Read Kurmanji Încîl, 2009 Zebûr 77 Bible Online

Zebûr 77 - Kurmanji Încîl, 2009 bible

Zebûr 77

¹Dengê min li Xwedê ye, ez dikim feryad, Dengê min li Xwedê ye, da ku goh bide min.

²Di roja teng de ez li Reb digerim, Ez bi şev destê xwe vedikim, Canê min teseliyê naxwaze.

³Ez Xwedê bibîr tînim û dinalim, Ez difikirim û ruhê min dixeriqe.

⁴Tu bi qelpaxên çavê min digirî, Dilê min teng dibe, ez nikarim bêjim.

⁵Rojên çûyî, Ez salên dewrên çûyî fikirîm.

⁶Bi şev, ez bi dil stranên xwe bibîr tînim, Ez, ji xwe bi xwe re dibêjim, Ruhê min ji dûrî û kûrî ve dipirse:

⁷«Gelo wê Reb me her û her berde? Ma wê cardin qenciyê bi min neke?

⁸Ma kerema wî her û her qediya? Ma sozên ku wî dabûn her û her betal bûn?

⁹Gelo Xwedê, ji bîr kir berketinê? Ciyê dilovaniyê, stand hêrsê?»

¹⁰Min got, «Ya ku min dêşîne ev e! Destê Yê Berz ê rastê, ne wek berê ye.»

¹¹Ez li karên Xudan digerim, Herîqayên wî yên kevin bibîr tînim.

¹²Ez kûr li ser her karên te difikirim, Li ser kirinên te ji xwe derim.

¹³Ey Xwedê, riya te di pîroziyê de ye! Kîjan îlah wek Xwedê gewre ye?

¹⁴Xwedayê ku herîqeyan dike tu yî, Li nav gelan, te hêza xwe da nîşandan.

¹⁵Te bi zendê xwe gelê xwe, Kurên Aqûb û Ûsîv rizgar kir.

¹⁶Avan tu dîtî, ey Xwedê! Avan tu dîtî û tirsiyan, Kûrahî lerziyan.

¹⁷Ewran ava xwe vala kir, Asûman deng da, Tîrên te firiyan.

¹⁸Di babelîskê de gurmîna te hat bihîstin, Brûskê dinyayê ronahî kir, Erd lerizî û hejiya.

¹⁹Riya te di deryayê de, Riyên te di avên mezin de bûn, Belê ne kifş bûn rêçên te.

²⁰Te bi destê Mûsa û Harûn Gelê xwe wek keriyekî ajot.