Read Пәймана Ну (Инщил) Мәтта 16 Bible Online

Мәтта 16 - Пәймана Ну (Инщил) bible

Мәтта 16

¹Ферьси у садуԛи һатьнә щәм Ԝи кӧ Ԝи бьщерʼьбиньн у же хԝәстьн кӧ жь әʼзмана нишанәке нишани ԝана кә.

²Әԝи ль ԝан вәгәрʼанд у гот: «Гава дьбә евар, һун дьбежьн: ‹Һәԝа ԝе хԝәш бә, чьмки әʼзман сор буйә›.

³Ле сәре сьбәһе дьбежьн: ‹Иро һәԝа ԝе хԝәш нибә, чьмки әʼзман хӧмам у сор ә›. Һун рʼуйе әʼзмен әʼнәнә дькьн кӧ һәԝайе чаԝа бә, ле нишанед зәмана әʼнәнә накьн[62].

⁴Ньсьле хьраб у хальфи нишанәке дьхԝазә, ле жерʼа нишанәкә дьн найе дайине, пештьри нишана Уньс пʼехәмбәр». У Әԝи әԝ һьштьн у чу.

⁵Гава шагьртед ԝи дәрбази ԝи али бун, бир кьрьн хԝәрʼа нан һьлдана.

⁶Иса ԝанарʼа гот: «Мьԛати хԝә бьн, һʼәвза хԝә жь һәвиртьрʼшке ферьси у садуԛийа бькьн».

⁷Ле әԝана нав һәвда хәбәр дьдан у дьготьн: «Нане мә тʼӧнә, ләма аһа дьбежә».

⁸Ле әв йәк Исава әʼйан бу у гот: «Кембаԝәрно! Һун чьма нав һәвда хәбәр дьдьн, кӧ нане ԝә тʼӧнә?

⁹Һун һе фәʼм накьн? Найе бира ԝә, чаԝа пенщ нана тʼера пенщ һʼәзар мәрьва кьр у ԝә чәнд сәлә бәрмайи һьлдан?

¹⁰У һʼәфт нана жи тʼера чар һʼәзар мәрьва кьр у ԝә чәнд зәмбил бәрмайи һьлдан?

¹¹Һун чаԝа фәʼм накьн, ԝәки Мьн бона нан ԝәрʼа нәгот? Ле бона ԝе йәке, кӧ һун һʼәвза хԝә жь һәвиртьрʼшке ферьси у садуԛийа бькьн».

¹²Шагьрта һьнге фәʼм кьр, ԝәки Әԝи бона һәвиртьрʼшке нан ԝанрʼа нәгот, кӧ һʼәвза хԝә бькьн, ле жь һинкьрьна ферьси у садуԛийа.

¹³Иса чу алийе Ԛәйсәрийа Филипойе у жь шагьртед Хԝә пьрси: «Бь тʼәхмина мәрьва Кӧрʼе Мерьв кʼи йә?»

¹⁴Ԝана гот: «Һьнәк дьбежьн ‹Йуһʼәннайе ньхӧмдар ә›, һьнәкед дьн дьбежьн ‹Елйас ә›, ле һьнәкед майин жи дьбежьн ‹Йерәмийа йә, йан жи йәк жь пʼехәмбәра йә›».

¹⁵Әԝи жь ԝан пьрси: «Ле һун чь дьбежьн? Бь тʼәхмина ԝә Әз кʼи мә?»

¹⁶Шьмһʼун-Пәтрус ле вәгәрʼанд у готе: «Тӧ Мәсиһ и, Кӧрʼе Хԝәдейе сах».

¹⁷Иса ле вәгәрʼанд у готе: «Хԝәзи ль тә, Шьмһʼуне кӧрʼе Йуһʼәнна[63], чьмки хун у гошт әв йәк әʼйани тә нәкьрьн, ле Баве Мьни әʼзмана.

¹⁸Әз тәрʼа дьбежьм, кӧ тӧ Пәтрус[64] и, аԝа готи ԛәйак и у ль сәр ви ԛәйайи Әзе щьвина Хԝә чекьм у ԛәԝата мьрьне ԝе пе нькарьбә.

¹⁹У Әзе кʼьлитед Пʼадшатийа Әʼзмана бьдьмә дәсте тә у чь кӧ тӧ ль сәр әʼрде гьреди, әʼзманада жи ԝе гьредайи бә у чь кӧ тӧ ль сәр әʼрде вәки, әʼзманада жи ԝе вәкьри бә».

²⁰Һьнге Иса тʼәми шагьртед Хԝә кьр, ԝәки кәсирʼа нәбежьн, кӧ Әԝ Мәсиһ ә.

²¹Пәй ԝе йәкерʼа Иса дәстпекьр шагьртед Хԝәрʼа әʼйан кьр кӧ гәрәке Әԝ һәрʼә Оршәлиме, жь алийе рʼуспийа, сәрәкед кʼаһина у ԛанунзанада гәләк щәфа бькʼьшинә у бе кӧштьне, ле рʼожа сьсийа жь мьрьне рʼабә.

²²Ле Пәтрус Әԝ да алики, ле һьлат у готе: «Дури һьндава Тә, Хӧдан! Әԝ тьшт тʼӧ щар ль Тә нәԛәԝьмә!»

²³Иса сәр Пәтрусда вәгәрʼийа у готе: «Жь бәр чʼәʼве Мьн бәтавәбә, Щьно! Тӧ бона Мьн пʼьшкбун и, чьмки әԝ нет-фькьра тә нә жь Хԝәде йә, ле жь мәрьвайе йә».

²⁴Һьнге Иса шагьртед Хԝәрʼа гот: «Һәгәр йәк дьхԝазә ль пәй Мьн бе, бьра хԝә инкʼар кә, хаче хԝә һьлдә у ль пәй Мьн бе.

²⁵Чьмки кʼи кӧ дьхԝазә әʼмьре хԝә хьлаз кә, әԝе ӧнда кә у кʼи кӧ әʼмьре хԝә бона Мьн ӧнда кә, әԝе бьбинә.

²⁶Чь фәйдә һәгәр мәрьв тʼәмамийа дьнйайе ԛазьнщ кә, ле әʼмьре хԝә ӧнда кә? Йан жи мәрьв чь дькарә бәр әʼмьре хԝәва бьдә?

²⁷Чьмки Кӧрʼе Мерьв ԝе бь рʼумәта Баве Хԝә тʼәви мьлйакʼәтед Хԝә бе. Һьнге ԝе анәгори әʼмәлед һәр кәси бьдә ԝан[65].

²⁸Әз рʼаст ԝәрʼа дьбежьм, һьнәкед ль вьр сәкьни һәнә ԝе мьрьне нәбиньн, һʼәта кӧ Кӧрʼе Мерьв бь Пʼадшатийа Хԝәва те нәбиньн».