Read Kurmanji Încîl, 2009 Mamosteyê Şehrezayiyê 7 Bible Online

Mamosteyê Şehrezayiyê 7 - Kurmanji Încîl, 2009 bible

Mamosteyê Şehrezayiyê 7

¹ [12†] Navê baş ji rûnê bêhnxweş, Roja mirinê ji roja bûyînê çêtir e.

²Çûna mala şînê ji çûna mala ziyafetê çêtir e, Çimkî dawiya her mirovî ev e, Bila her kes vê yekê bixe dilê xwe.

³Keder ji kenînê çêtir e, Çimkî xemgînî mirov tekûz dike.

⁴Dilê kesê şehreza li mala şînê ye, Lê dilê bêaqilan li mala şahiyê ye.

⁵Erzşikandina kesên şehreza, Ji pesindana bêaqilan çêtir e.

⁶Qirçîna hejikan di bin beroşê de çawa be, Kenê bêaqilan jî wisa ye. Ev jî pûç e.

⁷Qezenca neheq, zilamê şehreza bêaqil dike, Û bertîl dil xera dike.

⁸Dawiya tiştekî ji destpêka wî çêtir e; Kesê bêhnfireh, ji kesê pozbilind çêtir e.

⁹ [13†] Tu zû nexeyide, Çimkî xeyd di dilê bêaqilan de distire.

¹⁰Nepirse: «Çima rojên berê ji yên niha çêtir bûn?» Çimkî ev pirs ne bi şehrezayî ye.

¹¹Şehrezayî bi qasî mîrasê baş e Û bi kêrî yên ku tavê dibînin tê.

¹²Şehrezayî sitar e, pere jî sitar e; Lê feyda zanabûnê ev e ku Şehrezayî jiyana xwediyê xwe diparêze.

¹³Tu li karê Xwedê binêre, Ya ku wî xwar kiriye, kî dikare rast bike?

¹⁴Di roja firehiyê de şa be, Lê di roja tengahiyê de bifikire ku Herdu roj jî ji Xwedê ne. Mirov pê nizane, Ka wê di pêşerojê çi bibe.

¹⁵Min di jiyana xwe ya pûç de ev herdu tişt dîtin: Carna zilamê rast heye, tevî rastiya xwe zû helak dibe, Carna jî zilamê xerab heye, tevî xerabiya xwe dirêj dijî.

¹⁶Îcar bi têra xwe rast û şehreza be, lê ne zêdetir. Ma ji bo çi tu xwe helak dikî?

¹⁷Ne zêde xerab be, ne jî bêaqil. Ji bo çi tê bê wext bimirî?

¹⁸Çêtir e ku tu yekê bigirî Û ji yê din jî destê xwe neşoyî, Çimkî wê mirovê xwedêtirs ya rast bibîne.

¹⁹Şehrezayî, zilamê şehreza Ji deh desthilatdarên ku li bajêr in hêzdartir dike.

²⁰Li ser rûyê erdê kesekî rast tune ku qencî kiribe Û tu caran guneh nekiribe.

²¹Guh nede her tiştê ku xelk dibêje, An na, tê çêrên xulamê xwe bibihîzî.

²²Tu bi xwe jî dizanî ku te jî, Gelek caran çêrî kesên din kirine.

²³Min ev hemû bi şehrezayî ceribandin: Min got: «Ezê bibim şehreza», Lê belê ew ji min zêde bû.

²⁴Şehrezayî gelek dûr û pir kûr e, Ma kî dikare wê bibîne?

²⁵Ez bi dilê xwe li şehrezayiyê digeriyam, Min lê kola ku ez sedemên li pişt tiştan bibînim. Ez geriyam ku fêm bikim xerabî bêaqilî ye, Ehmeqî jî dînîtî ye.

²⁶Tiştên ku min dît ev in: Jina xerab ji mirinê tehltir e; Ew jin ku dilê wê dafik, Destên wê zincîr in. Zilamê ku bi dilê Xwedê ye, Ji wê direve û rizgar dibe, Lê kesê gunehkar dikeve destê wê.

²⁷Îcar Şehreza dibêje: min ev dît: «Ji bo ku ez sedemên pişt tiştan bibînim, Min yekê bi ser ya din ve danî.

²⁸Lê tiştê ku ez lê digeriyam, min nedît: Ji nav hezaran min tenê zilamek dît, Di nav wan hemûyan de min jinek jî nedît.

²⁹Îcar min tenê ev dît ku Xwedê mirov rast afirandin, Lê ew li gelek dek û dolaban digeriyan.»