Read Пәймана Ну (Инщил) Мәтта 10 Bible Online

Мәтта 10 - Пәймана Ну (Инщил) bible

Мәтта 10

¹Иса һәр донздәһ шагьрт гази щәм Хԝә кьрьн у һʼӧкӧм да ԝан кӧ рʼӧһʼед һʼәрам дәрхьн, һʼәму еш у нәхԝәшийа жи ԛәнщ кьн.

²Наве һәр донздәһ шандийа әв ьн: Йе пешьн Шьмһʼун, кӧ Пәтрус те готьне у бьре ԝи Әндраԝьс, Аԛубе Зәбәди у бьре ԝи Йуһʼәнна,

³Филипо у Бәртоломәйо, Тʼума у Мәттайе хәрщгьр, Аԛубе Һалфаԝо у Тәдайо[41]

⁴Шьмһʼуне ԝәлатпʼарьст[42] у Щьһудайе Исхәрйоти, әԝе кӧ нәмамийа Иса кьр.

⁵Иса әв һәр донздәһ шандьн, тʼәми ль ԝан кьр у гот: «Нәчьнә нава нәщьһуйа у нәкʼәвьнә бажаред Самәрйайе.

⁶Ле пешийе һәрʼьнә нав пәзед мала Исраелейә ӧндабуйи.

⁷Гава һун һәрʼьн, даннасин кьн у бежьн: ‹Пʼадшатийа Әʼзмана незик буйә›.

⁸Нәхԝәша ԛәнщ кьн, мьрийа сах кьн, кʼотийа паԛьж кьн, щьна дәрхьн. Ԝә беһәԛ стандийә, беһәԛ жи бьдьн.

⁹Ль бәр пьшта хԝәда тʼӧ тьшти һьлнәдьн: Нә зерʼ, нә зив, нә сьфьр,

¹⁰нә турьк бона рʼе, нә дӧ дәст кьрас, нә чарьх, нә шьвдар, чьмки пʼалә һежайи рʼьсԛе хԝә йә.

¹¹Чь бажар йан гӧнде кӧ һун бькʼәвьне, маләкә һежа бьбиньн у ль ԝьр бьминьн, һʼәта кӧ һун жь ԝьр дьчьн.

¹²Гава һун һәрʼьнә мале, сьлаве бьдьнә ԝе у бежьн: ‹Әʼдьлайи ве малерʼа›.

¹³У һәгәр әԝ мал һежа йә, бьра сьлава ԝә ль сәр ԝе бә, ле һәгәр нә һежа йә, бьра сьлава ԝә ль ԝә вәгәрʼә.

¹⁴Ле кʼи кӧ ԝә ԛәбул нәкә у гӧһдарийа хәбәред ԝә нәкә, гава кӧ һун жь ԝе мале, йан жи жь ԝи бажари дәрдькʼәвьн, тʼоза ньгед хԝә даԝшиньн.

¹⁵Әз рʼаст ԝәрʼа дьбежьм, Рʼожа Ахрәте һʼале ԝәлате Содом у Гоморайе ԝе жь йа ԝи бажари четьр бә.

¹⁶Ва Әз ԝә дьшиньм чаԝа пәз нава гӧра. Иди мина мәʼра сәрԝахт бьн у мина кәвотка дьлсах.

¹⁷Ле һʼәвза хԝә жь мәрьва бькьн, әԝе ԝә бьбьнә бәр диԝана у кʼьништед хԝәда ԝә бьдьнә бәр ԛамчийа.

¹⁸Рʼуйе Мьнда ԝе ԝә бьбьнә бәр ԝәлийа у пʼадша, кӧ һун бәр ԝан у нәщьһуйа шәʼдәтийе бьдьн.

¹⁹Ле чахе ԝә бьбьнә бәр диԝана, хәм нәкьн кӧ һуне чаԝа йан чь хәбәр дьн. Тьштед кӧ һуне хәбәр дьн, ԝе дәме ԝәрʼа ԝе бе дайине.

²⁰Чьмки нә кӧ һуне хәбәр дьн, ле Рʼӧһʼе Баве ԝәйи кӧ нава ԝәда йә ԝе хәбәр дә.

²¹Бьра ԝе бьре хԝә бьдә кӧштьне, баве жи кӧрʼе хԝә у зарʼ жи ԝе һьмбәри де у баве хԝә рʼабьн у ԝан бьдьнә кӧштьне.

²²Бона наве Мьн һуне бәр чʼәʼве һʼәмуйа рʼәш бьн. Ле кʼи кӧ һʼәта хьлазийе тәйах кә әԝе хьлаз бә.

²³У гава нав ви бажарида ԝә бьзериньн, бьрʼәвьнә бажарәки дьн. Әз рʼаст ԝәрʼа дьбежьм, һʼәта һатьна Кӧрʼе Мерьв, һун һʼәму бажаред Исраеле перʼа нагьһиньн бьгәрʼьн.

²⁴Шагьрт жь дәрсдаре хԝә нә мәстьр ә у нә жи хӧлам жь ахайе хԝә.

²⁵Бәси шагьрт ә, ԝәки мина дәрсдаре хԝә бә у хӧлам жи мина ахайе хԝә бә. Һәгәр малхе малерʼа ‹Бәлзәбул› готьн, һьнге нәфәред ԝирʼа ԝе чь бежьн?

²⁶Аԝа иди тʼӧ щар жь мәрьва нәтьрсьн. Тьштәки дьзива тʼӧнә кӧ дәрнәйе у нә жи вәшарти кӧ кʼьфш нәбә.

²⁷Чь кӧ Әз тәʼрийеда ԝәрʼа дьбежьм, әԝи нав рʼонайеда бежьн у чь кӧ һун гӧһада дьбьһен, сәр бана бькьнә дәнги.

²⁸У жь ԝан нәтьрсьн йед кӧ бәдәне дькӧжьн, ле нькарьн рʼӧһʼ бькӧжьн. Ле һун жь Ԝи бьтьрсьн, Йе кӧ дькарә рʼӧһʼ у бәдәне щәʼньмеда ӧнда кә.

²⁹Нә дӧ чʼьвик бь дьравәки чарԛӧрʼуше тенә фьротане? Ле йәк жи жь ԝан бейи әʼмьре Баве ԝә накʼәвә әʼрде.

³⁰Ле чь ль ԝә дькʼәвә, һәр тʼеләки пʼорʼед сәре ԝә жьмарти нә.

³¹Иди нәтьрсьн. Һун жь гәләк чʼьвика ԛимәттьр ьн.

³²Кʼи кӧ Мьн бәр мәрьва иԛрар кә, Әзе жи ԝи бәр Баве Хԝәйи Әʼзмана иԛрар кьм.

³³Ле кʼи кӧ Мьн бәр мәрьва инкʼар кә, Әзе жи ԝи бәр Баве Хԝәйи Әʼзмана инкʼар кьм.

³⁴Нәфькьрьн кӧ Әз һатьмә дьне әʼдьлайийе биньм. Әз нәһатьм әʼдьлайийе биньм, ле шур.

³⁵Чьмки Әз һатьм кӧрʼ жь баве, ԛизе жь де у буке жь хԝәсийе бьԛәтиньм

³⁶у дьжмьнед мерьв ԝе жь мала ԝи бьн[43].

³⁷Әԝе кӧ баве хԝә йан дийа хԝә жь Мьн зәʼфтьр һʼьз дькә, нә һежайи Мьн ә. Әԝе кӧ кӧрʼе хԝә йан ԛиза хԝә жь Мьн зәʼфтьр һʼьз дькә, нә һежайи Мьн ә.

³⁸Әԝе кӧ хаче хԝә һьлнадә пәй Мьн найе, әԝ нә һежайи Мьн ә.

³⁹Кʼи әʼмьре хԝә бьгәрʼә, әԝе ӧнда кә, ле кʼи әʼмьре хԝә бона Мьн ӧнда кә, әԝе бьбинә.

⁴⁰Әԝе кӧ ԝә ԛәбул дькә, Мьн ԛәбул дькә у әԝе кӧ Мьн ԛәбул дькә, Йе кӧ Әз шандьмә ԛәбул дькә.

⁴¹Әԝе кӧ пʼехәмбәр ԛәбул дькә чаԝа пʼехәмбәр, ԝе һәԛе пʼехәмбәр бьстинә у әԝе кӧ мәрьвәки рʼаст ԛәбул дькә чаԝа мәрьве рʼаст, ԝе һәԛе йед рʼаст бьстинә.

⁴²У әԝе кӧ тʼасә ава сар жи дьдә йәки жь ван бьчʼука, бона хатьре ԝе йәке кӧ әԝ шагьрте Мьн ә, Әз рʼаст ԝәрʼа дьбежьм, әԝе тʼӧ щар һәԛе хԝә ӧнда нәкә».