Read Пәймана Ну (Инщил) Марԛос 1 Bible Online

Марԛос 1 - Пәймана Ну (Инщил) bible

Марԛос 1

¹Мьзгинийа Иса Мәсиһе Кӧрʼе Хԝәде бь ви тьһәри дәстпебу:

²Чаԝа кӧ кʼьтеба Ишайа Пʼехәмбәрда һатийә ньвисаре: «Ва йә Әзе ԛасьде Хԝә пешийа Тәва бьшиньм. Әԝе бона Тә рʼе һазьр кә»[1].

³«Дәнгәк бәрʼийеда дькә гази: ‹Рʼийа Хӧдан һазьр бькьн у шьвәрʼийед Ԝи рʼаст бькьн›[2]».

⁴Аԝа Йуһʼәнна бәрʼийеда хӧйа бу, щьмәʼт дьньхӧманд у даннасин дькьр, кӧ жь гӧнәкьрьне вәгәрʼьн у бенә ньхӧмандьне, ԝәки гӧнед ԝан бенә бахшандьне.

⁵Жь һʼәму ԝәлате Щьһустане у тʼәмамийа щьмәʼта Оршәлиме дьһатә щәм ԝи, гӧнед хԝә дьданә рʼуйе хԝә у чʼәме Урдӧнеда бь дәсте ԝи дьньхӧмин.

⁶Йуһʼәнна кʼьнщәкә жь пьрʼчʼа дәве ль хԝә кьрьбу у ль пьшта хԝә жи ԛайишәкә чʼәрм гьредабу. Хԝарьна ԝи кӧли у һьнгьве чоле бу.

⁷Әԝи даннасин дькьр у дьгот: «Йәки жь мьн ԛәԝаттьр ԝе бе. Әз нә һежа мә, кӧ та бьм у бәне чарьхе Ԝи жи вәкьм.

⁸Мьн һун бь аве ньхӧмандьн, ле Әԝе ԝә бь Рʼӧһʼе Пироз бьньхӧминә».

⁹У ԝан рʼожада Иса жь бажаре Ньсрәта Щәлиле һат у бь дәсте Йуһʼәнна чʼәме Урдӧнеда һатә ньхӧмандьне.

¹⁰Һәма чаԝа Иса жь аве дәркʼәт, дит кӧ әʼзман вәбун у Рʼӧһʼ мина кәвоткәке ль сәр Ԝи дани.

¹¹У дәнгәк жь әʼзмана һат у гот: «Тӧ Кӧрʼе Мьни дәлал и Әз жь Тә рʼази мә».

¹²Ԝе гаве Рʼӧһʼ бәре Иса да бәрʼийе.

¹³Әԝ чьл рʼожи ль бәрʼийе ма у жь мирещьн һатә щерʼьбандьне. Әԝ тʼәви рʼәʼԝьра бу у мьлйакʼәта жерʼа бәрдәсти кьрьн.

¹⁴Пәй гьртьна Йуһʼәннарʼа Иса чу ԛәза Щәлиле у дәст бь даннасинийа Мьзгинийа Хԝәде кьр

¹⁵у дьгот: «Ԝәхт перʼа гьһиштийә, Пʼадшатийа Хԝәде незик буйә, жь гӧнәкьрьне вәгәрʼьн у баԝәрийа хԝә Мьзгинийе биньн!»

¹⁶Гава Иса ль дәве гола Щәлиле дьгәрʼийа, рʼасти Шьмһʼун у Әндраԝьсе бьре ԝи һат. Ԝана тʼорʼ давитә голе, чьмки мәʼсигьр бун.

¹⁷Иса готә ԝан: «Пәй Мьн ԝәрьн, Әзе ԝә бькьмә нечʼирванед мәрьва».

¹⁸Ԝана жи һәма ԝе дәме тʼорʼед хԝә һьштьн у пәй Ԝи чун.

¹⁹Дәма кӧ Иса жь ԝи щийи һьнәки пешда чу, рʼасти кӧрʼед Зәбәди, Аԛуб у Йуһʼәннайе бьре ԝи һат. Ԝана ԛәйькеда тʼорʼед хԝә һивез дькьрьн.

²⁰Һьнге Иса гази ԝан кьр, ԝана жи баве хԝә Зәбәди тʼәви пʼала ԛәйькеда һьшт у пәй Ԝи чун.

²¹Әԝ гьһиштьнә Кәфәрнаһуме. Иса ԝе рʼожа шәмийе рʼаст кʼәтә кʼьниште у дәст бь һинкьрьне кьр.

²²Әԝана ль сәр һинкьрьна Ԝи зәндәгьрти мабун, чьмки Әԝи мина йәки хԝәйиһʼӧкӧм әԝ һин дькьрьн, нә кӧ мина ԛанунзана.

²³Һьнге кʼьништа ԝанда мәрьвәк һәбу, кӧ рʼӧһʼе һʼәрамва гьрти бу. Ԝи кьрә ԛирʼин у гот:

²⁴«Тӧ чь жь мә дьхԝази, йа Исайе Ньсрәте? Тӧ һатийи ԛьрʼа мә бини? Әз заньм Тӧ кʼи йи. Тӧ Пирозе Хԝәде йи!»

²⁵Иса ле һьлат у гот: «Кәрʼ бә у же дәркʼәвә!»

²⁶Һьнге рʼӧһʼе һʼәрам әԝ вәчʼьрʼьканд у бь дәнгәки бьльнд кьрә ԛирʼин у же дәркʼәт.

²⁷Һʼәму зәндәгьрти ман, һәврʼа кʼәтьнә пьрс-пьрсийара у дьготьн: «Әв чь йәк ә? Чь һинкьрьнәкә ну йә! Бь һʼӧкӧм Әԝ әʼмьри ль рʼӧһʼед һʼәрам дькә у әԝ жи ельми Ԝи дьбьн».

²⁸У нав у дәнге Иса перʼа-перʼа һʼәму дор-бәред Щәлиле бәла бу.

²⁹Гава кӧ Иса жь кʼьниште дәркʼәт, тʼәви Аԛуб у Йуһʼәнна рʼаст чунә мала Шьмһʼун у Әндраԝьс.

³⁰Хԝәсийа Шьмһʼун тʼайеда пʼалдайи бу. Һьнге бона ԝе Исарʼа готьн.

³¹Иса жи чу незик, дәсте ԝе гьрт рʼакьр у тʼайе же бәрʼда, рʼабу бәрдәсти ԝанрʼа кьр.

³²Еваре, гава рʼо чу ава, һʼәму нәхԝәш у йед щьнакʼәти анинә щәм Ԝи.

³³Тʼәмамийа щьмәʼта бажер ль бәр дери щьвийа.

³⁴Иса гәләк мәрьвед бь нәхԝәшийед щурʼә-щурʼә ԛәнщ кьрьн. Гәләк щьн жи дәрхьстьн у нәдьһьшт кӧ щьн хәбәр дьн, чьмки щьна заньбу кӧ Әԝ Кʼи йә.

³⁵Ԛәрәбәрбанга сьбәһе рʼабу, дәркʼәт чу щики хәԝлә у ԝьр дӧа кьр.

³⁶Шьмһʼун у йед тʼәви Ԝи ль Иса гәрʼийан

³⁷у гава кӧ ԝан Әԝ дит, готьне: «Һʼәму ль Тә дьгәрʼьн».

³⁸Иса ԝанрʼа гот: «Әм һәрʼьнә гӧнд-бажаред незик, ԝәки Әз ль ԝан дәра жи даннасин кьм, чьмки Әз бона ве йәке һатьмә».

³⁹У ль тʼәмамийа Щәлиле дьгәрʼийа, кʼьништед ԝанда даннасин дькьр у щьн дәрдьхьстьн.

⁴⁰У йәки кʼоти һат, ль бәр Иса чок да, рʼәща же кьр у готе: «Һәгәр Тӧ бьхԝази, дькари мьн паԛьж ки».

⁴¹Гӧне Иса пе һат, дәсте Хԝә дьреж кьр ле кʼәт у готе: «Әз дьхԝазьм. Паԛьж бә!»

⁴²У пәй ве готьнерʼа дәстхԝәда кʼотибун же чу у әԝ паԛьж бу.

⁴³Иса перʼа-перʼа әԝ дәрхьстә дәр, һʼьшк тʼәми ль ԝи кьр

⁴⁴у ԝирʼа гот: «Бьньһерʼә тʼӧ кәсирʼа тьштәки нәбежи, ле һәрʼә хԝә нишани кʼаһин кә у чаԝа кӧ Муса тʼәми дайә, һʼәдийа хԝә бьдә, ԝәки һʼәмуйарʼа бьбә шәʼдәти, кӧ тӧ паԛьж буйи».

⁴⁵Ле әԝ мәрьв дәркʼәт дәстпекьр ашкәрә гот у әва йәка бәла кьр, ӧса кӧ Иса иди нькарьбу ашкәрә бьчуйа бажарәки, ле жь бажер дәр ль щийед хәԝлә дьма. У щьмәʼт жь һәр алийава дьһатьнә щәм Ԝи.