Read Kurmanji Încîl, 2009 Mamosteyê Şehrezayiyê 4 Bible Online

Mamosteyê Şehrezayiyê 4 - Kurmanji Încîl, 2009 bible

Mamosteyê Şehrezayiyê 4

¹Îcar ez zivirîm û min hemû zilm û zordariyên ku li ser rûyê erdê tên kirin dîtin. Va ye hêsirên bindestan, Kesê ku di ber dilê wan dide tune. Hêz li aliyê zordaran e, Kesê ku li ber dilê wan dide tune.

²Min ji zindiyan bêtir, Xweziya xwe bi miriyan anî Û mirî ji zindiyan bextewartir dîtin.

³Lê yê ku hê nehatiye dinyayê Û karên xerab ên ku li ser rûyê erdê tên kirin nedîtiye, Ji herduyan dilgeştir e.

⁴Min dît ku di bingeha her ked û serketinê de hesûdî heye. Ev jî pûç e û wek ketina pey bayê ye.

⁵Rast e, yê bêaqil destê xwe nalebitîne Û mala xwe xera dike.

⁶Çenga tije ya bi rihetî, Ji kulma tije ya bi zehmetî Û ketina pey bayê çêtir e.

⁷Ez zivirîm û min li ser rûyê erdê tiştekî din ê pûç dît.

⁸Zilamek tenê hebû, kesek din li ba wî nebû. Kurê wî û birayê wî jî tunebû, Dîsa jî bi şev û bi roj dixebitî, Û çavên wî têr nedibûn. Ma gelo wî ji xwe re nedigot: «Ez ji bo kê bixebitim Û canê xwe ji şahiyê bêpar bihêlim?» Ev jî pûç û tiştekî xerab e.

⁹Du kes ji kesekî çêtir in, Çimkî destmiza keda wan hê çêtir e.

¹⁰Gava ku bikevin, wê yek yê din rake; Lê wey li wî ku bi tenê ye û dikeve Û kesê ku wî rake tune.

¹¹Herwiha gava ku dido bi hev re razin, wê hev germ bikin, Lê zilamê ku tenê radize, wê çawa germ bibe?

¹²Yek bi yekî dikare, Lê bi du kesan nikare. Tayê sêqat jî bi rihetî naqete.

¹³Xortê feqîr û şehreza, ji padîşahê bêaqil û kalbûyî yê ku êdî naşêwire çêtir e.

¹⁴Dibe ku ew xort li welatê xwe bi feqîrî hatibe dinê û ji girtîgehê derketibe jî dikare bibe padîşah.

¹⁵Lê min dît gava ku ew bû padîşah jî, gel bi pey xortekî din ket, ku ewê bikeve cihê wî.

¹⁶Her kes bi pey wî ket; lê piştî demekê ji padîşahtiya wî jî razî neman. Bi rastî ev jî pûç e û wek ketina pey bayê ye.