Read Kurmanji Încîl, 2009 Zebûr 73 Bible Online

Zebûr 73 - Kurmanji Încîl, 2009 bible

Zebûr 73

¹Bi rastî jî, Xwedê ji Îsraêlê re, Ji dilpaqijan re qenc e.

²Belê lingên min, li ber terpilînê bûn, Gavên min li ber şemitînê.

³Çimkî min, gava firehiya xeraban dît, Ez ji qûreyan hesidîm.

⁴Di mirina wan de êş nîne, Bedenên wan dermalekirî ne.

⁵Ew bi derdê kesî nizanin, Wek mirov belayê nakşînin.

⁶Loma quretî wek gerdenzêra wan e, Zordarî kincê nixamtina wan e.

⁷Ji qelewî çavê wan dike bifetiqe, Xerabî ji hundirê wan difûre.

⁸Bi mirovan tinazên xwe dikin, Ji xedarî bi xerabiyê re dipeyivin, ji jor ve diaxivin.

⁹Devê xwe li hember ezman vedikin, Zimanê wan li erdê digere.

¹⁰Loma xelq li wan dizivire, Dev li hewa mayî, peyvên wan gohdarî dike.

¹¹Dibêjin ku, «Ma Xwedê çawa dizane? Ma Yê Berz bi çi dizane?»

¹²Binêr, weha ne, yên xerab, Hergav rihet in, serweta xwe zêde dikin.

¹³Ya rast, min dilê xwe beredayî paqij kiriye, Bi bêsûcî destê xwe şûştiye.

¹⁴Çimkî her roj bela hatin serê min, Her sibeh min ezab kişand.

¹⁵Eger min bigota, «Ez jî wek wan bipeyivim,» Hingê min bi zarokên te re xayintî kiribû.

¹⁶Ez fikirîm, ka ez çawa aqil dibim vê yekê, Û ev li ber çavê min zor hat,

¹⁷Dema ez ketim perestgeha Xwedê; Hingê min fêm kir encama xeraban,

¹⁸Ya rast, tê wan deynî derên şemitok, Û wan kaşkî xerabûnê.

¹⁹Çawa di hilmekê de xera bûn, Bi tirs û sawê, bi tevahî çûn!

²⁰Ji bo yekî ku ji xewê hişyar dibe, xewn çi be, Çaxê tu jî hişyar bî, Ya Reb, Tê kêm bibînî, dîdara wan.

²¹Çimkî dilê min êşiya, Hundirê min tahl bû.

²²Heçî ez im, bêaqil û nezan, Li pêşberî te ez bûm mîna heywan.

²³Belê ez hergav bi te re me, Te bi destê min ê rastê girt.

²⁴Bi şîreta xwe rê nîşanî min didî, Dû re min digihînî berziya xwe.

²⁵Li ezmanan kiyî min heye? Xên ji te, ez kesî din naxwazim li ser rûyê erdê.

²⁶Bedena min û dilê min dihele, Belê hêza dilê min, Û para min hergav Xwedê ye.

²⁷Çimkî, va ye yên ji te dûr in tune dibin, Tê, hemû yên ku ji te diqetîn û ne dilsoz in, tune bikî.

²⁸Belê nêzikbûna Xwedê ji bo min qenc e; Ji bo ku ez hemû karên te bidim bihîstin Min Reb Xudan ji xwe re kir star.