Read Kurmanji Încîl, 2009 Romayî 4 Bible Online

Romayî 4 - Kurmanji Încîl, 2009 bible

Romayî 4

¹Nexwe em li ser Birahîmê* ku li gor bedenê bavkalê me ye çi bêjin?

²Eger Birahîm ji ber kirinên xwe rastdar derketibe, heqê wî heye ku pesnê xwe bide, lê belê ne li ber Xwedê.

³Ma Nivîsara Pîroz çi dibêje? «Birahîm ji Xwedê bawer kir û ev yek jê re rastdarî hat hesabkirin.» [17†] [18†]

⁴Eger mirovek kar dike, destmiza wî ne kerem, lê belê deyn tê hesabkirin.

⁵Lê ji wî re, ku ji kirinên xwe ne piştrast e, lê baweriyê bi Xwedayê ku yê nepak rastdar derdixe tîne, baweriya wî rastdarî tê hesab kirin.

⁶Çawa ku Dawid* jî li ser bextewariya wî mirovê ku Xwedê wî bêyî kirinan rastdar hesab dike, dibêje:

⁷«Xwezî bi wan mirovên ku li neheqiyên wan hatiye bihûrtin Û gunehên wan hatine nixumandin.

⁸Xwezî bi wî mirovê ku Xudan ji wî re guneh hesab nake!» [19†]

⁹Ma ev bextewarî tenê ji bo yên sinetbûyî*, an ji bo yên sinetnebûyî ye jî? Em dibêjin ku «baweriya Birahîm jê re rastdarî hat hesab kirin.» [20†]

¹⁰Îcar ew çawa rastdar hat hesabkirin? Ma ev piştî sinetbûna wî, an berî sinetbûna wî bû? Ev ne piştî sinetbûna wî bû, lê belê berî sinetbûna wî bû.

¹¹Birahîm hê sinetnebûyî nîşana sinetê wek mora rastdariya ku bi baweriyê tê, stand. Bi vî awayî Birahîm bû bavê wan hemûyên ku bê sinet baweriyê tînin, da ku ew jî rastdar bên hesabkirin. [21†]

¹²Wusa jî Birahîm bû bavê yên sinetbûyî yên ku ne bi tenê sinet bûne, lê li ser şopa baweriya bavê me Birahîm a ku beriya sinetbûna wî hebû, diçin.

¹³Çimkî soza ku ji Birahîm û dûndana* wî re hat dayîn ku ewê dinyayê mîras bistîne, ne bi riya Şerîetê*, lê bi riya rastdariya ku ji baweriyê tê, hat dayîn. [22†]

¹⁴Eger yên ku li gor Şerîetê dijîn wêris bin, hingê bawerî pûç û soz betal e. [23†]

¹⁵Çimkî Şerîet xezebê tîne; lê dera ku şerîet lê tune, şikandina şerîetê jî tune.

¹⁶Ji ber vê yekê soz bi baweriyê ve girêdayî ye, da ku bi keremê be û ji bo hemû dûndana Birahîm ewledar be. Ne tenê ji bo yên ku bi Şerîet in, lê belê ji bo yên ku wek Birahîm bawer dikin jî. Çimkî ew bavê me hemûyan e. [24†]

¹⁷Çawa ku hatiye nivîsîn: «Min tu kirî bavê gelek miletan.» [25†] Birahîm li ber wî Xwedayî bawer kir ê ku miriyan vedijîne* û wek ku hene, gazî tiştên neyî dike.

¹⁸Birahîm di bêhêvîtiyê de bi hêvî bawer kir û bû «bavê gelek miletan». Wek ku hatibû gotin: «Dûndana te wê weha be.» [26†]

¹⁹Çaxê ew fikirî ku hema bêje bedena wî miriye — çimkî ew li dor sed salî bû — û Sara nikare zarokan bîne, ew di baweriyê de qels nebû. [27†]

²⁰Ew bi bawernekirinê li ser soza Xwedê dudilî nebû, lê belê di baweriyê de hêzdar bû û rûmet da Xwedê.

²¹Ew tam piştrast bû, soza ku Xwedê daye ew dikare bike jî.

²²Ji ber vê yekê baweriya wî «jê re rastdarî hat hesab kirin.» [28†]

²³Îcar gotina «jê re rastdarî hat hesab kirin» ne tenê ji bo Birahîm hat nivîsîn,

²⁴lê belê ji bo me jî hatiye nivîsîn. Ji me re jî bawerî wê rastdarî bê hesabkirin, em ên ku baweriyê bi wî yê ku Xudanê me Îsa ji nav miriyan rakir, tînin.

²⁵Îsa di ber neheqiyên me de teslîmî mirinê hat kirin û ji bo rastderxistina me rabû. [29†]