Read Kurmanji Încîl, 2009 Mamosteyê Şehrezayiyê 12 Bible Online

Mamosteyê Şehrezayiyê 12 - Kurmanji Încîl, 2009 bible

Mamosteyê Şehrezayiyê 12

¹Hê ku rojên xerab nehatine, Û salên ku tê bêjî: «Ez ji wan zewqê nastînim» nêzîk nebûne,

²Hê ku roj û ronahî, heyv û stêr li te tarî nebûne, Hê ku ewr piştî baranê bi şûn de nehatine, Di rojên xortaniya xwe de, tu Afirandar bibîr bîne.

³Wê rojê, wê nobedarên malê bilerizin, Wê yên mêrxas bitewin, Kesên dihêrin, wê xuya nebin, Û yên ku di şivakê de dinêrin, wê nebînin.

⁴Gava ku dengê aş nerm bû, Wê deriyên kuçê bên girtin, Wê mirov bi dengê çivîkan hişyar bin [16], Lê wê dengê keçên stranan nizim bibin.

⁵Wê mirov ji dera bilind Û ji dehşeta li kuçê bitirsin. Wê dara behîvê kulîlkên spî bide, Kulî giran bibin û nepengizin, Wê azwerî qels bibin [17], Çimkî wê mirov herin mala xwe ya herheyî, Kesên ku şînê dikin wê kûçeyan dagirin.

⁶Hê ku têla zîvîn nequrifiye, Hê ku tasa zêrîn neşikestiye, Hê ku cêr li ser kaniyê perçe nebûye, Û destika ava bîrê neşikestiye,

⁷Hê ku ax neziviriye erdê Û ruh neziviriye ba Xwedayê ku ew daye, Tu Afirandar bibîr bîne.

⁸Şehreza dibêje: «Çiqas pûç û vala ye; her tişt pûç e.»

⁹Mamoste şehreza bû û wî ya ku dizanibû hînî gel dikir. Wî guh da, lê kola û gelek mesele kirin rêz û pergalê.

¹⁰Şehreza li peyvên xweş geriya û bi awayeke rast û tekûz nivîsîn.

¹¹Gotinên kesên şehreza wek zixtê ne, gotinên pêşiyan wek bizmarên lêxistî ne. Ji aliyê Xwedayê Şivanê her kesî ve hatine dayîn.

¹²Ji bilî van tiştan, ey kurê min, hay ji xwe hebe. Gelek kitêb hatin nivîsandin, dawiya vê tuneye. Xwendina zêde bedenê diwestîne.

¹³Her tişt hat bihîstin, encam ev e: Ji Xwedê bitirse û emrên wî bigire, Wezîfeya hemû mirovan ev e.

¹⁴Çimkî Xwedê wê her tiştî, Baş yan jî xerab, Her karê dizî dadbar bike.