Read Kurmanji Încîl, 2009 Efesî 5 Bible Online

Efesî 5 - Kurmanji Încîl, 2009 bible

Efesî 5

¹Ji bo vê yekê, wek zarokên delal mîna Xwedê bikin.

²Çawa ku Mesîh ji me hez kir û ji bo me xwe feda kir û xwe wek pêşkêş û goriyeke* bîhnxweş pêşkêşî Xwedê kir, hûn jî wusa di hezkirinê de rêve herin.

³Bi awayê ku li pîrozan tê, divê di nav we de, navê fuhûşiyê û her cûreyê nepakî an çavbirçîtiyê qet neyê gotin jî.

⁴Û divê peyivîna bêedebî û bi ehmeqî, an henekên zir, yanî tiştên ku ne hêja ne, nebin, lê hê bêtir hûn şikirdar bin.

⁵Vê yekê qenc bizanin ku di Padîşahiya Mesîh û Xwedê de mîrasa tu mirovê fuhûşker, nepak an jî mirovê çavbirçî yanî pûtperest*, tune.

⁶Bila tu kes we bi peyvên pûç nexapîne, çimkî xezeba Xwedê ji ber van tiştan tê ser kurên neguhdariyê.

⁷Îcar hûn nebin hevparên wan.

⁸Demekê hûn tarîtî bûn, lê niha hûn bi Xudan ronahî ne. Îcar wek zarokên ronahiyê rêve herin,

⁹ji ber ku berê ronahiyê di her qencî, rastî û rastdariyê de ye.

¹⁰Tiştê ku li xweşa Xudan diçe, kifş bikin.

¹¹Nebin hevparên karên tariyê yên bêber, lê hê bêtir wan tiştan eşkere bikin.

¹²Çimkî tiştên ku ew bi dizî dikin, eyb e ku bên gotin jî.

¹³Lê her tiştê ku dikeve ber ronahiyê, xuya dibe.

¹⁴Çimkî her tiştê ku xuya dibe, ronahî ye. Loma tê gotin: «Ey yê ku radize, hişyar bibe! Ji nav miriyan rabe û Mesîh wê ji te re bibiriqe.» [18†]

¹⁵Loma bala xwe bidinê ka hûn çawa rêve diçin, ne wek ên neşehreza, lê belê wek ên şehreza herin.

¹⁶Îcar ji fersenda vê demê îstifade bikin, çimkî roj xerab in. [19†]

¹⁷Loma ne bêaqil bin, lê belê fêm bikin ka daxwaza Xudan çi ye.

¹⁸Û bi şerabê serxweş nebin, di wê de bêedebî heye; lê bi Ruh tije bibin.

¹⁹Ji hev re Zebûr, lavije* û stranên ruhanî bêjin, di dilê xwe de ji Xudan re stran û lavijeyan bistrînin. [20†]

²⁰Hergav ji bo her tiştî bi navê Xudanê me Îsa Mesîh ji Bav Xwedê re şikir bikin.

²¹Bi tirsa Mesîh bi ya hev bikin.

²²Ey jinno! Wek ku hûn bi ya Xudan dikin, wusa bi ya mêrê xwe bikin. [21†]

²³Çimkî çawa Mesîh serê Civînê ye, mêr serê jinê ye û Mesîh bi xwe Xilaskarê Civînê, yanî bedenê ye.

²⁴Îcar çawa ku Civîn bi ya Mesîh dike, bila jin jî bi vî awayî di her tiştî de bi ya mêrê xwe bike.

²⁵Ey mêrno! Wek ku Mesîh ji Civînê hez kir û xwe di ber wê de feda kir, bila her kes ji jina xwe hez bike. [22†]

²⁶Wî xwe feda kir, da ku Civînê bi peyva xwe pîroz bike û bi şuştina avê paqij bike,

²⁷da ku Civînê bi rewneqiya* wê ve pêşkêşî xwe bi xwe bike, ku tu leke an qermîçek an tiştekî wek van li ser wê nebe, lê belê ew pîroz û bêleke be.

²⁸Bi vî awayî her mêr jî deyndar e ku wek bedena xwe, ji jina xwe hez bike. Yê ku ji jina xwe hez dike, ji xwe hez dike.

²⁹Çimkî tu kesî, tu caran ji bedena xwe nefret nekiriye, lê ew bedena xwe xweyî dike û xema wê dixwe, wek ku Mesîh jî Civînê xweyî dike û xema wê dixwe.

³⁰Çimkî em endamên bedena wî ne.

³¹«Loma mêr wê dê û bavê xwe berde, bi jina xwe re bibe yek û herdu jî wê bibin bedenek.» [23†]

³²Ev sir mezin e; lê ez vê li ser Mesîh û li ser Civînê dibêjim.

³³Loma bila her yek ji we jî wek ku ji xwe hez dike, ji jina xwe hez bike û bila jin siyaneta* mêrê xwe bigire.