Read Kurmanji Încîl, 2009 Rût 4 Bible Online

Rût 4 - Kurmanji Încîl, 2009 bible

Rût 4

¹Bowaz çûbû û li ber derê bajêr rûniştibû. Gava ew merivê nêzîktir ê ku Bowaz behsa wî kiribû, di wê derê re derbas dibû, bangî wî kir û got: «Keremke were rûne.» Zilam jî hat û li kêleka Bowaz rûnişt.

²Piştre Bowaz ji rihspiyên bajêr deh kes civandin û ji wan re got: «Hûn jî keremkin werin.» Ew jî rûniştin.

³Bowaz ji xwediyê nêzîktir re got: «Naomiya ku ji diyarê Moavê ziviriye, zeviya merivê me Elîmelek difiroşe.

⁴Ez jî li pêş yên ku li vir rûniştine û rihspiyên gelê me ne, ji bo ku tu vê zeviyê bikirî meselê ji te re dibêjim. Heger tu dixwazî wezîfeya xweyîtiya xwe bikî, bike; heger tu naxwazî, ji min re bêje, da ku ez bizanim. Çimkî ev wezîfe pêşî dikeve ser te, piştî te jî ser min.» Zilam got: «Ezê wezîfeya xweyîtiya xwe ya nêzîktir bikim.»

⁵Bowaz got: «Lê belê gava ku tu zeviyê ji destê Naomî bikirî, ji bo ku navê yê mirî li ser mîras bimîne, divê tu jina wî ya Moavî, Rûtê jî ji xwe re bînî.»

⁶Xwediyê nêzîktir got: «Heger wisa be, ez nikarim wezîfeya xwe ya xweyîtiyê bikim; ez bikim, mîrasa min bi xwe dikeve talûkê. Tu bi xwe mafê xweyîtiya min bistîne, çimkî ez nikarim bikim.»

⁷ [9†] Berê li Îsraîlê, ji bo bicihanîna wezîfeya xweyîtiyê û firotina milk adet ev bû: Ji bo erêkirina kar, yekî çaroxa xwe derdixist û dida yê din û bi vî awayî kar bi şahidî diqediya.

⁸Loma zilamê ku xwediyê nêzîktir bû got: «Tu bi xwe bikire» û çaroxa xwe derxist û da Bowaz.

⁹Bowaz ji yên rihspî û hemû kesî re got: «Hûn îro şahid in ku min her tiştê Elîmelek, her tiştê Kîlyon û Mahlon ji destê Naomî kirî.

¹⁰[10†] Ez jina Mahlon a jinebî, Rûta Moavî ji xwe re tînim, da ku navê Mahlonê mirî bi mîrasa wî re bajo, li nav birayan û bajarokê wî bimîne. Hûn îro ji vê re bûn şahid.»

¹¹ [11†] Hemû xelkê li ber dergehê bajêr û rihspiyan got: «Erê, em şahid in. Xudan wê jina ku tê mala te, bike wek Rahêl û Lêaya ku mala Îsraîlê ava kirin. Tu li nav binemala Efrata dewlemend bî û li Bêtlehmê navdar bî.

¹²[12†] Bila mala te, bi zarokên ku Xudan ji vê jinê bide te, wek mala Pêrês be, ku Tamarê ji Cihûda re anî.»

¹³Bowaz Rût ji xwe re anî û çû ba wê. Bi kerema Xudan ew bi zaro ma û wê kurek anî.

¹⁴Paşê jinan ji Naomî re got: «Xudan pîroz be, wî îro te bêxweyî nehişt. Bila navê lawik li Îsraîlê bê naskirin.

¹⁵Ewê jiyana te nû bike û di pîrîtiya te de, te xweyî bike. Çimkî bûka te ya ku ji heft kuran çêtir e û ji te hez dike, ew anî dinê.»

¹⁶Naomî kurik hilda û kir hembêza xwe û jê re pîriktî kir.

¹⁷Jinikên cîran gotin: «Ji Naomî re kurek çêbû» û wan nav lê danîn. Wan navê Ovêd li lawik kirin. Ovêd bavê Yêşa, Yêşa jî bavê Dawid e.

¹⁸Ziriyeta Pêrês wiha ye: Pêrês bavê Hesron e,

¹⁹Hesron bavê Ram e, Ram bavê Ammînadav e,

²⁰Ammînadav bavê Nahşon e, Nahşon bavê Salmon e,

²¹Salmon bavê Bowaz e, Bowaz bavê Ovêd e,

²²Ovêd bavê Yêşa ye, Yêşa jî bavê Dawid e.