Read Kurmanji Încîl, 2009 Îbranî 2 Bible Online

Îbranî 2 - Kurmanji Încîl, 2009 bible

Îbranî 2

¹Ji ber vê yekê divê em hê zêdetir bala xwe bidin tiştên ku me bihîstine, da ku em averê* nebin.

²Çimkî eger peyva ku bi rêberiya milyaketan hatiye gotin qayîm bûbe û her sûc û neguhdariyê cezayê ku heq kiriye standibe,

³eger em li ber vê xilasiya evqas mezin xemsar bin, emê çawa birevin û xilas bibin? Di destpêkê de Xudan ev xilasî da zanîn û ji aliyê yên ku ew bihîstine ve ji me re rast hat deranîn.

⁴Xwedê jî ji vê re bi nîşanan, bi karên mezin û kerametên cûr bi cûr û bi diyariyên Ruhê* Pîroz ên ku li gor daxwaza xwe belav kirine, şahidî kir.

⁵Xwedê, wê dinya bê ya ku em li ser dipeyivin, bi milyaketan ve girê neda.

⁶Lê yekî li derekê gotiye û şahidî kiriye: «Mirov çi ye ku tu bînî bîra xwe, An jî kurê mirov çi ye ku tu xema wî bixwî?

⁷Te ew ji bo demekê ji milyaketan nizimtir kir, Te taca rûmet û siyanetê* da serê wî. [7]

⁸Te her tişt xist bin lingên wî.» [8†] Îcar gava ku Xwedê her tişt xist bin lingên wî, tu tiştê ku nexist bin lingên wî nehişt. Lê niha em hê nabînin ku her tişt ketiye bin lingên wî.

⁹Lê em Îsayê ku ji ber cefayê mirinê taca rûmet û siyanetê wergirtiye, dibînin. Ew ji bo demekê ji milyaketan hat nizimtir kirin, da ku bi kerema Xwedê ji bo her kesî mirinê tam bike.

¹⁰Li ber Xwedayê ku her tişt ji bo wî ye û pê çêbûye baştir bû ku pêşengê xelasiyê bi cefayan bigihanda tekûziyê, da ku wî gelek kur bigihandana rûmetê.

¹¹Çimkî yê ku pîroz* dike û yên ku tên pîrozkirin, hemû ji Yekî ne. Ji ber vê yekê Îsa şerm nake ku ji wan re bêje ‹bira›

¹²û dibêje: «Ezê navê te ji birayên xwe re bêjim, Di nav civînê de ezê bi lavijeyan* pesnê te bidim.» [9†]

¹³û weha jî dibêje: «Ezê ewlehiya xwe bi wî bînim.» [10†] û weha jî: «Va me, ez û zarokên ku Xwedê dane min!» [11†]

¹⁴Loma çawa ku zarok xwîn û goşt in, ew bi xwe jî wusa di eynî tiştan de bû hevpar; da ku ew wî yê ku xwediyê hêza mirinê ye, yanî Îblîs, bi mirinê betal bike

¹⁵û wan ên ku di hemû jiyana xwe de bi tirsa mirinê bûne xulam, azad bike.

¹⁶Çimkî, bêguman ew ne alîkariya milyaketan, lê belê alîkariya dûndana* Birahîm* dike.

¹⁷Loma diviya di her tiştî de bibûya mîna birayên xwe, wusa ku ew li ber Xwedê Serokkahînekî dilovan û ewledar be, da ku gunehên gel bide bexişandin.

¹⁸Ji ber ku ew bi cefakişandinê hat ceribandin, ew dikare bê hawara wan ên ku tên ceribandin.