Read Пәймана Ну (Инщил) Мәтта 20 Bible Online

Мәтта 20 - Пәймана Ну (Инщил) bible

Мәтта 20

¹«Пʼадшатийа Әʼзмана мина ве йәке йә: Мәрьвәки хԝәйимьлкʼ сьбәһе зу рʼабу, ԝәки бона рʼәзе тьрийед хԝә пʼала бьгьрә.

²Әԝи пʼаларʼа рʼоже зивәк ԛьрар кьр у әԝ шандьнә нава рʼәзе хԝә.

³Незики сьһʼәта нәһа[84] дәркʼәт, һьнәкед дьнә кӧ базареда бәтал сәкьнибун дитьн

⁴у готә ԝан: ‹Һун жи һәрʼьнә нава рʼәзе мьн у чь һәԛе ԝә йә, әзе бьдьмә ԝә›. Әԝ жи чун.

⁵Диса сьһʼәта донздәһа у сьһʼәта сьсийа дәркʼәт у ӧса кьр.

⁶У незики сьһʼәта пенща дәркʼәт, һьнәкед дьн жи кӧ бәтал сәкьнибун дитьн у готә ԝан: ‹Чьма тʼәмамийа рʼоже һун ль вьр бәтал сәкьнинә?›

⁷Ԝана жерʼа гот: ‹Кәсәки әм пʼалә нәгьртьн›. Әԝи ԝанарʼа гот: ‹Һун жи һәрʼьнә нава рʼәзе мьн›.

⁸Гава рʼо чу ава, хԝәйе рʼәз ԝәкʼиле мала хԝәрʼа гот: ‹Гази пʼала кә, һәԛе ԝан бьде, жь йед пашьн дәстпебькә һʼәта йед пешьн›.

⁹Әԝ пʼалед кӧ сьһʼәта пенща гьртьбун, һатьн у һәр йәки зивәк станд.

¹⁰Гава йед пешьн жи һатьн, ԝана тʼьре әԝе зедә бьстиньн. Ле ԝана жи һәр йәки зивәк станд.

¹¹Гава һәԛе хԝә стандьн, һьндава хԝәйе рʼәзда бина хԝә тәнг кьрьн у готьн:

¹²‹Мә тʼәмамийа гьранийа рʼоже у гәрма ԝе кʼьшанд, ле әвед пашԝәхтийе кӧ һатьн сьһʼәтәке жи нәхәбьтин, тә әԝ һьмбәри мә кьрьн›.

¹³Малхе жь ԝан йәкирʼа гот: ‹Һәвал! Әз нәһәԛийе ль тә накьм. Тӧ мьнрʼа зивәки ԛайл нәбуйи?

¹⁴Һәԛе хԝә бьстинә у һәрʼә. Әз дьхԝазьм чаԝа кӧ мьн да тә, ӧса жи бьдьмә әве пашьн.

¹⁵Йан изьна мьн ль сәр мале мьн тʼӧнә, чь кӧ әз бьхԝазьм ԝе жи бькьм? Йан тӧ һʼәвсудийе дьки, кӧ әз мәрʼд ьм?›

¹⁶Бь ви аԝайи йед паш ԝе бьбьнә пеш у йед пеш ԝе бьбьнә паш[85]».

¹⁷Чахе Иса һьлдькʼьшийа Оршәлиме, тʼәне һәр донздәһ шагьртед Хԝә тʼәви Хԝә бьрьн у рʼеда готә ԝан:

¹⁸«Бьбьһен! Әм һәвраз дьчьнә Оршәлиме. Кӧрʼе Мерьв ԝе бькʼәвә дәсте сәрәкед кʼаһина у ԛанунзана. Әԝе жерʼа кӧштьне дәрхьн

¹⁹у Ԝи бьдьнә дәсте нәщьһуйа, ԝәки ԛәрфе хԝә ль Ԝи бькьн, бьдьн бәр ԛамчийа у хач кьн. Ле рʼожа сьсийа Әԝе жь мьрьне рʼабә».

²⁰Һьнге дийа кӧрʼед Зәбәди тʼәви һәр дӧ кӧрʼед хԝә һатә щәм Иса, хԝә авитә ньге Ԝи тьштәк же дьхԝәст.

²¹Иса же пьрси: «Тӧ чь дьхԝази?» Әԝе готә Ԝи: «Бежә, кӧ әв һәр дӧ кӧрʼед мьн ль нав Пʼадшатийа Тәда, йәк ль мьле Тәйи рʼасте, йе дьн жи ль мьле Тәйи чʼәпе рʼуне».

²²Ле Иса ль ԝан вәгәрʼанд у гот: «Һун ньзаньн чь дьхԝазьн. Гәло һун дькарьн жь ԝе кʼасе вәхԝьн, йа кӧ Әзе вәхԝьм?[86]» Ԝана готә Ԝи: «Бәле, әм дькарьн».

²³Әԝи ԝанарʼа гот: «Рʼаст ә һуне ԝе кʼаса Мьн вәхԝьн, ле изьна ль мьле Мьни чʼәп у рʼасте рʼуньштьне нә дәсте Мьнда йә. Әԝ щи бона ԝан ьн, кʼижанарʼа алийе Баве Мьнда һатьнә һазьркьрьне».

²⁴Гава һәр дәһә шагьртед дьн әв йәк бьһист, дьле ԝан жь һәр дӧ бьра ма.

²⁵Ле Иса әԝ гази щәм хԝә кьрьн у гот: «Һун заньн кӧ миред мьләта сәрдәстийе ԝан дькьн у гьрәгьред ԝан һʼӧкӧми сәр ԝан дькьн.

²⁶Ле нава ԝәда гәрәке ӧса нибә. Кʼи кӧ нава ԝәда дьхԝазә бьбә йе мәзьн, гәрәке бьбә бәрдәстийе ԝә.

²⁷У кʼи кӧ нава ԝәда дьхԝазә бьбә пеш, гәрәке бьбә хӧламе ԝә,

²⁸чаԝа кӧ Кӧрʼе Мерьв нәһатийә кӧ жерʼа бәрдәстийе бькьн, ле ԝәки Әԝ Хԝәха бәрдәстийе бькә у әʼмьре Хԝә бьдә, кӧ гәләка бькʼьрʼә».

²⁹Гава әԝана жь Әриһайе дәркʼәтьн, әʼлаләтәкә гьран да пәй Ԝи чу.

³⁰Ва дӧ кор сәр ԝе рʼе рʼуньштьбун. Гава бьһистьн кӧ Иса дәрбаз дьбә, кьрьнә ԛирʼин у готьне: «Хӧдан[87], Кӧрʼе Даԝьд, ль мә ԝәрә рʼәʼме».

³¹Әʼлаләте ль ԝан һьлат, кӧ дәнге хԝә бьбьрʼьн, ле ԝана һе кьрә ԛирʼин у готьне: «Хӧдан, Кӧрʼе Даԝьд, мә ԝәрә рʼәʼме!»

³²Иса сәкьни, гази ԝан кьр у гот: «Һун чь жь Мьн дьхԝазьн кӧ Әз бона ԝә бькьм?»

³³Ԝана жерʼа гот: «Хӧдан, бьра чʼәʼвед мә вәбьн».

³⁴Гӧне Иса ль ԝан һат у дәст дани сәр чʼәʼвед ԝан. Дәстхԝәда чʼәʼвед ԝан дитьн, данә пәй Иса чун.