Read Kurmanji Încîl, 2009 Mamosteyê Şehrezayiyê 5 Bible Online

Mamosteyê Şehrezayiyê 5 - Kurmanji Încîl, 2009 bible

Mamosteyê Şehrezayiyê 5

¹Dema ku tu diçî mala Xwedê, hay ji gavên xwe hebe. Çêtir e ku tu ji bo guhdarîkirinê nêzîk bibî, ne ku tu qurbana bêaqilan pêşkêş bikî. Çimkî ew nizanin ku xerabiyê dikin.

²Bi devê xwe nelezîne, Ne jî bila dilê te li pêşberî Xwedê ji peyivînê re bilezîne. Çimkî Xwedê li ezmanan e, lê tu li erdê yî, Loma bila gotinên te hindik bin.

³Xema zêde dibe xewn, Gotina zêde jî bêaqiliyê tîne.

⁴ [9†] Gava ku tu sondekî didî Xwedê, bi derengî nekeve. Çimkî bêaqil ne bi dilê wî ne. Ya ku te soz daye bike.

⁵Di şûna ku tê nedir bikî û nedî, soz nede çêtir e.

⁶Rê nede devê xwe ku bi bedena te guneh bide kirin. Li pêş kahîn [10] nebêje: «Min şaşîtî kir.» Ewê çima bi gotina devê te hêrs bibe û karên destê te xera bike?

⁷Rast e ku xewneroj, pûçîtî û peyv pir in, lê tu ji Xwedê bitirse.

⁸Heger te dît li welatekî zilm li feqîran tê kirin, edalet û rastî tê binpêkirin, tu li vê yekê şaş nemîne. Çimkî di ser yê bilind de bilindtir heye û di ser wan de jî hê bilindtir hene.

⁹Feyda ku ji axê tê ji bo her kesî ye. Heger ji bo dabeşkirina berê axê padîşahekî dadperwer hebe, çêtir e. Padîşahê ku dixwaze erd û zevî werin cotkirin ji hemû welat re bi feyde ye.

¹⁰Kesê ku ji pere hez dike, ji pere têr nabe; Yê ku ji serwetê hez dike, qîma xwe bi qezenca xwe nayne. Ev jî pûç e.

¹¹Gava ku mal zêde dibe, yên ku jê dixwin jî zêde dibin; Xên ji mêzekirinê, çi feyda wî ji xwediyê wî re heye?

¹²Dixwazî hindik, dixwazî bila zêde bixwe, Xewa kesê ku dixebite şîrîn e. Lê belê zêdebûna malê yê dewlemend nahêle ku raze.

¹³Min li ser rûyê erdê belayeke xerab dît: Dewlemendiya ku ji xwediyê xwe re bêxêr e tê civandin.

¹⁴Ev dewlemendî bi rastneçûna kar tune dibe, Xwediyê wê bav be jî, Ji kurê xwe re tiştekî nahêle.

¹⁵ [11†] Mirov çawa ji malzaroka diya xwe derkeve, Wek ku hatiye, wê tazî here. Wê ji keda xwe tu tiştekî, Di destê xwe de bi xwe re nebe.

¹⁶Îcar çawa hatibe wê wisa here. Newxe ev jî belayeke xerab e, Ma çi kara mirov, Di keda ku di ber bayê de tê dayîn heye?

¹⁷Di hemû rojên xwe de di tariyê de dixwe, Gelek aciz dibe, hêrs dibe û nexweşîna wî heye.

¹⁸Îcar min dît ya baş ev e: Mirov bixwe û vexwe û li vê dinyayê, di rojên Xwedê de, ji bo keda ku daye şa bibe. Çimkî para mirov ev e.

¹⁹Heger Xwedê mal û dewlemendiyê bide yekî û bike ku ew bikare jê bixwe, para xwe jê bistîne û bi keda xwe şa bibe, ev diyariya Xwedê ye.

²⁰Îcar mirov li ser rojên jiyana xwe pir nafikire, ji ber ku Xwedê dilê mirov bi şahiyê mijûl dike.