Read Пәймана Ну (Инщил) Мәтта 28 Bible Online

Мәтта 28 - Пәймана Ну (Инщил) bible

Мәтта 28

¹Пәй шәмийерʼа, рʼожа йәкшәме[127] сәре сьбәһе зу Мәрйәма Мәждәлани у Мәрйәма дьн һатьн кӧ тʼьрбе бьбиньн.

²Ньшкева әʼрд ԛайим һʼәжийа, чьмки мьлйакʼәтәки Хӧдан жь әʼзмен һатә хԝаре, кәвьр жь бәр тʼьрбе ԝеда кьр у сәр рʼуньшт.

³Диндара ԝи мина бьруске бу у кʼьнще ԝи мина бәрфе сьпи бун.

⁴Нобәдар жь тьрса ԝи тʼәвиһәв бун у бунә мина мьрийа.

⁵Мьлйакʼәт ԝан кʼӧлфәтарʼа гот: «Нәтьрсьн! Әз заньм һун ль Ԝи Исайи дьгәрʼьн, Йе кӧ һатә хачкьрьне.

⁶Әԝ нә ль вьр ә, чьмки Әԝ жь мьрьне рʼабуйә, чаԝа кӧ Әԝи готьбу. Ԝәрьн ԝи щийе кӧ Әԝ[128] пʼалдайи бу бьбиньн.

⁷Зу һәрʼьн бежьнә шагьртед Ԝи: ‹Әԝ жь мьрьне рʼабуйә у Әԝе бәри ԝә һәрʼә Щәлиле. Ль ԝьр һуне Ԝи бьбиньн›. Ва йә мьн ԝәрʼа гот».

⁸Әԝ бь хоф у әшԛәкә мәзьн ләз жь тʼьрбе дәркʼәтьн у ләзандьн кӧ шагьртарʼа бежьн.

⁹Ньшкева Иса рʼасти ԝан һат у гот: «Сьлав ль ԝә!» Әԝана незики Ԝи бун, хԝә авитьнә ньгед Ԝи гьртьн у сәре хԝә бәр данин.

¹⁰Һьнге Иса ԝанарʼа гот: «Нәтьрсьн! Һәрʼьн бежьнә бьред Мьн, кӧ әԝ һәрʼьнә Щәлиле у ль ԝьр ԝе Мьн бьбиньн».

¹¹Чахе кӧ кʼӧлфәт чун, һьнәк жь нобәдара һатьнә бажер у тьштед кӧ ԛәԝьмибун сәрәкед кʼаһинарʼа готьн.

¹²Сәрәкед кʼаһина тʼәви рʼуспийа щьвийан у шеԝьрин. Паше ԝана гәләк пʼәрә данә нобәдара

¹³у готьн: «Бежьн: ‹Чахе әм хәԝеда бун, шагьртед Ԝи һатьн Әԝ дьзин›.

¹⁴У һәгәр әв тьшт бьгьһижә гӧһе ԝәли, әме ԝи рʼази кьн у ԝә бехәм кьн».

¹⁵Ԝана жи пʼәрә һьлдан у ӧса кьрьн, чаԝа кӧ һатьбунә һинкьрьне. У әв готьн ль нав щьһуйада һʼәта рʼожа иро бәла буйә.

¹⁶Һәр йанздәһ шагьрт жи чунә Щәлиле ԝи чʼийайе кӧ Иса ԝанрʼа готьбу.

¹⁷Гава кӧ дитьн, сәре хԝә бәр Ԝи данин, ле һьнәк жи дӧдьли бун.

¹⁸Иса незики ԝан бу, ԝанрʼа хәбәр да у гот: «Һʼәму һʼӧкӧме әʼрд у әʼзмен Мьнрʼа һатә дайине.

¹⁹Ньһа һәрʼьн һʼәму мьләта һин кьн у ԝана бь наве Бав, Кӧрʼ у Рʼӧһʼе Пироз бьньхӧминьн

²⁰у ԝан һʼәму тʼәмийед кӧ Мьн данә ԝә мьләта һин кьн, ԝәки әԝ хԝәй кьн. Әз ва ирода һәр тʼьм һʼәта ахьрийа дьнйайе тʼәви ԝә мә!»