Read Kurmanji Încîl, 2009 Zebûr 9 Bible Online

Zebûr 9 - Kurmanji Încîl, 2009 bible

Zebûr 9

¹Ya Xudan ezê bi hemû dilê xwe ji te re şikir bêjim, Hemû karên te yên mezin bibêjim.

²Ezê bi te dilgeşiyê bibînim, bikim kêfan. Bi îlahiyan bidim pesnê te, ey Berzê Berzan!

³Gava ku dijminên min bi şûn de vedigerin, Li pêş te diterpilin, dimirin û derin.

⁴Çimkî doza min, heqê min te parast, Li text rûniştî da biryara rast.

⁵Te li miletan hilat, xeraban tune kir, Her û her navê wan jê bir.

⁶Dijmin neman, her û her xerab in, Te ji binî hilweşand bajarên wan, Êdî qet nayê gotin ji navê wan.

⁷Belê Xudan her û her rûniştiye, Bi hukum textê xwe ava kiriye.

⁸Bi edalet dinyayê ew digerîne, Bi rastî hukmê xwe li ser miletan datîne.

⁹Ji bo bindestan Xudan stargeh e, Di rojên teng de keleh e.

¹⁰Yên bi te dizanin ji te ewle ne, Çimkî yên ku berê xwe dan te, te neterikand ya Xudan.

¹¹Bi lavijan pesnê Xudanê li Siyonê rûniştî bidin! Bila bi we kirinên wî li nav miletan eşkere bibin.

¹²Çimkî, yê bi pey xwîna rêtî dikeve wê bibîr tîne, Feryada bindestan ji bîr dernayne.

¹³Li min were rehmê ya Xudan, Yê ku min radike ji derê mirinan. Bibîne, ez çi ji destê yên ku ji min nefret dikin dikişînim!

¹⁴Wusa ku, hemû pesnên te bêjim, Li deriyên bajarê keça Siyonê, Bi xelaskirina te dilgeş im.

¹⁵Milet ketin çala ku kolan, Lingên wan ket tora ku veşartin.

¹⁶Hukmê xwe ajot, Xudan xwe da nasîn, Zilamê xerab, bi karê destê xwe bû hefsîn. Hîgayon.

¹⁷Xerab wê herin diyarê miriyan, Miletên Xwedê jibîr kirine her eynî riyan.

¹⁸Çimkî wê feqîr herdem neyê jibîrkirin, Hêviya bindestan her û her neyê xîşkirin.

¹⁹Rabe ya Xudan, bila zorbir nebe însan, Li pêş te be, hukumkirina miletan!

²⁰Tu wan bibizdîne, ya Xudan! Bila bizanibin ku ew, ne tu tişt in, tenê însan.