Read Kurmanji Încîl, 2009 Filîpî 2 Bible Online

Filîpî 2 - Kurmanji Încîl, 2009 bible

Filîpî 2

¹Eger cesaretdaneke bi Mesîh, handaneke* ji hezkirinê, hevpariyeke we bi Ruh, hezkirineke ji dil û dilovaniyek heye,

²şahiya min temam bikin. Bila fikra we yek be, eynî hezkirina we hebe, fikra we û dilê we yek be.

³Tu tiştî bi hevrikiyê an bi pesindana pûç nekin. Lê bila bi nefsbiçûkî her yek ji we yên din di ser xwe re bigire.

⁴Bila her yek ji we ne tenê li karê xwe, lê belê li karê yên din jî binêre.

⁵Bila ew fikirîn bi we re hebe, ku bi Mesîh Îsa re jî bû:

⁶Bi ser ku ew di xasîtiya Xwedê de bû jî, Wî wekheviya bi Xwedê re xenîmetek hesab nekir.

⁷Lê belê wî mezinahiya xwe ji xwe xist, Xasîtiya xulam stand û bû mîna mirovan, Di şiklê mirovan de xuya bû.

⁸Wî xwe nizim kir, îtaet kir û çû mirinê, Heta çû mirina li ser xaçê.

⁹Ji bo vê yekê Xwedê ew gelek bilind kir Û navê di ser her navî re da wî.

¹⁰Da ku bi navê Îsa, Hemû yên li ezmên, li erdê û di bin erdê de, Herin ser çokan

¹¹Û ji bo rûmeta Bav Xwedê, Her ziman eşkere bike û bêje ku Îsa Mesîh Xudan e. [2†]

¹²Ji ber vê yekê, hezkirîno, çawa ku we hergav bi ya min kiribe, niha jî, ne tenê di dema ku ez li ba we me, lê belê hê bêtir di dema ku ez ne di nav we de me jî, bi ya min bikin; bi tirs û lerizînê xilasiya xwe pêk bînin.

¹³Çimkî Xwedê ye yê ku di dilê we de dixebite, da ku hem daxwaz û hem jî kirina we li wî xweş bê.

¹⁴Her tiştî bê pitepitkirin û bê devjenî bikin,

¹⁵da ku hûn bêqusûr û pak bin. Di nav vî nifşê* xwehr û jirêketî de ku hûn di nav wan de wek stêrên ezmên ronahiyê didin, zarokên Xwedê yên bêleke bin [3†]

¹⁶û peyva jiyanê hişk bigirin. Wusa ku, di Roja Mesîh de ji min re bibe pesin, da ku ez badîhewa nebezîbim û min badîhewa keda xwe nedabe.

¹⁷Lê belê, eger xwîna min li ser gorî* û xizmeta baweriya we wek pêşkêşekê bê rijandin jî, ezê şa bim û ezê bi we hemûyan re şa bim.

¹⁸Bi vî awayî hûn jî şa bin û bi min re şa bibin.

¹⁹Îcar hêviya min ji Xudan Îsa heye ku ez di demeke nêzîk de Tîmotêyos bişînim ba we, da ku ez jî halê we bizanim û dilê min rihet bibe.

²⁰Çimkî tu kesê min ê ku mîna wî bi dil û can li ser we bifikire û ji bo hal û rewşa we xemê bixwe tune;

²¹yên din hemû ne li tiştên Îsa Mesîh, lê li feyda xwe digerin.

²²Lê hûn dilsoziya wî ya ceribandî dizanin û hûn dizanin ku wek kurekî bi bav re, ew bi min re di xizmeta Mizgîniyê de dixebitî.

²³Îcar çaxê ez bibînim ka rewşa min wê çawa çêbe, ez hêvî dikim ku ezê zûka wî bişînim ba we.

²⁴Û ez li Xudan ewle me ku di demeke nêzîk de ez bi xwe jî, ezê bêm.

²⁵Lê min pêwist dît ku ez birayê xwe, hevalkar û hevalleşkerê xwe Êpafrodîtos ê ku we şandiye, da ku ew di hewcedariya min de bibe alîkar, bişînim ba we.

²⁶Çimkî wî bêriya we hemûyan dikir û ji ber ku we bihîstibû ku nexweş e, ew pirr xemgîn e.

²⁷Ew wusa nexweş bû ku gihîşt ber mirinê. Lê belê Xwedê li wî hat rehmê; ne tenê li wî, li min jî hat rehmê, da ku ji min re xemgînî li ser xemgîniyê çênebe.

²⁸Loma ez wî hê zûtir dişînim, da ku hûn dîsa bi dîtina wî şa bibin û xemgîniya min nemîne.

²⁹Îcar bi şahiyeke mezin wî bi navê Xudan qebûl bikin û siyaneta* yên weha bigirin.

³⁰Çimkî ew ji bo karê Mesîh nêzîkî mirinê bû, ji bo xizmeta ku we nikaribû hûn ji bo min bikin, wî canê xwe xist talûkê.