Read Пәймана Ну (Инщил) Мәтта 25 Bible Online

Мәтта 25 - Пәймана Ну (Инщил) bible

Мәтта 25

¹Һьнге Пʼадшатийа Әʼзмана ԝе мина ве йәке бә: Дәһә ԛизед бькʼьр чʼьред хԝә һьлдан пешийа зәʼведа чун.

²Жь ԝан пенщ сәрԝахт бун, ле пенщ бефәʼм.

³Бефәʼма чʼьред хԝә һьлдан, ле рʼун хԝәрʼа һьлнәдан,

⁴ле сәрԝахта тʼәви чʼьра рʼун жи дәрданада хԝәрʼа һьлдан.

⁵Гава зәʼва дәрәнги кʼәт, һʼәму жи һеньжин у хәԝрʼа чун.

⁶Ниве шәве дәнгәк һат: ‹Ва йә зәʼва те! Пешийа ԝида һәрʼьн!›

⁷Һьнге һʼәму бькʼьр рʼабун чʼьред хԝә саз кьрьн.

⁸Бефәʼма готә сәрԝахта: ‹Жь ԝи рʼуне хԝә бьдьнә мә жи, чьмки чʼьред мә ведьсьн›.

⁹Ле сәрԝахта щаба ԝан да у готьн: ‹На хер, әв рʼун ԝе тʼера мә у ԝә нәкә. Ԛәнщ ә кӧ һун һәрʼьнә щәм йед кӧ дьфьрошьн хԝәрʼа бькʼьрʼьн›.

¹⁰Гава әԝ чун бькʼьрʼьн, зәʼва һат у әԝед һазьр тʼәв ԝи кʼәтьнә дәʼԝате у дәри һатә гьртьне.

¹¹Паше бькʼьред дьн һатьн у готьн: ‹Әм хӧлам, Әм хӧлам! Дәри ль мә вәкә!›

¹²Ле әԝи щаба ԝан да гот: ‹Әз рʼаст ԝәрʼа дьбежьм, әз ԝә нас накьм›.

¹³Аԝа һʼьшйар бьминьн, чьмки һун нә рʼожа һатьна Кӧрʼе Мерьв заньн, нә жи сьһʼәте.

¹⁴Ԝи чахи Пʼадшатийа Әʼзмана ԝе мина ве йәке бә: Мәрьвәк кӧ ԝе дәркʼәта рʼеԝитийе, гази хӧламед хԝә кьр у һәбука хԝә спартә ԝан.

¹⁵Пенщ тәлант[116] данә йәки, дӧ тәлант данә йәки у тәлантәк жи да йәки, һәр кәсирʼа ԝәкә ԛәԝата ԝи у рʼекʼәт чу.

¹⁶Әԝе кӧ пенщ тәлант стандьбун, перʼа-перʼа чу бь ԝан кʼьрʼи у фьрот, пенщед дьн жи ԛазьнщ кьрьн.

¹⁷Ӧса жи әԝе кӧ дӧ тәлант стандьбун, дӧдӧйед дьн жи ԛазьнщ кьрьн.

¹⁸Ле әԝе кӧ тәлантәк стандьбу, чу әʼрд кʼола у зиве ахайе хԝә теда вәшарт.

¹⁹Пәй гәләк ԝәхтрʼа ахайе ԝан хӧлама һат у хԝәст һәԛ-һʼәсабе хԝә тʼәви ԝан рʼаст кә.

²⁰Әԝе кӧ пенщ тәлант стандьбун пешда һат, пенщ тәлантед майин жи анин у гот: ‹Ахайе мьн, тә пенщ тәлант дабунә мьн. Ва мьн сәр ԝанда пенщед дьн жи ԛазьнщ кьрьнә›.

²¹Ахайе ԝи готеда: ‹Әʼфәрьм, хӧламе ԛәнщ у амьн! Тӧ нав тьштед һьндькида амьн майи, әзе тә дайньмә сәр гәләк тьшта. Бькʼәвә шайийа ахайе хԝә!›

²²Әԝе кӧ дӧ тәлант стандьбун жи һат у гот: ‹Әз хӧлам! Тә дӧ тәлант дабунә мьн. Ва мьн дӧдӧйед дьн жи ль сәр ԝанда ԛазьнщ кьрьнә›.

²³Ахайе ԝи готе: ‹Әʼфәрьм, хӧламе ԛәнщ у амьн! Тӧ нав тьштед һьндькида амьн майи, әзе тә дайньмә сәр гәләк тьшта. Бькʼәвә шайийа ахайе хԝә!›

²⁴Ле әԝе кӧ тәлантәк стандьбу һат у гот: ‹Ахайе мьн, мьн заньбу кӧ тӧ мәрьвәки һʼьшк и. Жь ԝи щийе тә нәчандийә дьдьруйи у щийе кӧ тә нә рʼәшандийә бәрәв дьки.

²⁵Әз жи тьрсийам у чум тәланте тә әʼрдеда вәшарт. Һане мале тә тәрʼа бә›.

²⁶Ахайе ԝи ле вәгәрʼанд у готе: ‹Хӧламе хьраб у хԝәрʼанәдити! Тә заньбу әз жь ԝи щийе кӧ мьн нәчандийә дьдьрум у жь ԝи щийе кӧ мьн нәрʼәшандийә бәрәв дькьм,

²⁷тә чьма зиве мьн нәда кʼаркьра у әз бьһатама мьн мале хԝә бь сәләф бьстанда?

²⁸Ньһа тәлант жь ԝи бьстиньн у бьдьнә әԝе кӧ дәһә тәлантед ԝи һәнә.

²⁹Чьмки йе кʼе кӧ һәйә, ԝирʼа ԝе бе дайине у сәрда зедә бә, ле йе кʼе кӧ тʼӧнә, чь һәйә жи ԝе же бе стандьне.

³⁰Ле әԝ хӧламе бекер бавежьнә тәʼрийа дәрва. Ль ԝьр ԝе бьбә гьри у чʼьркә-чʼьрка дьрана›.

³¹Гава Кӧрʼе Мерьв тʼәви һʼәму мьлйакʼәта у рʼумәта Хԝәва бе, һьнге ԝе сәр тʼәхте Хԝәйи рʼумәте рʼуне

³²һʼәму мьләт ԝе ль бәр Ԝи бьщьвьн. Әԝе ԝана жь һәв башԛә кә, чаԝа шьван пез жь бьзьна вәдьԛәтинә.

³³Әԝе пез ль мьле Хԝәйи рʼасте бьдә сәкьнандьне, ле бьзьна ль мьле Хԝәйи чʼәпе.

³⁴Һьнге Пʼадша ԝе йед ль мьле Хԝәйи рʼастерʼа бежә: ‹Ԝәрьн бьмбарәкбуйийед алийе Баве Мьнда! Әԝ Пʼадшатийа кӧ бона ԝә жь ԝәхте әʼфьрандьна дьнйайеда һазьр буйә ԝар бьн.

³⁵Чьмки Әз бьрʼчи бум ԝә хԝарьн да Мьн, Әз тʼи бум ԝә ав да Мьн, Әз хәриб бум ԝә Әз ԛәбул кьрьм,

³⁶Әз тәʼзи бум ԝә Әз кʼьнщ кьрьм, Әз нәхԝәш бум һун сәр Мьнда һатьн, Әз кәледа бум һун һатьнә щәм Мьн›.

³⁷Һьнге йед рʼаст ԝе Ԝирʼа бежьн: ‹Хӧдан, мә кʼәнге Тӧ бьрʼчи дити у хԝарьн дайә Тә? Йан мә Тӧ тʼи дити у ав дайә Тә?

³⁸Мә кʼәнге Тӧ хәриб дити у Тӧ ԛәбул кьри, йан жи Тӧ тәʼзи дити у Тӧ кʼьнщ кьри?

³⁹Кʼәнге мә Тӧ нәхԝәш йан кәледа дити у әм һатьнә щәм Тә?›

⁴⁰Пʼадшайе жи ԝанрʼа бежә: ‹Әз рʼаст ԝәрʼа дьбежьм, һәгәр ԝә ԛәнщи жь ван хушк-бьред Мьнә йе һәри бьчʼук йәкирʼа кьр, ԝә Мьнрʼа кьр›.

⁴¹Һьнге Әԝе йед мьле Хԝәйи чʼәперʼа бежә: ‹Ньфьрʼлебуйино! Дури Мьн һәрʼьн нава агьре һʼәта-һʼәтайе, кӧ бона мирещьн у мьлйакʼәтед ԝи һазьр буйә[117].

⁴²Чьмки Әз бьрʼчи бум ԝә хԝарьн нәда Мьн, Әз тʼи бум ԝә ав нәда Мьн,

⁴³Әз хәриб бум ԝә Әз ԛәбул нәкьрьм, Әз тәʼзи бум ԝә Әз кʼьнщ нәкьрьм, Әз нәхԝәш у кәледа бум һун сәр Мьнда нәһатьн›.

⁴⁴Һьнге әԝе Ԝирʼа бежьн: ‹Хӧдан! Мә кʼәнге Тӧ бьрʼчи йан тʼи, йан хәриб, йан бе сьтʼар, йан нәхԝәш, йан кәледа дити у мә аликʼари нәда Тә?›

⁴⁵Ԝи чахи Әԝе щаба ԝан бьдә у бежә: ‹Әз рʼаст ԝәрʼа дьбежьм, һәгәр ԝә ԛәнщи жь әвед һәри бьчʼук йәкирʼа нәкьр, ԝә Мьнрʼа жи нәкьр›.

⁴⁶У әве һәрʼьнә щәфе һʼәта-һʼәтайе, ле йед рʼаст ԝе һәрʼьнә жийина һʼәта-һʼәтайе».