Read Kurmanji Încîl, 2009 Rût 3 Bible Online

Rût 3 - Kurmanji Încîl, 2009 bible

Rût 3

¹Xesûya Rûtê Naomî jê re got: «Keça min, ma ji bo qenciya te, ez ji bo te li mêrekî negerim, da ku maleke te jî hebe?

²Ma niha ev Bowazê ku tu bi keçikên wî yên xizmetkar re dimînî ne merivê me ye? Binêre, îşev Bowaz li ser bênderê ceh didêre.

³Tu serê xwe bişo, bêhnên xweş li xwe bike, xwe bixemilîne û here ser bênderê. Lê heta ew xwarin û vexwarina xwe neqedîne, tu xwe nîşanî wî nede.

⁴Wextê xewê, cihê razana wî hîn bibe, piştre here lihêfa ji ser lingên wî rake û li wê derê raze. [6] Tiştê ku divê tu bikî, ewê ji te re bêje.»

⁵Rûtê ji wê re got: «Her tiştê ku tu dibêjî ezê bikim.»

⁶Ew çû ser bênderê û her tiştê ku xesûya wê jê re gotiye kir.

⁷Piştî ku Bowaz xwar û vexwar kêfa wî hat cih û çû li kêleka lodê raza. Rûtê jî bi dizîka hat, lihêfê ji ser lingên wî rakir û raza.

⁸Nîvê şevê Bowaz ji nişkave hişyar bû û zivirî, dît ku va ye jinek li ber lingên wî razayî ye.

⁹Wî jê re got: «Tu kî yî?» Wê got: «Ez Rût im, xizmetkara te. Bi min re bizewice [7], wezîfeya xwe bike. Çimkî tu xwediyê me yî.»

¹⁰Bowaz got: «Keça min, Xudan ji te razî be. Ev qenciya te ya niha, ji ya berê jî mezintir e. Çimkî çi feqîr, çi dewlemend tu li pey xortan neketî.

¹¹Û niha keça min, tu netirse, her ya ku tu dixwazî ezê bikim. Çimkî hemû kesê li vî bajarokî dizane ku tu jineke hêja yî.

¹²[8†] Rast e, ez xwediyekî we yê nêzîk im. Lê merivekî hê ji min nêzîktir heye.

¹³Tu îşev li vir bimîne. Heger sibê ew, wezîfeya xwe ya xweyîtiyê bi te re bike, baş e; bila bike. Lê heger ew nexwaze wezîfeya xwe ya xweyîtiyê bi te re bike ez bi navê Xudanê Jîndar sond dixwim ku ezê wezîfeya xwe ya xweyîtiyê bikim. Tu heta serê sibê raze.»

¹⁴Rût heta serê sibê li ber lingên wî raza. Beriya ku dinya ronahî bibe û mirov hev bifesilînin, ew rabû. Çimkî Bowaz got: «Divê kes nizanibe ku jinek hatiye ser bênderê»

¹⁵û ji Rûtê re got: «Wê şala ser pişta xwe derîne û veke.» Çaxê Rûtê şala xwe vekir, wî şeş elbik ceh berda şala wê û li pişta wê kir. Rût zivirî bajarok.

¹⁶Gava Rût bi şûn ve zivirî, xesûya wê jê re got: «Çawa çêbû keça min?» Rûtê her tiştê ku Bowaz ji bo wê kiribû behs kir

¹⁷û got: «Wî ev şeş elbik ceh da min û ji min re got: ‹Destvala neçe ba xesûya xwe.›»

¹⁸Naomî got: «Keça min, heta ku tu hîn bûyî ka ev kar çawa çêdibe, sebir bike. Çimkî Bowaz, îro heta vî karî neqedîne nasekine.»