Read Kurmanji Încîl, 2009 Mamosteyê Şehrezayiyê 3 Bible Online

Mamosteyê Şehrezayiyê 3 - Kurmanji Încîl, 2009 bible

Mamosteyê Şehrezayiyê 3

¹Dema her tiştî heye, Di bin ezmanan de, dema her kirinê heye.

²Dema bûyînê û dema mirinê heye. Dema çandinê û dema rakirina yê çandî heye.

³Dema kuştinê û dema saxkirinê heye, Dema xerakirinê û dema avakirinê heye.

⁴Dema girînê û dema kenînê heye, Dema şînê û dema şahiyê heye.

⁵Dema avêtina keviran û dema civandina keviran heye, Dema hembêzkirinê û dema hembêznekirinê heye.

⁶Dema lêgerînê û dema windakirinê heye, Dema hilanînê û dema avêtinê heye.

⁷Dema çirandinê û dema dirûtinê heye, Dema hişbûnê û dema peyivînê heye.

⁸Dema hezkirinê û dema nefretkirinê heye, Dema şer û dema aştiyê heye.

⁹Ma çi kara xebatkar di ber keda ku daye de heye?

¹⁰Min zehmetiya ku Xwedê di ber kirina kar de da mirovan dît.

¹¹Wî her tişt di dema wî de xweş çêkir. Wî herheyîtî kir dilê mirovan. Dîsa jî mirov, karê ku Xwedê dike ji serî heta binî fêm nake.

¹²Ez dizanim ku ji bo mirov, di hemû dema ku dijî de, ji şabûn û kêfkirinê çêtir tiştek tune.

¹³Xwarin û vexwarina her mirovî û ji tevahiya keda xwe qencî dîtin, diyariya Xwedê ye.

¹⁴Ez dizanim, her tiştê ku Xwedê dike, wê her û her bimîne. Tu tişt nikare lê bê zêdekirin û ne jî tiştek dikare jê bê kêmkirin. Ji bo ku jê bitirsin Xwedê wisa çêkir.

¹⁵Ya ku heye ji berê ve ye û ya ku wê çêbibe ji berê ve çêbûye. Xwedê hesabê tiştên derbasbûyî dike.

¹⁶Min li ser rûyê erdê ev jî dît: Di şûna dadperweriyê de xerabî heye, Di cihê edaletê de xerabî heye.

¹⁷Min di dilê xwe de got: «Xwedê wê yê rast û yê xerab jî bidarizîne, Çimkî li ba wî ji bo her tiştî û her karî demek heye.»

¹⁸Min di dilê xwe de li ser mirovan got: «Xwedê wan diceribîne, da ku bibînin ew tenê heywan in.»

¹⁹Çimkî ya ku tê serê mirovan, tê serê heywanan jî. Tiştê ku tê serê wan yek e. Mirov çawa dimirin, heywan jî wisa dimirin. Hilma herduyan eynî ye. Mirov ne di ser heywan re ye, çimkî her tişt pûç e.

²⁰Hemû diçin derekê, hemû ji axê ne û hemû cardin vedigerin axê.

²¹Ma kî dizane ku piştî mirinê mirov dertên jor û heywan dadikevin jêr?

²²Îcar min dît, ji şabûna mirov a bi karê xwe çêtir tiştek tune. Çimkî para mirov ev e. Ma kî wê wî bi şûn de bîne, da tiştên ku piştî wî çêbûne bibîne?