Read Пәймана Ну (Инщил) Мәтта 12 Bible Online

Мәтта 12 - Пәймана Ну (Инщил) bible

Мәтта 12

¹Һьнге Иса рʼожәкә шәмийе нава зәвийарʼа дәрбаз бу, шагьртед Ԝи бьрʼчи бун у дәстпекьрьн сьмбьлед гәньм чьнин у хԝарьн.

²Гава ферьсийа әв йәк дит, Ԝирʼа готьн: «Һәла бьньһерʼә, шагьртед Тә тьште нәщайизи рʼожа шәмийе дькьн».

³Иса ԝанарʼа гот: «Ԝә нәхԝәндийә кӧ Даԝьд чь кьр, гава әԝ у йед перʼа бьрʼчи бун?

⁴Нә әԝ кʼәтә Хана Хԝәде у нане Хԝәдерʼа дайи хԝар, әԝ нан нә ԝирʼа щайиз бу бьхԝара, нә жи әԝед тʼәви ԝирʼа, ле тʼәне кʼаһинарʼа?[50]

⁵Йан жи ԝә Ԛанунеда нәхԝәндийә, кӧ кʼаһин рʼожед шәмийе пʼарьстгәһеда шәмийе дьһʼәрʼьминьн у диса бе сущ ьн?

⁶Ле Әз ԝәрʼа дьбежьм, кӧ ль вьр Йәки жь пʼарьстгәһе мәстьр һәйә.

⁷Һәгәр ԝә заньбуйа мәʼна ве хәбәре чь йә кӧ те готьне: ‹Әз рʼәʼме дьхԝазьм, нә кӧ ԛӧрбане›[51], һьнге ԝәйе йед бесущ гӧнәкʼар нәкьрана.

⁸Чьмки Кӧрʼе Мерьв Хӧдане рʼожа шәмийе йә».

⁹Иса жь ԝьр рʼабу чу, һатә кʼьништа ԝан.

¹⁰Мәрьвәк ль ԝьр һәбу, кӧ дәсте ԝи кʼьшийабу. Һьнәка дьхԝәст кӧ хәйба Иса бькьрана, жь Ԝи пьрсин у готьне: «Щайиз ә кӧ мәрьв рʼожа шәмийе нәхԝәша ԛәнщ бькьн?»

¹¹Әԝи жи ԝанарʼа гот: «Әԝ жь ԝә кʼи йә, кӧ пәзәкә ԝи һәбә у рʼожа шәмийе бькʼәвә чʼәʼле, ԝе нәгьрә у дәрнәхә?

¹²Ле инсан чьԛас жь пез ԛимәттьр ә! Аԝа рʼожа шәмийе ԛәнщикьрьн щайиз ә».

¹³Һьнге ԝи мәрьвирʼа гот: «Дәсте хԝә дьреж кә». Әԝи жи дьреж кьр у мина дәсте дьн ԛәнщ бу.

¹⁴Ле ферьси дәркʼәтьнә дәрва бона Иса ль һәв шеԝьрин кӧ чаԝа Ԝи бьдьнә кӧштьне.

¹⁵У гава Иса пе һʼәсийа, жь ԝе дәре чу, гәләк әʼлаләт жи пәй Ԝи чу. Әԝи һʼәму жи ԛәнщ кьрьн

¹⁶у тʼәми да ԝан кӧ бона Ԝи нәкьнә дәнги.

¹⁷Әва аһа бу кӧ әԝ готьна бь заре Ишайа пʼехәмбәр бе сери:

¹⁸«Ва йә хӧламе Мьн, йе кӧ Мьн бьжартийә у һʼьзкьрийе Мьни кӧ Мьн бәгәм кьрийә. Әзе Рʼӧһʼе Хԝә дайньмә сәр Ԝи у Әԝе мьләтарʼа һәԛийе әʼлам кә.

¹⁹Әԝе нә бькʼәвә һʼӧщәте, нә бькә ԛарʼә-ԛарʼ у нә жи йәке дәнге Ԝи мәйданада бьбьһе.

²⁰Әԝ ԛамише пʼәрчʼьԛи һур накә, пʼьлта дьчʼьрусә венасинә, һʼәта кӧ һәԛийе бьгьһинә сери.

²¹У һʼәму мьләт ԝе гӧмана хԝә дайньнә сәр наве Ԝи»[52].

²²Һьнге щьнакʼәтики кори лал анинә щәм Ԝи у Әԝи әԝ ԛәнщ кьр, ӧса кӧ әԝи һьн дит у һьн жи хәбәр да.

²³У тʼәмамийа әʼлаләте зәндәгьрти ма у гот: «Гәло Әв ә кӧрʼе Даԝьд?»

²⁴Ле гава ферьсийа бьһист готьн: «Әва бь һʼӧкӧме сәрԝере щьна Бәлзәбул щьна дәрдьхә».

²⁵Ле нетед дьле ԝан Исава әʼйан бун у ԝанарʼа гот: «Һәр пʼадшатийа кӧ нав ԝеда тʼьфаԛ тʼӧнәбә ԝе ԝеран бә у һәр бажар йан мала кӧ ль нава ԝеда тʼьфаԛ тʼӧнәбә әԝ наминә.

²⁶Һәгәр мирещьн хԝәха хԝә дәрдьхә, кӧ ӧса йә нава пʼадшатийа ԝида бетʼьфаԛи һәйә, иди пʼадшатийа ԝи ԝе чаԝа бьминә?

²⁷Һәгәр Әз бь һʼӧкӧме Бәлзәбул щьна дәрдьхьм, ле йед кӧ пәй ԝә тен бь чь дәрдьхьн? Ԝәки ӧса йә әԝе бьбьнә һʼакьмед ԝә.

²⁸Ле һәгәр Әз бь һʼӧкӧме Рʼӧһʼе Хԝәде щьна дәрдьхьм, иди Пʼадшатийа Хԝәде гьһиштийә ԝә.

²⁹Йан чаԝа йәк дькарә бькʼәвә мала мерхасәки у һәбука ԝи тʼалан кә, һәгәр пешийе ԝи мерхаси гьренәдә? Гава гьреда, һьнге ԝе бькарьбә мала ԝи тʼалан кә.

³⁰Кʼи кӧ нә тʼәви Мьн ә, мьԛабьли Мьн ә у кʼи кӧ тʼәви Мьн тʼоп накә, бәла дькә.

³¹Бона ве йәке Әз ԝәрʼа дьбежьм, һәр гӧнә у готьнед хьраб ԝе ль мәрьва бенә бахшандьне, ле әԝе кӧ готьнәкә хьраб мьԛабьли Рʼӧһʼ бежә, ль ԝи найе бахшандьне.

³²Кʼи тьштәки мьԛабьли Кӧрʼе Мерьв бежә, ԝе бе бахшандьне, ле һәгәр йәк һьндава Рʼӧһʼе Пирозда бежә, ль ԝи найе бахшандьне, нә ве дьне нә жи ԝе дьне.

³³Һәгәр дар ԛәнщ ә, бәре ԝе жи ԛәнщ ә, һәгәр дар хьраб ә, бәре ԝе жи хьраб ә, чьмки дар жь бәре хԝә те наскьрьне.

³⁴Чʼежькед мәʼра! Һун чаԝа дькарьн ԛәнщ хәбәр дьн, һәгәр һун хьраб ьн? Чьмки дьл чьва тʼьжи йә зар жи әԝе дьбежә.

³⁵Мәрьве ԛәнщ, жь хьзна хԝәйә ԛәнщ ԛәнщийе дәрдьхә, ле мәрьве хьраб, жь хьзна хԝәйә хьраб хьрабийе дәрдьхә.

³⁶Әз ԝәрʼа дьбежьм, Рʼожа Ахрәте мәрьв бона һәр хәбәрәкә пʼучʼ кӧ хәбәр дьдьн ԝе щабдар бьн.

³⁷Чьмки һуне бь хәбәред хԝә бесущ бьн у бь хәбәред хԝә гӧнәкʼар бьн».

³⁸Һьнге һьнәка жь ԛанунзан у ферьсийа Ԝирʼа готьн: «Дәрсдар! Әм дьхԝазьн кӧ нишанәке жь Тә бьбиньн».

³⁹Әԝи ль ԝан вәгәрʼанд у гот: «Ньсьле хьраб у хальфи нишанәке дьхԝазә, ле жерʼа нишанәкә дьн найе дайине пештьри нишана Уньс пʼехәмбәр.

⁴⁰Чаԝа кӧ Уньс се рʼож у се шәва зьке һʼутда ма[53], Кӧрʼе Мерьв жи ӧса ԝе се рʼож у се шәва нава кʼурайийа әʼрдеда бьминә.

⁴¹Мәрьвед Нинәԝайе ԝе Рʼожа Ахрәте рʼабьн у ви ньсьли нәһәԛ кьн, чьмки әԝана бь даннасинийа Уньс жь гӧнәкьрьне вәгәрʼийан у ва Йәки жь Уньс мәстьр ль вьр һәйә.

⁴²Пʼадша Башуре[54] Рʼожа Ахрәте ԝе рʼабә ви ньсьли нәһәԛ кә, чьмки әԝа жь сәре дьне һат, кӧ сәрԝахтийа Сьлеман бьбьһе у ва йә Йәки жь Сьлеман мәстьр ль вьр һәйә.

⁴³Чахе рʼӧһʼе һʼәрам жь мерьв дәрте, щийе бе ав дьгәрʼә кӧ рʼьһʼәтийе бьбинә. Ле гава набинә,

⁴⁴һьнге әԝ дьбежә: ‹Әз вәгәрʼьмә ԝе мала хԝәйә кӧ же дәркʼәтьмә›. Гава әԝ те, дьбинә ԝе мал вала, паԛьжкьри у һәвдайи йә.

⁴⁵Һьнге дьчә һʼәфт щьнед дьнә жь хԝә хьрабтьр жи тинә, дькʼәвьнә ԝьр дьжин. У ахьрийа ԝи мәрьви жь пешийе хьрабтьр дьбә. Ӧса жи ԝе бе сәре ви ньсьле хьраб».

⁴⁶Һе Әԝи әʼлаләтерʼа хәбәр дьда, ва дийа Ԝи у бьрайед Ԝи ль дәрва сәкьнин, дьхԝәстьн тʼәви Ԝи хәбәр дана.

⁴⁷Йәки жерʼа гот: «Ва дийа Тә у бьрайед Тә дәрва нә у дьхԝазьн тʼәви Тә хәбәр дьн».

⁴⁸Әԝи жи ль ԝи вәгәрʼанд у готе: «Кʼи йә дийа Мьн у кʼи нә бьрайед Мьн?»

⁴⁹Һьнге дәсте Хԝә дьрежи шагьртед Хԝә кьр у гот: «Ва нә де у бьрайед Мьн!

⁵⁰Чьмки кʼи кӧ хԝәстьна Баве Мьни әʼзмана бинә сери, әԝ ә бьре Мьн, хушка Мьн у дийа Мьн».