Read Kurmanji Încîl, 2009 Ûnis 3 Bible Online

Ûnis 3 - Kurmanji Încîl, 2009 bible

Ûnis 3

¹Peyva Xudan cara diduyan ji Ûnis re hat:

²«Rabe, here Nînewayê, wî bajarê mezin û ya ku ezê ji te re bêjim bide bihîstin.»

³Ûnis rabû û li ser peyva Xudan çû Nînewayê. Nînewa bajarekî wisa mezin bû ku bi qasî rêveçûna sê rojan bû.

⁴[5†] Ûnis ket bajêr, bi qasî rojekê rê ve çû û bi dengekî bilind got: «Çil roj bi şûn de, wê Nînewa serobino bibe.»

⁵Xelkê Nînewayê bawerî bi Xwedê anî. Rojî girt û ji mezinan heta biçûkan, her kesî çûx li xwe kir.

⁶Gava ku padîşahê Nînewayê ev yek bihîst, ji ser textê xwe rabû, xiftanê xwe deranî, çûx li xwe pêça û li ser xweliyê rûnişt.

⁷Piştre li Nînewayê ev ferman da: «Fermana padîşah û giregiran ev e: Ne mirov û ne jî heywan divê tiştekî nexwe û venexwe. Herwiha pez û dewar divê neçêrin û avê venexwin.

⁸Bila hemû mirov û heywan çûx li xwe bikin û bi hêzdarî gazî Xwedê bikin. Bila her kes ji riya xerab bizivire û destê xwe ji zordariyê bikişîne.

⁹Kî zane? Belkî wê gavê Xwedê fikra xwe biguhere, dev ji hêrsa xwe ya mezin berde û em helak nebin.»

¹⁰Xwedê kirinên Nînewayiyan dît. Ew ji gunehên xwe zivirîbûn. Li wan hat rehmê, fikra xwe guhert. Tiştê ku soz dabû bîne serê wan, nekir.