Read Пәймана Ну (Инщил) Мәтта 19 Bible Online

Мәтта 19 - Пәймана Ну (Инщил) bible

Мәтта 19

¹Чахе кӧ Иса әԝ хәбәр сәр һәвда анин, жь Щәлиле дәркʼәт һатә синоре Щьһустане, ԝи али чʼәме Урдӧне.

²Гәләк әʼлаләт ль пәй Ԝи чун у Әԝи ль ԝе дәре әԝ ԛәнщ кьрьн.

³Жь ферьсийа һьнәк незики Ԝи бун у бона щерʼьбандьне же пьрсин: «Гәло ль гора Ԛануне рʼаст ә, кӧ бона һәр мәʼнике мер жьна хԝә бәрʼдә?»

⁴Әԝи щаба ԝан да у гот: «Ԝә нә хԝәндийә, сәре серида Әʼфьрандар әԝ ‹ԛьсьме мер у жьнеда хӧльԛандьн?›[76]

⁵у гот: ‹Бона ве йәке мер ԝе де у баве хԝә бьһелә, хԝә ль жьне бьгьрә у һәр дӧ ԝе бьбьнә бәдәнәк›[77].

⁶Аԝа иди әԝ нә дӧдӧ нә, ле бәдәнәк ьн. Бона ве йәке әԝед кӧ Хԝәде кьрьнә йәк, бьра мәрьв жь һәвдӧ нәԛәтинә».

⁷Ԝана жерʼа гот: «Ле чьма Муса тʼәми кьр, кӧ мер кʼахаза жьнбәрʼдане бьдә жьне у ԝе бәрʼдә?»[78]

⁸Әԝи ль ԝан вәгәрʼанд у гот: «Муса жь дәст сәрһʼьшкийа ԝә изьн да ԝә кӧ һун жьнед хԝә бәрʼдьн. Ле сәрида нә ӧса бу.

⁹Әз ԝәрʼа дьбежьм, кʼи кӧ бе сәбәбийа ԛавийе жьна хԝә бәрʼдә у йәкә дьн бьстинә, әԝ зьнекʼарийе дькә[79]».

¹⁰Шагьртед Ԝи жерʼа готьн: «Һәгәр нав жьн у мерда тьштәки аһа һәйә, һе ԛәнщ ә ԝәки ԛәт нәзәԝьщьн».

¹¹Иса ԝанрʼа гот: «Һәр кәсирʼа әв йәк дәст надә, ле тʼәне ԝанрʼа кʼижанарʼа һатийә дайине.

¹²Чьмки нәмер һәнә, кӧ жь зькмакийеда ӧса бунә у нәмер жи һәнә, кӧ жь дәсте мәрьва бунә нәмер у нәмер жи һәнә, кӧ бона Пʼадшатийа Әʼзмана ԝана хԝә нәмер кьрьн. Кʼерʼа әв йәк дәст дьдә, бьра ӧса жи бькә».

¹³Һьнге зарʼок анинә щәм Иса, кӧ дәстед Хԝә дайнә сәр ԝан у дӧа ль ԝан бькә. Ле шагьртед Ԝи ль йед данин һьлатьн.

¹⁴Иса гот: «Бьра әԝ зарʼок бенә щәм Мьн, пешийа ԝан нәгьрьн, чьмки Пʼадшатийа Әʼзмана пʼара йед ӧса йә».

¹⁵У Иса дәстед Хԝә данинә сәр ԝан у жь ԝьр чу.

¹⁶Һьнге йәк незики Ԝи бу у готе: «Дәрсдар! Әз чь ԛәнщийе бькьм, ԝәки жийина һʼәта-һʼәтайе ԝар бьм?»

¹⁷Әԝи жерʼа гот: «Тӧ чьма бона ԛәнщийе жь Мьн дьпьрси?[80] Тʼәне Йәки ԛәнщ һәйә. Ле һәгәр тӧ дьхԝази, бькʼәви жийина һʼәта-һʼәтайе, тʼәмийед Хԝәде хԝәй кә».

¹⁸Әԝи жь Иса пьрси: «Кʼижан ьн?» Иса готе: «Нәкӧжә, зьнекʼарийе нәкә, нәдьзә, шәʼдәтийа дәрәԝ нәдә,

¹⁹ԛәдьре де у баве хԝә бьгьрә[81] у һәвале хԝә ԝәкә хԝә һʼьз бькә[82]».

²⁰Хорт жерʼа гот: «Мьн әв һʼәму хԝәйи кьрьнә. Иди чь кемасийа мьн һәйә?»

²¹Иса готе: «Һәгәр тӧ дьхԝази кʼамьл би, һәрʼә һәбука хԝә бьфьрошә бьдә фәԛира, һьнге хьзна тә ԝе ль әʼзмана һәбә. У пәй мьн ԝәрә».

²²Гава хорт әв хәбәр бьһистьн, бәр хԝә кʼәт у чу, чьмки гәләк һәбука ԝи һәбу.

²³Һьнге Иса готә шагьртед Хԝә: «Әз рʼаст ԝәрʼа дьбежьм, дәԝләтийарʼа зәʼмәт ә кӧ бькʼәвьнә Пʼадшатийа Әʼзмана.

²⁴Әз диса ԝәрʼа дьбежьм, дәвә ԝе ԛӧла дәрзийерʼа һе рʼьһʼәт дәрбаз бә, нә кӧ дәԝләти бькʼәвә Пʼадшатийа Хԝәде».

²⁵Гава шагьрта әв йәк бьһист, гәләки әʼщебмайи ман у готьн: «Иди кʼи дькарә хьлаз бә?»

²⁶Иса ль ԝан ньһерʼи у гот: «Әԝ тьшт жь дәсте мерьв найе, ле Хԝәде һәр тьшти дькарә бькә».

²⁷Ԝе гаве Пәтрус ле вәгәрʼанд у готе: «Аԝа мә һʼәму тьшт һьштийә у пәй тә һатьнә, ле ахьрийа мә ԝе чаԝа бә?»

²⁸Иса готә ԝан: «Әз рʼаст ԝәрʼа дьбежьм, гава Кӧрʼе Мерьв Дьнйа Нуда ль сәр тʼәхте Хԝәйи рʼумәт рʼуне, һунед кӧ ль пәй Мьн тен, сәр донздәһ кʼӧрсийа рʼунен у диԝана донздәһ ԛәбилед Исраеле бькьн.

²⁹У һʼәмуйед кӧ мала хԝә, йан бьред хԝә, йан хушкед хԝә, йан баве хԝә, йан дийа хԝә, йан жьна хԝә[83], йан зарʼед хԝә, йан әʼрдед хԝә бона наве Мьн һьштьнә, әԝе сәд ԛат бьстинә у ԝе жийина һʼәта-һʼәтайе жи ԝар бә.

³⁰Ле гәләкед пеш ԝе бьбьнә паш у йед паш ԝе бьбьнә пеш».