Read Kurmanji Încîl, 2009 Korîntî I, 9 Bible Online

Korîntî I, 9 - Kurmanji Încîl, 2009 bible

Korîntî I, 9

¹Ma ez ne azad im? Ma ez ne Şandî me? Ma min Xudanê me Îsa nedîtiye? Ma hûn di baweriya Xudan de ne berê xebata min in?

²Ez ji bo hinekên din ne Şandî bim jî, qet nebe ez ji bo we Şandî me. Çimkî hûn di baweriya Xudan de mora şandîtiya min in.

³Xweparastina min a li hember yên ku min dikişînin pirsê ev e.

⁴Ma heqê me tune ku em bixwin û vexwin?

⁵Ma heqê me tune ku em wek Şandiyên din û wek birayên Xudan û wek Kîfas*, jineke bawermend bi xwe re bigerînin?

⁶An ma heqê min û Barnabas tenê nîne ku em nexebitin?

⁷Ma kî bi perê xwe leşkeriyê dike? Ma kî rezekî datîne û berê wî naxwe? Ma kî şivantiya keriyekî dike û ji şîrê wî venaxwe?

⁸Ma ez van tiştên ha li gor mirovan dibêjim? An ma Şerîet* jî van tiştan nabêje?

⁹Çimkî di Şerîeta Mûsa* de hatiye nivîsîn: «Devê gayê ku gêrê dike girê nedin.» [19†] Gelo Xwedê xema ga dixwe,

¹⁰an bi tevahî vê ji bo me dibêje? Erê, ev ji bo me hat nivîsîn. Çimkî yê ku cot dike, divê bi hêvî cot bike; û yê ku gêrê dike, divê bi hêviya ku ewê bibe hevpar, gêrê bike.

¹¹Eger me tiştên ruhanî di hundirê we de çandin, nexwe em tiştên cismanî ji we bidirûn jî, gelek e?

¹²Eger hinekên din di desthilatiyê de li ser we pardar bin, ma heqê me hê bêtir tune? Lê belê me ev desthilatiya xwe bi kar neanî. Îcar ji bo ku em astengekê ji Mizgîniya Mesîh re dernexin, em her tiştî radigirin*.

¹³Ma hûn nizanin, yên ku di karê Perestgehê de dixebitin, ji Perestgehê dixwin û yên ku di gorîgehê de xizmetê dikin, parê ji gorîgehê distînin? [20†]

¹⁴Bi vî awayî, Xudan emir kir, yên ku Mizgîniyê belav dikin, ji Mizgîniyê abora xwe bikin. [21†]

¹⁵Lê min qet yek ji van heqan bi kar neanî. Û ez van tiştan nanivîsim ku weha ji bo min bê kirin. Çimkî ji dêla ku yek pesindana min pûç derxe, mirin ji bo min çêtir e.

¹⁶Eger ez Mizgîniyê bidim, ew ji bo min nabe pesindan. Çimkî ev barê pişta min e. Wey li min, eger ez Mizgîniyê belav nekim!

¹⁷Îcar, eger ez vê bi daxwaz bikim, xelata min heye. Eger ez ne bi daxwaz bikim, wekîltî li min hatiye spartin.

¹⁸Nexwe xelata min çi ye? Ev e ku çaxê ez Mizgîniyê belav dikim, ez Mizgîniyê bê bergîdan* bidim, da ku ez desthilatiya xwe ya ku di Mizgîniyê de ye bi kar neynim.

¹⁹Bi ser ku ez ji her kesî azad im, ji bo ku ez hê bêtir mirovan bi dest bixim, min xwe kir xulamê her kesî.

²⁰Bi Cihûyan re ez bûm wek Cihûyan, da ku ez Cihûyan bi dest bixim. Bi wan re yên ku di bin Şerîetê de ne, ez bûm wek ên ku di bin Şerîetê de ne, da ku ez wan ên di bin Şerîetê de ne bi dest bixim. — Heçî ew e, ez bi xwe ne di bin Şerîetê de me.

²¹Ez bi wan ên bê Şerîet re bûm wek ku ez bê Şerîet im, da ku ez wan ên bê Şerîet bi dest bixim. — Heçî ew e, ez li hember Xwedê ne bê Şerîet im, lê ez di bin Şerîeta Mesîh de me.

²²Bi lewazan re ez bûm lewaz, da ku ez yên lewaz bi dest bixim. Bi her kesî re ez bûme her tişt, da ku ez bi her awayî hinekan bi dest bixim.

²³Ez van hemûyan ji bo Mizgîniyê dikim, da ku para min di wê de hebe.

²⁴Ma hûn nizanin ku di meydana bezê de, ji hemûyên ku dikevin hevbezînê tenê yek xelatê distîne. Hûn jî wusa bibezin, da ku hûn xelatê bistînin.

²⁵Her kesê ku dikeve berhevdanê, di her tiştî de nefsa xwe digire. Ew ji bo çelengeke pûç vê dikin, lê em ji bo yeke nepûç dikin.

²⁶Ji bo vê yekê ez bêarmanc nabezim, ez badîhewa kulma xwe navêjim hewayê.

²⁷Ez cefayê didim bedena xwe û wê bindest dikim, da ku piştî min hinekên din hîn kirin, ez bi xwe neyêm redkirin.