Read Пәймана Ну (Инщил) Мәтта 23 Bible Online

Мәтта 23 - Пәймана Ну (Инщил) bible

Мәтта 23

¹Һьнге Иса әʼлаләт у шагьртед Хԝәрʼа хәбәр да у гот:

²«Ԛанунзан у ферьси ль сәр кʼӧрсийа Муса рʼуньштьнә.

³Иди әԝана чь ԝәрʼа бежьн хԝәй кьн у бьԛәдиньн, ле мина ԝан нәкьн, чьмки әԝана дьбежьн, ле накьн.

⁴Баред гьран у зәʼмәт гьредьдьн, датиньнә сәр мьлед мәрьва, ле әԝ хԝәха нахԝазьн тʼьлийа хԝә жи бьдьне.

⁵Әԝ һәр тьшти дькьн, кӧ бәр мәрьва бенә кʼьфше. Кʼиськед мәзьн ль мьл у әʼнийед хԝәва гьредьдьн[102] у рʼишийед кʼьнщед хԝә дьреж дькьн[103].

⁶Шайийада һәрәма жорьн һʼьз дькьн, кʼьништада жи кʼӧрсийед пешьн,

⁷базарада сьлаве бьдьнә ԝан у мәрьв жи ԝанрʼа ‹мамоста[104]› бежьн.

⁸Ле бьра ԝәрʼа нәбежьн: ‹Мамоста›, чьмки дәрсдаре ԝә йәк ә[105] у һун һʼәму жи бьра нә.

⁹Ль сәр дьне һун тʼӧ кәсирʼа нәбежьн: ‹Баво›, чьмки Баве ԝә йәк ә, кӧ әʼзмана йә.

¹⁰Нә жи ԝәрʼа бежьн: ‹Рʼебәр›, чьмки Рʼебәре ԝә йәк ә, әԝ Мәсиһ ә.

¹¹Бьра нава ԝәда йе һәри мәзьн бьбә бәрдәстийе ԝә.

¹²Кʼи кӧ хԝә бьльнд кә, әԝе ньмьз бә, ле кʼи кӧ хԝә ньмьз кә, әԝе бьльнд бә.

¹³Ле ԝәй ль ԝә ԛанунзан у ферьсийа! Дӧрʼуно! Һун дәре Пʼадшатийа Әʼзмана ль бәр мәрьва дадьдьн. Нә һун дькʼәвьне у нә жи дьһельн әԝед кӧ дьхԝазьн бькʼәвьне.

¹⁴Ԝәй ль ԝә ԛанунзан у ферьсийа! Дӧрʼуно! Аликива һун малед жьнәбийа һʼуфи хԝә дькьн, алийе дьнва жи бь дӧрʼути дӧайе хԝә дьреж дькьн. Бона ве йәке диԝана ԝә ԝе һе гьран бә[106].

¹⁵Ԝәй ль ԝә ԛанунзан у ферьсийа! Дӧрʼуно! Һун бәʼр у бәже ль һәв дьдьн, кӧ йәки нәбаԝәр биньн сәр рʼийа хԝә. Гава мәрәме ԝә дьбә, һун әԝи жь хԝә дӧ щара зедәтьр дькьнә пʼара щәʼньме.

¹⁶Ԝәй ль ԝә рʼебәред кор, һун дьбежьн: ‹Кʼи кӧ бь пʼарьстгәһе сонд дьхԝә, нә тьштәк ә. Ле кʼи кӧ бь зерʼе ль нав пʼарьстгәһе сонд дьхԝә, дьбә дәйндар›.

¹⁷Һәй беһʼьш у корно! Кʼижан мәзьн ә, зерʼ йан пʼарьстгәһ, кӧ зерʼ һʼәлал дькә?

¹⁸Ӧса жи һун дьбежьн: ‹Кʼи кӧ бь горигәһе сонд дьхԝә нә тьштәк ә, ле кʼи кӧ бь һʼәдийа ль сәр горигәһе сонд дьхԝә, дьбә дәйндар›.

¹⁹Һәй корно![107] Кʼижан ә мәзьн? Һʼәди йан горигәһ, кӧ һʼәдийе һʼәлал дькә?

²⁰Аԝа кʼи кӧ бь горигәһе сонд дьхԝә, әԝ һьн бь ԝе сонд дьхԝә, һьн жи бь һʼәму тьштед кӧ сәр ԝе һәнә сонд дьхԝә.

²¹Кʼи кӧ бь пʼарьстгәһе сонд дьхԝә, әԝ һьн бь ԝе сонд дьхԝә, һьн жи бь Йе кӧ ԝеда дьжи сонд дьхԝә.

²²У кʼи кӧ бь әʼзмен сонд дьхԝә, әԝ һьн бь тʼәхте Хԝәде сонд дьхԝә, һьн жи бь Йе кӧ ль сәр Рʼуньштийә сонд дьхԝә.

²³Ԝәй ль ԝә ԛанунзан у ферьсийа! Дӧрʼуно! Һун дәһәке пунге, анисойе у кʼемуне дьдьн, ле тьштед Ԛанунейә пеш, аԝа готи һәԛийе, рʼәʼме у баԝәрийе давежьнә пьшт гӧһе хԝә. Ԝә гәрәке әв йәк бькьрана у дәст жь йед майин нәкʼьшанда.

²⁴Рʼебәред кор! Һун кʼәрмеша дьпарзьньн, ле дәва дадьԛӧртиньн!

²⁵Ԝәй ль ԝә ԛанунзан у ферьсийа! Дӧрʼуно! Һун тʼас у финщана рʼуйе дәрвава паԛьж дькьн, ле һьндӧрʼва тʼьжи тьмайи у чʼәʼвбьрʼчийи нә[108].

²⁶Ферьсийе кор! Пешийе һьндӧрʼе финщан у тʼасе паԛьж кә, ԝәки ль дәрва жи паԛьж бә.

²⁷Ԝәй ль ԝә ԛанунзан у ферьсийа! Дӧрʼуно! Һун мина тʼьрбед сьпикьри нә, кӧ дәрвава бәдәԝ хӧйа дьбьн, ле һьндӧрʼва бь һәстуйе мьрийа у бь һʼәму һʼәрамийева тʼьжи нә.

²⁸Ӧса жи һун дәрва мәрьвава рʼаст кʼьфш дьбьн, ле һьндӧрʼва һун дӧрʼу нә у нәһәԛ ьн.

²⁹Ԝәй ль ԝә ԛанунзан у ферьсийа! Дӧрʼуно! Һун мәхбәред пʼехәмбәра чедькьн у тʼьрбе йед рʼаст дьхәмьлиньн

³⁰у дьбежьн: ‹Һәгәр әм рʼожед бавед хԝәда буна, мә тʼәви ԝан хуна пʼехәмбәра нәдьрʼет›.

³¹Иди һун ньһа хԝәха дьдьнә избаткьрьне, кӧ һун зарʼед ԝан бава нә, йед кӧ пʼехәмбәр кӧштьнә.

³²Дә кемасийа хьрабийед бавед хԝә тʼәмам кьн.

³³Мәʼрно! Чʼежькед мәʼра! Һуне чаԝа жь диԝана доже бьрʼәвьн?

³⁴Бона ве йәке ва Әзе пʼехәмбәра, сәрԝахта у ԛанунзана бьшиньмә щәм ԝә у һуне жь ԝан һьнәка бькӧжьн, хач кьн, һьнәка жи нав кʼьништед хԝәда бьдьнә бәр ԛамчийа у бажар-бажар бьзериньн.

³⁵Һʼәму хуна бесущә кӧ сәр рʼуйе әʼрде һатийә рʼетьне ԝе бе сәр ԝә, жь хуна Һабиле бесущ һʼәта хуна Зәкәрийайе кӧрʼе Бәрәхийа, әԝе кӧ ԝә нав пʼарьстгәһ у горигәһеда кӧшт.

³⁶Әз рʼаст ԝәрʼа дьбежьм, әв һʼәму хуне бе сәре ви ньсьли.

³⁷Оршәлим! Оршәлим! Тә пʼехәмбәр дькӧштьн у шандийед щәм хԝә дьданә бәр кәвьра! Чәнд щара Мьн хԝәст кӧ зарʼед тә ӧса бьщьванда, чаԝа мьришк щущукед хԝә бьн баске хԝәда дьщьвинә, ле ԝә нәхԝәст!

³⁸Ва мала ԝә ԝе хьрабә у дәстжекʼьшанди бьминә.

³⁹Әз ԝәрʼа дьбежьм, иди жь вьр шунда һун Мьн тʼӧ щар набиньн, һʼәта кӧ бежьн: ‹Бьмбарәк ә Әԝе кӧ бь наве Хӧдан те›[109]».