Read Kurmanji Încîl, 2009 Ûnis 4 Bible Online

Ûnis 4 - Kurmanji Încîl, 2009 bible

Ûnis 4

¹Ev yek gelek li zora Ûnis çû û ew hêrs bû.

²[6†] Wî ji Xudan re dua kir û got: «Ax, ya Xudan, hê gava ku ez li welatê xwe bûm, ma min ev negot? Ji ber vê yekê ez yekser reviyam Tarşîşê. Min dizanibû tu Xwedayekî gelek bi rehm û dilovan î, tu dereng hêrs dibî, kerema te pir e û tu dev ji cezakirinê berdidî.

³Ya Xudan, ji kerema xwe niha canê min bistîne; çimkî ji bo min mirin, ji vî halî çêtir e.»

⁴Xudan got: «Ma çi heqê te heye ku tu hêrs bibî?»

⁵Ûnis ji bajêr derket û li rojhilatê bajêr rûnişt. Wî li wir ji bo xwe holikek çêkir û di bin siya wê de rûnişt, da ku bibîne ka wê çi bê serê bajêr.

⁶Xudan Xwedê ji bo ku Ûnis ji rewşa xerab rizgar bike û ji serê wî re siyê çêke, şînahiyekê [7] peyda kir. Ûnis bi wê gelek kêfxweş bû.

⁷Lê roja din ber destê sibê, Xwedê kurmikek şand, kurm li şînahiyê ket û ew hişk kir.

⁸Gava ku tav derket, Xwedê bayekî rojhilat ê bi şewat rakir û tavê li serê Ûnis xist; ew sist bû. Wî xwest ku bimire û got: «Ji bo min mirin, ji vî halî çêtir e.»

⁹Lê belê Xwedê ji Ûnis re got: «Ma heqê te heye ku tu li ser şînahiyekê hêrs bibî?» Ûnis got: «Heqê min heye, ez ji ber hêrsa xwe dikim bimirim.»

¹⁰Paşê Xudan got: «Tu li ber wê şînahiyê dikevî ku te di ber de ked nedaye û mezin nekiriye. Ew şînahiya ku di şevekê de şîn bû û di şevekê de jî hişk bû.

¹¹Îcar ez, li ber Nînewayê, li ber wî bajarê mezin nekevim? Li wî bajarî ji sed û bîst hezarî zêdetir kes hene ku çep û rastên xwe ji hev dernaxin. Herwiha gelek heywan jî li wir hene.»