş li pey nifşî ji te bitirsin.

⁶Wek barana ku li ser mêrga nûbirrî dibare, Bila ew, wek taviya ku axê av dide, bê!

⁷Bila di rojên wî de rastdarî kulîlkan bide, Aştî bi zêdebarî hebe, heta ku heyv biqede.

⁸Ji deryayê heta deryayê, Ji Firatê, heta kujê dinê yê din serwerî bajo!

⁹Gelê çolê li pêş wî here ser çokan, Dijminên wî axê bialêsin.

¹⁰Bila padîşahê Tarşîş û yê giravan, Jê re xeracê bînin, Padîşahên Seba û Seva diyariyan pêşkişî wî bikin!

¹¹Bila hemû padîşah li ber wî herin ser çokan, Hemû milet ji wî re evdîtî bikin!

¹²Ew diçe hawara hejaran, Ew rizgar dike feqir û bêkesan.

¹³Ew ber belengaz û ketiyan dikeve, Canê feqîran rizgar dike.

¹⁴Ew wan ji tada û zordariyê dide berdan, Di çavê wî de, bi rûmet e xwîna wan.

¹⁵Bila bijî! Û bila ji zêrê Seba bidinê; Hergav ji bo wî dua bikin, Û her roj wî pîroz bikin!

¹⁶Bila, li erdê, li serê çiyan, Bi zêdebarî genîm hebe! Bila simbil wek Lubnanê berdar bin, Gelê bajêr wek giya kulîlk bidin!

¹⁷Navê padîşah her û her bimîne, Heta ku roj hebe ew hebe, Bi destê wî mirov pîroz bibin, Hemû millet bêjin, «Xwezî bi wî!»

¹⁸Xudan Xwedê, Xwedayê Îsraêlê pîroz be, Yê ku karên nedîtî dike, tenê ew e.

¹⁹Navê wî yê berz, her û her pîroz be, Tevahiya erdê bi berziya wî tije be! Amîn! Amîn!

²⁰Duayên Dawidê kurê Îşay li vir diqedin.