Read Пәймана Ну (Инщил) Мәтта 13 Bible Online

Мәтта 13 - Пәймана Ну (Инщил) bible

Мәтта 13

¹Ԝе рʼоже Иса жь мале дәркʼәт, ль дәве голе рʼуньшт.

²У һаԛас әʼлаләт һатә щәм Ԝи, кӧ Әԝ кʼәрба кʼәтә ԛәйьке рʼуньшт у тʼәмамийа әʼлаләте дәве голе сәкьни.

³Әԝи гәләк тьшт бь мәсәла әԝ һин кьрьн у гот: «Тʼохьмрʼәш рʼабу чу кӧ тʼохьм бьрʼәшинә.

⁴Гава дьрʼәшанд, һьнәк жь ԝан кʼәтьнә дәве рʼе, тәйрәдә һатьн у әԝ хԝарьн.

⁵Һьнәкед дьн кʼәтьнә сәр әʼрде кәвьри, кӧ ль ԝьр хԝәли кем бу. Әԝ зу шин бун, чьмки тәлаше хԝәлийе нә кʼур бу.

⁶Ле чахе тәʼв дәркʼәт, әԝ чʼьлмьсин у чьмки рʼаԝед ԝан тʼӧнәбун, һʼьшк бун.

⁷Һьнәкед дьн кʼәтьнә нава стьрийа, стьри рʼабун у әԝ хәньԛандьн.

⁸Ле һьнәкед дьн жи кʼәтьнә нава әʼрде ԛәнщ у бәр дан, йе сәд, йе шест у йе си.

⁹Гӧһе кʼе һәйә бьра бьбьһе!»

¹⁰Ԝе гаве шагьртед Ԝи незик буне у готьне: «Чьма бь мәсәла Тӧ ԝанарʼа хәбәр дьди?»

¹¹Әԝи ль ԝан вәгәрʼанд у гот: «Ԝәрʼа һатийә дайине кӧ һун сӧрʼед Пʼадшатийа Әʼзмана бьзаньбьн, ле ԝанарʼа нәһатийә дайине.

¹²Чьмки кʼерʼа кӧ һәйә, ԝе һе ле зедә бә у сәрда бьрʼьжә у кʼерʼа кӧ тʼӧнә, чь һәйә жи ԝе же бе стандьне.

¹³Әз бона ԝе йәке бь мәсәла ԝанрʼа хәбәр дьдьм, кӧ әԝана дьньһерʼьн у набиньн, дьбьһен, ле гӧһе хԝә надьнә сәр у фәʼм накьн.

¹⁴Ль сәр ԝан пʼехәмбәртийа Ишайа те сери кӧ дьбежә: ‹Һуне бьбьһен у гӧһ бьдьне, ле фәʼм нәкьн, һуне бьньһерʼьн у дина хԝә бьдьне, ле нәбиньн.

¹⁵Чьмки әва щьмәʼта сәрһʼьшк ә, бь гӧһа гьран дьбьһен у чʼәʼвед хԝә гьртьнә, ԝәки бь чʼәʼва нәбиньн, бь гӧһа нәбьһен у бь һʼьш фәʼм нәкьн, вәнәгәрʼьн, кӧ Әз ԝан ԛәнщ кьм›[55].

¹⁶Ле хԝәзи ль чʼәʼвед ԝә, кӧ дьбиньн у гӧһед ԝә, кӧ дьбьһен.

¹⁷Әз рʼаст ԝәрʼа дьбежьм, гәләк пʼехәмбәр у мәрьвед рʼаст һʼьзрәта дитьна ван тьшта бун чь кӧ һун дьбиньн, ле нәдитьн у бьбьһистана чь кӧ һун дьбьһен, ле нәбьһистьн.

¹⁸Ньһа һун шьровәкьрьна мәсәла тʼохьмрʼәш бьбьһен.

¹⁹Һәр кәсе кӧ хәбәра Пʼадшатийе дьбьһе у фәʼм накә, йе Хьраб[56] те тʼохьме дьле ԝида чанди дьрʼәвинә. Әва әԝ ьн кӧ дәве рʼе һатьнә чандьне.

²⁰Әԝед ль әʼрде кәвьри һатьнә чандьне әԝ ьн, кӧ чахе хәбәре дьбьһен, әԝ зу бь әшԛ у ша ԛәбул дькьн.

²¹Ле рʼаԝ кӧ нава ԝанда тʼӧнәнә, дьреж тʼаԝ накьн. Гава бона хәбәре рʼасти тәнгасийа йан зерандьне тен, әԝ зу жь рʼе дькʼәвьн.

²²Әԝед ль нава стьрийада һатьнә чандьне әԝ ьн, кӧ хәбәре дьбьһен у хәмед ве дьнйайе у дәрәԝед дәԝләтийе хәбәре дьхәньԛиньн, әԝ бе бәр дьминьн.

²³Ле әԝед ль нава әʼрде ԛәнщда һатьнә чандьне әԝ ьн, кӧ хәбәре дьбьһен, фәʼм дькьн у бәр дьдьн, һьнәк сәд, һьнәк шест у һьнәк си».

²⁴Иса мәсәләкә дьн жи ԝанарʼа пешда ани у гот: «Пʼадшатийа Әʼзмана мина ве йәке йә: Мәрьвәки нав әʼрде хԝәда тʼохьме ԛәнщ чанд.

²⁵Гава һʼәму рʼазайи бун, дьжмьне ԝи һат у ль нав гәньмда зиԝан жи чанд у чу.

²⁶Гава гәньм гьһишт бәре хԝә да, һьнге зиԝан жи перʼа кʼьфш бун.

²⁷Хӧламед хԝәйе әʼрде незики ԝи бун у готьне: ‹Ахайе мә! Тә нава әʼрде хԝәда тʼохьме ԛәнщ нәчанд? Ле әв зиԝан жь кʼӧ һатьн?›

²⁸Әԝи ль ԝан вәгәрʼанд у гот: ‹Дьжмьнәки әв тьшт кьрийә›. Хӧлама жи готә ԝи: ‹Ньһа тӧ ԛайл и кӧ әм һәрʼьн ԝан рʼакьн?›

²⁹Әԝи гот: ‹На, нәбә чахе һун зиԝане рʼакьн, геньм жи перʼа дәрхьн.

³⁰Бьһельн бьра һәр дӧ жи һәврʼа бьгьһижьн һʼәта рʼожа нандьруне. Рʼожа нандьруне әзе пʼаларʼа бежьм, пешийе зиԝане бьчьньн, гӧрʼз-гӧрʼз гьредьн бона шәԝате, ле геньм бькьнә әʼмбара мьн›».

³¹Мәсәләкә дьн жи ԝанарʼа пешда ани у гот: «Пʼадшатийа Әʼзмана мина ве йәке йә: Мәрьвәки һʼәбәкә тʼохьме хәрдале һьлда, нав әʼрде хԝәда чанд.

³²Әԝ жь һʼәму тʼохьма һуртьр ә, ле гава дьгьһижә, жь һʼәму пʼьнщарʼа мәстьр дьбә у дьбә дар, ӧса кӧ тәйрәдед әʼзмен тен һелинед хԝә сәр чʼьԛьлед ԝе чедькьн».

³³Иса мәсәләкә дьн жи ԝанарʼа гот: «Пʼадшатийа Әʼзмана мина һәвиртьрʼшк ә, кӧ кʼӧлфәтәке һьлда, нава се код[57] арда стьра, һʼәта кӧ һʼәму һьлат».

³⁴Иса әв һʼәму тьшт бь мәсәла әʼлаләтерʼа готьн у бе мәсәлә тʼӧ тьшт ԝанарʼа нәдьгот.

³⁵Әв йәк аһа бу, кӧ әԝ готьна бь заре пʼехәмбәр бе сери: «Әзе бь мәсәла ԝанрʼа хәбәр дьм, тьштед жь ԝәхте әʼфьрандьна дьнйайеда вәшарти гьли кьм»[58].

³⁶Һьнге Иса әʼлаләт һьшт, һатә мал. Шагьртед Ԝи һатьнә щәм Ԝи у готьне: «Мәсәла гәньм у зиԝане мәрʼа шьровәкә».

³⁷Әԝи ль ԝан вәгәрʼанд у гот: «Әԝе кӧ тʼохьме ԛәнщ чанд, Кӧрʼе Мерьв ә.

³⁸Әʼрд дьнйа йә, тʼохьме ԛәнщ жи мәрьвед пʼара Пʼадшатийе нә, ле зиԝан мәрьвед пʼара йе Хьраб ьн.

³⁹Дьжмьне кӧ әԝ чанд, мирещьн ә. Нандьрун ахьрийа дьнйайе йә, пʼалә жи мьлйакʼәт ьн.

⁴⁰У чаԝа кӧ зиԝане тʼоп дькьн дьшәԝьтиньн, ахьрийа ве дьнйайе жи ԝе ӧса бә.

⁴¹Кӧрʼе Мерьв ԝе мьлйакʼәтед Хԝә бьшинә у әԝе жь Пʼадшатийа Ԝи һʼәмуйед кӧ мәрийа жь рʼе дәрдьхьн у нәһәԛийе дькьн бьбьжерьн

⁴²у бавежьнә кʼура агьр. Ль ԝьр ԝе бьбә гьри у чʼьркә-чʼьрка дьрана.

⁴³Һьнге мәрьвед рʼаст ԝе Пʼадшатийа Баве хԝәда мина тәʼве шәԝԛ бьдьн. Гӧһе кʼе һәйә бьра бьбьһе!

⁴⁴Пʼадшатийа Әʼзмана мина ве йәке йә: Әʼрдәкида хьзнәкә вәшарти һәбу. Мәрьвәк ԝе дьбинә, вәдьшерә, шабуна дьчә һʼәму һәбука хԝә дьфьрошә у ԝи әʼрди дькʼьрʼә.

⁴⁵Диса Пʼадшатийа Әʼзмана мина ве йәке йә: Мәрьвәки базьргани дӧрʼед рʼьнд дьгәрʼә.

⁴⁶Гава дӧрʼәки пʼьрʼ ԛимәт дьбинә, дьчә һʼәму һәбука хԝә дьфьрошә у ԝи дӧрʼи дькʼьрʼә.

⁴⁷Диса Пʼадшатийа Әʼзмана мина ве йәке йә: Тʼорʼәк те авитьне нава бәʼре у һʼәму щурʼә мәʼси дькʼәвьне.

⁴⁸Гава тʼорʼ тʼьжи дьбә, дькʼьшиньнә дәве бәʼре у рʼудьнин мәʼсийед кер дьбьжерьн дькьнә дәрдана, ле йед бекер ԝеда давежьн.

⁴⁹Ахьрийа дьнйайе жи ԝе ӧса бә. Мьлйакʼәте дәркʼәвьн хьраба жь нав ԛәнща бьбьжерьн

⁵⁰у бавежьнә кʼура агьр. Ль ԝьр ԝе бьбә гьри у чʼьркә-чʼьрка дьрана».

⁵¹Иса жь ԝан пьрси: «Ԝә әв һʼәму тьшт фәʼм кьрьн?» Ԝана жерʼа гот: «Бәле».

⁵²Әԝи жи ԝанарʼа гот: «Бона ве йәке һәр ԛанунзанәк кӧ Пʼадшатийа Әʼзмана һин буйә, мина мәрьвәки хԝәйимьлкʼ ә, кӧ жь хьзна хԝә тьштед кәвьн у ну дәрдьхә».

⁵³Гава Иса әв мәсәлә хьлаз кьрьн, жь ԝьр чу

⁵⁴һатә щи-мьскʼәне Хԝә, кʼьништа ԝанда әԝ һин дькьрьн. Әԝ жи зәндәгьрти дьман у дьготьн: «Әв сәрԝахти у ԛәԝата кʼәрәмәта жь кʼӧ гьһиштийе?

⁵⁵Нә Әв кӧрʼе нәщар ә? Нә наве дийа Ԝи Мәрйәм ә? Нә Аԛуб, Усьв, Шьмһʼун у Щьһуда бьред Ԝи нә?

⁵⁶Нә һʼәму хушкед Ԝи щәм мә нә? Әв һʼәму тьшт жь кʼӧ гьһиштьнә Ԝи?»

⁵⁷Бь ви аԝайи әԝ жь Ԝи чун, ле Иса ԝанарʼа гот: «Пʼехәмбәр тʼӧ щийи нә беԛәдьр ә, пештьри мала хԝә у щи-мьскʼәне хԝәда».

⁵⁸Әԝи ль ԝе дәре гәләк кʼәрәмәт нәкьрьн, чьмки баԝәрийа ԝан тʼӧнәбу.