Read Kurmanji Încîl, 2009 Zebûr 74 Bible Online

Zebûr 74 - Kurmanji Încîl, 2009 bible

Zebûr 74

¹Ey Xwedê, ji bo çi te em her û her berdan? Çima hêrsa te, li hember miyên mêrga te pêt dide?

²Koma ku te ji berê ve kiribû ya xwe, Ji bo ku ji te re mîras bimîne, rizgar ke, Û Çiyayê Sîyonê yê ku tu lê rûniştî yî, bibîr bîne.

³Ber bi xirbên mayindar ve bimeşe, Dijmin li dera pîroz her tişt xera kir.

⁴Dijminên te, li ciyê civata te kirin gurmîn, Ji bo ku bibe nîşan, wan ala xwe li wê derê çikand.

⁵Wek ku bi biviran, Têkevin dereke daristan.

⁶Û hemû nexşên wê, Şikandin bi gerane û biviran.

⁷Agir berdan perestgeha te, Warê navê te, Kirin erdê û murdar kirin.

⁸Di dilê xwe de gotin, «Em hemûyî bipelçiqînin!» Li welat hemû derên civata Xwedê hilweşandin.

⁹Hemû alên me çûne, Êdî pêxember jî tunin, Di nav me de kes nizane, ka heta çi wextê.

¹⁰Ey Xwedê, wê heta kîngê dijmin tinazên xwe bi te bike, Ma wê her û her dijmin çêrî navê te bike?

¹¹Çima tu destê xwe yê rastê şûn ve dikişînî? Çima tu dest hilnaynî!

¹²Belê Xwedê, ji demên berê ve padîşahê min e, Li rûyê erdê rizgarî bi wî ye.

¹³Te bi hêza xwe deryayê kir du şeq, Serê cinawirên deryayê di nav avê de şikand.

¹⁴Te serên Levîethan şikand, Te ew kir qutê yên ku li çolê dijîn.

¹⁵Te kanî û lehiyan rakir, Çemên ku hergav diherikin ziwa kir.

¹⁶Roj ya te ye, şev jî ya te, Roj û ronahî te amade kir.

¹⁷Hemû sînorên ser erdê te danîn, Havîn û zivistan, te afirand.

¹⁸Bibîr bîne ya Xudan, dijmin tinaz bi te kir, Miletekî bêaqil tinaz bi navê te kir.

¹⁹Nespêre cinawiran, canê kevoka xwe, Tu car ji bîr neke, rewşa belengazên xwe.

²⁰Tu bala xwe bide peymanê, Çimkî derên tarî yên diyar, Ji bo zordaran bûye cih û war.

²¹Bila yê neçar, şûn ve nezivire stûxwar, Bila bindest û hejar, ji bo navê te bibin pesindar.

²²Rabe ey Xwedê, doza xwe bibîne! Tinazên, yê ku bêaqil tevahiya rojê bi te dike, bibîr bîne!

²³Dengê dijminên xwe ji bîr neke, Hergav bilind dibe, welwela yên ku li ber te rabûne!