Read Kurmanji Încîl, 2009 Zebûr 88 Bible Online

Zebûr 88 - Kurmanji Încîl, 2009 bible

Zebûr 88

¹Ya Xudan, Xwedayê rizgariya min, Şeveroj, ez li ber te dikim hawar.

²Bila dua min bigihîje te, Tu goh bide hawara min.

³Çimkî ez ji tengahiyan têr bûm, Û jiyana min nêzikî diyarê miriyan bû.

⁴Ez bi yên di çala mirinê de têm jimartin, Wek zilamê bê alîkar im.

⁵Wek yê ku hatiye avêtin nav miriyan, Wek kuştiyê li gorê vezelandî, Wek wan ên ku êdî tu bibîr naynî, Wek wan ên ku ji destê te hatin birrîn.

⁶Te ez kirim çala herî kûr, Te ez avêtim tarî û kûrahiyan.

⁷Xezeba te bi ser min de hat, Û te bi hemû pêlan ez pelçiqandim.

⁸Te nasên min ji min dûr kir, Min li pêş wan mekrûh kir. Derî li ser min hat radan, da ku ez nerevim.

⁹Ji berketinê çavê min ditemirin, Her roj min bangî te kir, ya Xudan, Min destên xwe li ber te vekir.

¹⁰Ma tê nuwazeyên xwe nîşanî miriyan bidî? Ma wê siya miriyan rabe û pesnê te bide?

¹¹Ma kerema te li gorê, Dilsoziya te li diyarê helaqê tê bihîstin?

¹²Ma harîqayên te di tariyê de, Qenciya te li diyarê jibîrkirinê tê zanîn?

¹³Belê min ya Xudan, min li te kir hawar, Û dua min a serê sibê digihîje tê.

¹⁴Tu çima min ji xwe davêjî, ya Xudan, Tu çima rûyê xwe ji min vedişêrî?

¹⁵Ez ketime, ji ciwaniya xwe ve li ber mirinê me, Min sawa te kişand, ez şaş mam.

¹⁶Xezeba te bi şid di ser min re derbas bû, Tirsa te ez qedandim.

¹⁷Tevahiya rojê wek avê dor li min pêçan, Û hemûyan bi hev re ez rapêçam.

¹⁸Te dost û hevalan ji min dûr kir, Nasên min jî di tariyê de ne.