Read Пәймана Ну (Инщил) Мәтта 11 Bible Online

Мәтта 11 - Пәймана Ну (Инщил) bible

Мәтта 11

¹Чахе Иса тʼәмийед кӧ данә һәр донздәһ шагьртед Хԝә хьлаз кьрьн, жь ԝи щийи чу нав бажаред ԝан, кӧ һин кә у даннасин кә.

²Гава Йуһʼәнна кәледа бона шьхӧлед Мәсиһ бьһист, чәнд шагьртед[44] хԝә шандьнә щәм Ԝи

³у же пьрсин: «Тӧ Әԝ и, Йе кӧ гәрәке бьһата, йан әм һивийа йәки дьн бьн?»

⁴Иса щаба ԝан да у гот: «Һәрʼьн, чь кӧ һун дьбиньн у дьбьһен Йуһʼәннарʼа бежьн.

⁵Кор дьбиньн, сәԛәт дьгәрʼьн, кʼоти паԛьж дьбьн, кәрʼ дьбьһен, мьри рʼадьбьн у фәԛирарʼа жи Мьзгини те дайине.

⁶У хԝәзи ль ԝи, кӧ жь Мьн пʼьшк набә».

⁷Гава әԝана чун, Иса бона Йуһʼәнна әʼлаләтерʼа дәстпекьр гот: «Һун дәркʼәтьнә бәрʼийе чь бьбиньн? Ԛамишәки кӧ жь байе дьһʼәжә?

⁸Йан һун дәркʼәтьн чь бьбиньн? Мәрьвәки кʼьнще назьк ль хԝә кьри? Нә әԝед кӧ кʼьнще назьк ль хԝә дькьн, әԝ малед пʼадшада нә?

⁹Йан һун дәркʼәтьн чь бьбиньн? Пʼехәмбәрәки? Бәле әз ԝәрʼа дьбежьм, жь пʼехәмбәрәки жи мәстьр ә.

¹⁰Әва әԝ ә, бона кʼижани ньвисар ә: ‹Ва йә Әзе ԛасьде Хԝә пешийа Тәва бьшиньм. Әԝе рʼийа Тә пешийа Тәва һазьр кә›[45].

¹¹Әз рʼаст ԝәрʼа дьбежьм, жь нава әԝед кӧ жь кʼӧлфәта дьне кʼәтьнә, тʼӧ кәс жь Йуһʼәннайе ньхӧмдар мәстьр нәбуйә. Ле Пʼадшатийа Әʼзманада йе һәри бьчʼук жь ԝи мәстьр ә.

¹²Жь рʼожед Йуһʼәннайе ньхӧмдар һʼәта ньһа Пʼадшатийа Әʼзмана бь зорбәтийе те һʼьщумкьрьне у йед зорбә дькьн кӧ зәфти хԝә кьн[46].

¹³Чьмки һʼәму пʼехәмбәра у Ԛануне һʼәта Йуһʼәнна бона Пʼадшатийа Әʼзмана шәʼдәти дан[47].

¹⁴У һәгәр һун дьхԝазьн ве йәке ԛәбул кьн, әԝ ә Елйасе кӧ гәрәке бьһата[48].

¹⁵Гӧһе кʼе һәйә бьра бьбьһе.

¹⁶Ньһа Әз ви ньсьли мина чь бьшьбиньм? Әԝ мина ԝан зарʼа нә, йед кӧ базарада рʼуньшти нә, гази һәвалед хԝә дькьн

¹⁷у дьбежьн: ‹Мә бона ԝә зӧрʼне хьст, һун нәрʼәԛьсин у бона ԝә бәйтʼ готьн, ԝә шин нәкьр›.

¹⁸Йуһʼәнна һат, нә дьхԝар, нә вәдьхԝар у дьготьн: ‹Щьн ԝида һәйә›.

¹⁹Кӧрʼе Мерьв һат, дьхԝә у вәдьхԝә, бона Ԝи дьбежьн: ‹Ва Әԝ йәки пәй хԝарьн у вәхԝарьне кʼәти йә, досте хәрщгьр у гӧнәкʼара йә›. Ле сәрԝахти бь әʼмәлед[49] хԝә кʼьфш дьбә кӧ әԝ рʼаст ә».

²⁰Һьнге Иса дәстпекьр ль ԝан бажара һьлат, кʼижанада гәләк кʼәрәмәтед Ԝи ԛәԝьмибун, чьмки әԝ жь гӧнәкьрьне вәнәгәрʼийан.

²¹«Ԝәй ль тә Хоразин! Ԝәй ль тә Бәйтсайда! Һәгәр әԝ кʼәрәмәтед кӧ нава ԝәда бун, Сур у Сайдеда бьбуна, әԝанайе зува бь кʼӧрх у кʼозийе тʼобә бькьрана.

²²Ле Әз ԝәрʼа дьбежьм, Рʼожа Ахрәте, һʼале Суре у Сайде ԝе жь һʼале ԝә четьр бә.

²³У тӧ Кәфәрнаһум, тә тʼьре те һʼәта әʼзман бьльнд би? Ле те һʼәта дийаре мьрийа һәрʼи хԝаре! Һәгәр әԝ кʼәрәмәтед кӧ нав тәда ԛәԝьмин Содомеда бьԛәԝьмийана, әԝе һʼәта рʼожа иройин бьма.

²⁴Ле Әз ԝәрʼа дьбежьм, Рʼожа Ахрәте һʼале ԝәлате Содоме ԝе жь һʼале тә четьр бә».

²⁵Һьнге Иса гот: «Шькьр наве Тә бә Баво, Хӧдане әʼрд у әʼзман, кӧ Тә әв тьшт жь зана у билана вәшартьн у ль бәр зарʼа вәкьрьн.

²⁶Бәле Баво, чьмки аһа ль Тә хԝәш һат.

²⁷Һәр тьшт жь Баве Мьн Мьнрʼа һатийә дайине. Кәсәк Кӧрʼ нас накә пештьри Баве у кәсәк Баве нас накә пештьри Кӧрʼ у кʼижанарʼа кӧ Кӧрʼ бьхԝазә ԝанва Баве бьдә наскьрьне.

²⁸Ԝәрьнә щәм Мьн һʼәмуйед ԝәстийайи у баргьран у Әзе рʼьһʼәтийе бьдьмә ԝә.

²⁹Нире Мьн һьлдьнә сәр хԝә у жь Мьн һин бьн, чьмки Әз шкәсти мә у дьлмьлаһим ьм у һуне хԝәрʼа рʼьһʼәтийе бьбиньн.

³⁰Чьмки нире Мьн рʼьһʼәт ә у баре Мьн сьвьк ә».