Read Kurmanji Încîl, 2009 Korîntî I, 16 Bible Online

Korîntî I, 16 - Kurmanji Încîl, 2009 bible

Korîntî I, 16

¹Îcar heçî alîkarî civandina ji bo pîrozan e, wek min li civînên bawermendan ên li Galatyayê tembîh kiriye, hûn jî wusa bikin.

²Bila her yek ji we di roja pêşî ya heftiyê de, li gor hatina xwe hinek pere bicivîne û li ba xwe hilîne, da ku gava ez bêm, civandina peran ne hewce be.

³Gava ku ez bêm, ezê wan kesên ku we li cih dîtine ku diyariya we bibin Orşelîmê*, bi nameyan ve bişînim.

⁴Eger çûna min jî qenc be, ewê bi min re herin.

⁵Gava ku ez di Mekedonyayê re derbas bibim ezê bêm ba we. Çimkî ezê di Mekedonyayê re derbas bibim.

⁶Îcar belkî ez li ba we bimînim an jî zivistanê li ba we derbas bikim; da ku, ez herim ku derê, hûn min bi rê bixin.

⁷Ez naxwazim ku niha we li ser lingan bibînim; eger Xudan destûrê bide, ez hêvî dikim ku demekê bi we re bimînim.

⁸Lê ezê heta Roja* Pentîkostê li Efesê bimînim.

⁹Çimkî ji bo xebatê deriyekî fireh li ber min vebûye û yên ku li hember radibin gelek in.

¹⁰Çaxê ku Tîmotêyos* bê, wusa bikin ku bêtirs li ba we bimîne. Çimkî ew jî wek min di karê Xudan de dixebite.

¹¹Loma bila tu kes wî kêm nebîne. Ji bo ku bê ba min, wî bi aştî bi rê bixin. Çimkî bi birayan re ez li benda wî me.

¹²Îcar heçî birayê me Apolos e, min pirr rica jê kir ku bi birayên din re bê ba we, lê daxwaza wî ya hatinê niha qet tune. Di demeke xweşkeys de ewê bê.

¹³Hişyar bin, di baweriyê de hîmgirtî bin, mêrxas bin, hêzdar bin.

¹⁴Her tiştê ku hûn dikin, bila bi hezkirinê bê kirin.

¹⁵ [15-16] Birano, daxwazeke min ji we heye; hûn dizanin, maliyên Stefanas, bawermendên pêşî yên herêma Axayayê* ne. Bi ser de wan xwe ji xizmeta pîrozan re veqetandiye. Serî li ber yên weha û li ber hemûyên ku bi wan re dixebitin û keda xwe didin, deynin. [56]

¹⁷Ez şa dibim ku Stefanas, Fortunatos û Axayîkos hatin, çimkî wan cihê we girt

¹⁸û rihetî dan ruhê min û yê we jî. Loma, yên weha nas bikin.

¹⁹Civînên bawermendan ên herêma Asyayê* silavan li we dikin. Akîlas û Priskîla, bi civîna bawermendan a li mala xwe ve, bi navê Xudan gelek silavan li we dikin.

²⁰Hemû bira silavan li we dikin. Bi ramûsana pîroz silavan li hevdû bikin.

²¹Ez Pawlos, bi destê xwe silavên xwe dinivîsim.

²²Eger yek ji Xudan hez neke, nifir li ser wî be. ‹Maranata›. [57]

²³Kerema Xudan Îsa li ser we be.

²⁴Hezkirina min, bi saya Mesîh Îsa bi we hemûyan re be. Amîn*.