Read Kurmanji Încîl, 2009 Zebûr 90 Bible Online

Zebûr 90 - Kurmanji Încîl, 2009 bible

Zebûr 90

¹Ya Reb, tu ji me re star bûyî, Hemû deman.

²Hê beriya ku çiya çêbin, Hê beriya ku tu erdê û dinyayê biafirînî, Ji bêdestpêkî heta bêdawîtiyê, tu Xwedê yî.

³Tu mirov dizivirînî axê, Tu dibêjî, «Ey kurê mirov, bizivirin axê!»

⁴Çimkî di çavê te de hezar sal, Wek do, derbas bûye. Wek nobeta şevê ye.

⁵Tu wan dimalî û dibî, ew wek xewnewkê ne, Ew wek giyayê serê sibê ne;

⁶Serê sibê kulîlk dide û mezin dibe, Êvarê diçilmise û ziwa dibe.

⁷Em bi hêrsa te telef dibin, Û bi xezeba te şeperze dibin.

⁸Te sûcên me danîn ber xwe, Te gunehên me yên bi dizî danî ber roniya rûyê xwe.

⁹Hemû rojên me, bi xezeba te diborin, Em wek hilmekê, diqedînin salên xwe.

¹⁰Rojên jiyana me heftê sal in, Em bi sihet bin, belkî heştê sal; Salên herî xweş, bi zehmet û bi keder, Zûka derbas dibin û em jî, difirin û diçin.

¹¹Kî bi hêza xezeba te dizane? Çimkî xezeba te, bi qasî tirsa ji te ye.

¹²Loma tu, jimartina rojên me hînî me ke, Da ku em dilekî şehreza bistînin.

¹³Jêgere ya Xudan! Ma wê heta kîngê hêrsa te bajo? Li xizmetkarên xwe were rehmê!

¹⁴Serê sibê me bi kerema xwe têr bike, Da ku em di hemû rojên xwe de şa û dilgeş bin.

¹⁵Bi qasî rojên ku te em kirin tengahiyê, Li gor salên ku em di belayê de bûne, Tu ewqasî me şa bike.

¹⁶Bila karê te ji xizmetkarên te re, Rewnaqiya te li ser zarokên wan were dîtin.

¹⁷Bila qenciya Xwedê, Rebê me li ser me be. Keda destê me, ji bo me berdar bike. Erê, keda destê me berdar bike.