Read Пәймана Ну (Инщил) Мәтта 3 Bible Online

Мәтта 3 - Пәймана Ну (Инщил) bible

Мәтта 3

¹Ԝан рʼожада Йуһʼәннайе ньхӧмдар рʼабу нава бәрʼийа Щьһустане даннасин кьр

²у гот: «Жь гӧнәкьрьне вәгәрʼьн, чьмки Пʼадшатийа Әʼзмана незик буйә».

³Йуһʼәнна әԝ бу, бона кʼижани Ишайа пʼехәмбәр готьбу: «Дәнгәк бәрʼийеда дькә гази: ‹Рʼийа Хӧдан һазьр бькьн у шьвәрʼийед Ԝи рʼаст бькьн›»[10].

⁴Кʼьнще Йуһʼәнна жь пьрʼчʼа дәве бу у ԛайишәкә чʼәрм ль пьште бу. Хԝарьна ԝи жи кӧли у һьнгьве чоле бу.

⁵Һьнге щьмәʼта Оршәлиме у тʼәмамийа Щьһустане у һʼәму алийед чʼәме Урдӧне дьһатьнә щәм ԝи,

⁶гӧнед хԝә дьданә рʼуйе хԝә у жь ԝи чʼәме Урдӧнеда дьһатьнә ньхӧмандьне.

⁷Гава Йуһʼәнна дит кӧ жь ферьси у садуԛийа жи гәләк һатьнә ԝәки бенә ньхӧмандьне, әԝи готә ԝан: «Чʼежькед мәʼра! Кʼе ԝәрʼа гот, кӧ һун жь хәзәба те бьрʼәвьн?

⁸Дә бь кьред ԛәнщ бьдьнә кʼьфше, кӧ һун жь гӧнәкьрьне вәгәрʼийанә.

⁹У нав хԝәда нәфькьрьн нәбежьн: ‹Бьраһим баве мә йә›. Әз ԝәрʼа дьбежьм, кӧ Хԝәде жь ван кәвьра жи дькарә зарʼа Бьраһимрʼа дәрхә.

¹⁰Ва йә бьвьр ль сәр рʼаԝе даре йә. Һәр дара кӧ бәре ԛәнщ нәйнә, ԝе бе бьрʼине у авитьне нава егьр.

¹¹Әз ԝә бона гӧнәвәгәрʼандьне бь аве дьньхӧминьм, ле Йәки жь мьн ԛәԝаттьр ԝе бе. Әз нә һежа мә чарьхе Ԝи жи бьгьрьмә дәсте хԝә. Әԝе ԝә пе Рʼӧһʼе Пироз у егьр бьньхӧминә.

¹²Мәлһʼәба Ԝи дәсте Ԝида йә. Әԝе бедәра Хԝә паԛьж кә, гәньме Хԝә бькә әʼмбаре, ле кайе ԝе бь агьре кӧ натәмьрә бьшәԝьтинә».

¹³Һьнге Иса жь Щәлиле һатә Урдӧне, щәм Йуһʼәнна, кӧ жь ԝи бе ньхӧмандьне.

¹⁴Ле Йуһʼәнна бона ве йәке Ԝирʼа ԛайл нәдьбу у готә Ԝи: «Әз һʼәԝщә мә кӧ бь дәсте Тә бемә ньхӧмандьне у Тӧ тейи щәм мьн?»

¹⁵Иса ле вәгәрʼанд у готе: «Ньһа бьһелә, чьмки ль мә дькʼәвә кӧ әм һʼәму рʼастийе аһа биньнә сери». Паше Йуһʼәнна ԛайл бу.

¹⁶Һәма чаԝа Иса һатә ньхӧмандьне у жь аве дәркʼәт, ньшкева әʼзман вәбун у әԝи дит кӧ Рʼӧһʼе Хԝәде мина кәвоткәке һатә хԝаре у сәр Ԝи дани.

¹⁷У ва дәнгәк жь әʼзмана һат: «Әв ә Кӧрʼе Мьни дәлал, кӧ әз жь Ԝи рʼази мә».