Read Пәймана Ну (Инщил) Мәтта 15 Bible Online

Мәтта 15 - Пәймана Ну (Инщил) bible

Мәтта 15

¹Һьнге ферьси у ԛанунзанед Оршәлиме һатьнә щәм Иса у готьне:

²«Чьма шагьртед Тә пәй рʼаԝ-рʼьзьмед кал у бава начьн? Дәстнәшушти нан дьхԝьн».

³Әԝи ль ԝан вәгәрʼанд у гот: «Ле һун чьма бона рʼаԝ-рʼьзьмед хԝә пәй тʼәмийе Хԝәде начьн?

⁴Чьмки Хԝәде гот: ‹Ԛәдьре де у баве хԝә бьгьрә›[59] у ‹Әԝе кӧ гьлики ԛолайи де у баве хԝәрʼа бежә гәрәке бе кӧштьне›[60].

⁵Ле һун дьбежьн: ‹Әԝе кӧ дийа хԝәрʼа йан баве хԝәрʼа бежә: Әԝ аликʼарийа кӧ гәрәке жь мьн бьгьһижә тә әԝ Хԝәдерʼа те дайине,

⁶иди жь ԝи накʼәвә кӧ әԝ ԛәдьре де у баве хԝә бьгьрә›. Бь ви аԝайи бона хатьре рʼаԝ-рʼьзьмед хԝә һун хәбәра Хԝәде дькьнә хԝәли.

⁷Дӧрʼуно! Ишайа бона ԝә рʼаст пʼехәмбәрти кьрийә у готийә:

⁸‹Әва щьмәʼта бь заре хԝә ԛәдьре Мьн дьгьрә, ле дьле ԝан жь Мьн дур ә.

⁹Бадиһәԝа Мьн дьһʼәбиньн, тʼәмийед мәрьва чаԝа ԛанунед Мьн щьмәʼте һин дькьн›[61]».

¹⁰Һьнге Иса әʼлаләт гази щәм Хԝә кьр у готә ԝан: «Бьбьһен у фәʼм бькьн!

¹¹Нә кӧ тьште дьчә дев, әԝ мәрьва дьһʼәрʼьминә, ле чь кӧ жь дев дәрте, әԝ мәрьва дьһʼәрʼьминә».

¹²Һьнге шагьртед Ԝи һатьн у готьнә Ԝи: «Тӧ зани гава ферьсийа әв хәбәр бьһист, дьле ԝан ма?»

¹³Әԝи ль ԝан вәгәрʼанд у гот: «Һәр дара кӧ Баве Мьни Әʼзмана данәчʼькандийә, ԝе жь кʼокева бе рʼакьрьне.

¹⁴Жь ԝан вәгәрʼьн! Әԝә кор ьн у рʼебәре кора нә. Һәгәр кор рʼебәрийе кора бькә, һәр дӧйе жи бькʼәвьнә чʼәʼле».

¹⁵Пәтрус ле вәгәрʼанд у готе: «Ве мәсәле мәрʼа шьровәкә».

¹⁶Иса гот: «Һун жи һәла һе фәʼм накьн?

¹⁷Чьма һун фәʼм накьн, чь кӧ дьчә дев, дәрбази нав-дьл дьбә у дәрдькʼәвә дәрва?

¹⁸Ле әԝ тьштед кӧ жь дев дәртен, әԝ жь дьл дәртен у һәма әв ьн кӧ мерьв дьһʼәрʼьминьн.

¹⁹Чьмки жь дьл фькьред хьраб, кӧштьн, зьнекʼари, ԛави, дьзи, дәрәԝи, бӧхдан дәртен.

²⁰Әв ьн кӧ мәрьва дьһʼәрʼьминьн, ле дәстнәшушти нанхԝарьн мәрьва наһʼәрʼьминә».

²¹Иса рʼабу жь ԝе дәре чу алийе Сур у Сайде.

²²У ва кʼӧлфәтәкә кәнани жь ԝан дәра һат, кьрә гази у готә Ԝи: «Хӧдан, Кӧрʼе Даԝьд, мьн ԝәрә рʼәʼме. Ԛиза мьн щьна дькʼәвә, гәләки щәфе дьбинә».

²³Ле Әԝи щаба ԝе нәда. Шагьртед Ԝи незики Ԝи бун һиви же кьрьн у готьн: «Тьштәки бежә ве, бьра дури мә кʼәвә, чьмки пәй мә кʼәтийә дькә ԛарʼә-ԛарʼ».

²⁴Әԝи щаб да у гот: «Әз тʼәне бона пәзед мала Исраелейә ӧндабуйи һатьмә шандьне».

²⁵Ле әԝ кʼӧлфәта һат хԝә авитә ньге Ԝи у готе: «Хӧдан, али мьн бькә!»

²⁶Әԝи ль ԝе вәгәрʼанд у готе: «Әв нә рʼаст ә, ԝәки нане бәр зарʼа һьлдьн у бавежьнә бәр са».

²⁷Әԝе жи гот: «Бәле Хӧдан, нә сә жи ԝан һурькед кӧ жь сьфра хԝәйе ԝан дькʼәвьнә әʼрде дьхԝьн?»

²⁸Ԝи чахи Иса ле вәгәрʼанд у готе: «Әʼвде, баԝәрийа тә мәзьн ә. Бьра анәгори хԝәстьна тә тәрʼа бә». Һәма жь ԝе дәме ԛиза ԝе ԛәнщ бу.

²⁹Иса жь ԝьр чу бәр гола Щәлиле, рʼабу сәре чʼийе рʼуньшт.

³⁰Әʼлаләтәкә гьран һатә щәм Ԝи, кӧ тʼәви хԝә гәләк сәԛәт, кор, лал, шьлушәʼт у нәхԝәшед майин анибун у авитьнә бәр пʼийед Иса. Әԝи жи әԝ ԛәнщ кьрьн.

³¹Гава әʼлаләте дит кӧ лала хәбәр дан, шьлушәʼт ԛәнщ бун, сәԛәт гәрʼийан у чʼәʼве кора вәбун, зәндәгьрти ман у пәсьне наве Хԝәдейе Исраеле дан.

³²Иса гази шагьртед Хԝә кьр у гот: «Гӧне Мьн ве әʼлаләте те. Әва се рʼож ә тʼәви Мьн ә у тьштәки ԝани хԝарьне тʼӧнә. Әз нахԝазьм ԝан бьрʼчи вәрʼекьм кӧ рʼева дьле ԝан хԝәва һәрʼә».

³³Шагьртед Ԝи жерʼа готьн: «Ль ве бәрʼийе әме жь кʼӧ һаԛас нан биньн, ԝәки әве әʼлаләта гьран тʼер кьн?»

³⁴Иса ԝанарʼа гот: «Чәнд нане ԝә һәнә?» Ԝана гот: «Һʼәфт нан у чәнд мәʼсийед һур».

³⁵Иса әʼмьр кьр кӧ әʼлаләт сәр әʼрде рʼуне.

³⁶Әԝи һәр һʼәфт нан у әԝ мәʼси һьлдан шькьри да у кәркьрьн. Паше данә шагьрта, шагьрта жи данә әʼлаләте.

³⁷Һʼәмуйа жи тʼер хԝар у һʼәфт зәмбил жи тʼьжи һурькед бәрмайи бәрәв кьрьн.

³⁸Әԝед кӧ хԝарьн, пештьри жьн у зарʼа, ԝәкә чар һʼәзар мери бун.

³⁹Паше Әԝи әʼлаләт вәрʼекьр, кʼәтә ԛәйькәке у һатә синоре Мәгәдане.