Read Kurmanji Încîl, 2009 Mamosteyê Şehrezayiyê 1 Bible Online

Mamosteyê Şehrezayiyê 1 - Kurmanji Încîl, 2009 bible

Mamosteyê Şehrezayiyê 1

¹Gotinên Şehreza, kurê Dawid, padîşahê Orşelîmê

²Şehreza dibêje: «Çiqas pûç û vala ye; her tişt pûç e.»

³Ma çi kara mirov heye, Ji hemû keda ku li ser rûyê erdê dide?

⁴Nifşek diçe û nifşek tê, Lê dinya her wek xwe dimîne.

⁵Roj dertê û roj diçe ava, Dîsa baz dide dera ku jê hilatiye.

⁶Ba bi başûr ve diçe, li bakur dizivire, Li hev dizivire û diçe Û her li cihê xwe dizivire.

⁷Hemû çem diherikin deryayê, Lê derya tije nabe Û av dizivire dera ku jê diherike.

⁸Her tişt bi westanê tije ye, Bi qasî ku nayê salixdan. Çav bi dîtinê têr nabe, Guh bi bihîstinê tije nabe.

⁹Berê çi bûbe, wê cardin ew bibe, Çi hatibe kirin, wê ew bê kirin, Li ser rûyê erdê tiştekî nû tune.

¹⁰Ma kesekî dikare bêje: «Binêre ev nû ye!»? Ji berê ve, ji sal û demên berê ve çêbûye.

¹¹Çawa nifşên ku berê jiyanê, nayên bibîranîn, Nifşên ku pêşerojê bijîn jî, Ji aliyê nifşên piştî wan ve, wê neyên bibîranîn.

¹²Ez Şehreza, li Orşelîmê li ser Îsraîlê padîşah bûm.

¹³Min dilê xwe, ji bo ku bi şehrezayiyê li her tiştê ku li dinyayê pêk tên bixebite û bikole veqetand. Ev karekî zehmet e. Xwedê ev da mirov ku pê re bilî bibe.

¹⁴Min hemû karên ku li ser rûyê erdê tên kirin dîtin û hemû jî pûç in, wek ketina pey bayê ne.

¹⁵Ya xwar nayê rastkirin, ya kêm nayê temamkirin.

¹⁶ [1†] Min ji xwe re got: «Min şehrezayiya xwe, ji hemû yên ku beriya min li ser Orşelîmê padîşahî kirine gelekî zêdetir kir. Dilê min têra xwe zanîn û şehrezayî dît.»

¹⁷Min dilê xwe da zanîna şehrezayiyê û ez ji bo dînîtî û bêaqiliyê xebitîm. Belê min fêm kir ku ev jî wek ketina pey bayê ye.

¹⁸Çimkî di şehrezayiya zêde de kedera zêde heye û yê ku zanîna xwe zêde dike, derdê xwe bêtir dike.