Read Пәймана Ну (Инщил) Марԛос 13 Bible Online

Марԛос 13 - Пәймана Ну (Инщил) bible

Марԛос 13

¹Гава Иса жь пʼарьстгәһе дәркʼәт, жь шагьртед Ԝи йәки Ԝирʼа гот: «Дәрсдар! Һәла дина Хԝә бьде әв чь кәвьр ьн у чь авайи нә!»

²Иса ль ԝи вәгәрʼанд у готе: «Тӧ ван авайийед мәзьн дьбини? Әв һʼәмуйе жи ԝеран бьн, ль вьр кәвьре ль сәр кәвьр ԛәт нәминә!»

³Гава Иса ль чʼийайе Зәйтʼуне, ль пешбәри пʼарьстгәһе рʼуньштьбу, Пәтрус, Аԛуб, Йуһʼәнна у Әндраԝьс башԛә же пьрсин:

⁴«Бежә мә, әԝ тьшт ԝе кʼәнге бьԛәԝьмьн? У бәри ԛәԝьмандьна ԝан һʼәмуйа, чь нишане бьбьн?»

⁵Һьнге Иса дәстпекьр у ԝанрʼа гот: «Һаш жь хԝә һәбьн, кӧ тʼӧ кәс ԝә нәхапинә.

⁶Гәләк ԝе пе наве Мьн бен у бежьн: ‹Әз ьм Мәсиһ› у ԝе гәләка бьхальфиньн.

⁷Гава һун дәнге шәрʼа у бәʼса шәрʼа бьбьһен, һун хԝә ӧнда нәкьн. Гәрәке әв тьшт бьԛәԝьмьн, ле әԝ һе нә ахьри йә.

⁸Мьләте рʼабә сәр мьләт, пʼадшатийе рʼабә сәр пʼадшатийе, щи-щийа ԝе әʼрдһʼәж у хәлайи-щәлайе бьбьн. Ле әв һʼәму мина еша кʼӧлфәте йә, кӧ дәстпедькә пе дьгьрә.

⁹Ле һун һаш жь хԝә һәбьн! Ԝе ԝә бьбьнә бәр диԝана у кʼьништада ԝә бькʼӧтьн. Бона Мьн ԝе ԝә бәр ԝәли у пʼадша бьдьнә сәкьнандьне, ԝәки һун бәр ԝан шәʼдәтийе бьдьн.

¹⁰Гәрәке пешийе Мьзгини һʼәму мьләтарʼа бе дайине.

¹¹Гава кӧ ԝә бьгьрьн бьбьнә бәр диԝане, пешда хәм нәкьн кӧ һуне чь бежьн. Ле ԝе дәме чь ԝәрʼа бе дайине, ԝе жи бежьн, чьмки нә кӧ һуне хәбәр дьн, ле Рʼӧһʼе Пироз.

¹²Бьра ԝе бьре хԝә бьдә кӧштьне у бав кӧрʼе хԝә. Зарʼе рʼабьнә сәр де у баве хԝә у ԝан бьдьнә кӧштьне.

¹³У бона наве Мьн һуне бәр чʼәʼве һʼәмуйа рʼәш бьн. Ле әԝе кӧ һʼәта хьлазийе тәйах кә, әԝе хьлаз бә.

¹⁴Аԝа чахе һун ԝе ‹һʼәрамийа ԝеранкьрьне›[44] бьбиньн, ль ԝи щийе нәщайиз сәкьни», (әԝе кӧ дьхунә бьра фәʼм бькә) «һьнге әԝед кӧ Щьһустанеда нә бьра бьрʼәвьнә чʼийа.

¹⁵У әԝе кӧ сәр хани йә бьра жорда нәйе хԝаре у нәкʼәвә һьндӧрʼ, ԝәки тьштәки һьлдә.

¹⁶У әԝе кӧ кʼәԝшенда йә бьра вәнәгәрʼә кӧ пʼоте хԝә һьлдә.

¹⁷Ле ԝәй ль һʼәмла у дәстдәргуша ԝан рʼожада!

¹⁸Дӧа бькьн кӧ әв йәк зьвьстанеда нәԛәԝьмә.

¹⁹Чьмки ԝан рʼожада ԝе тәнгасикә ӧса бьбә, ԝәки жь рʼожа кӧ Хԝәде дьнйа әʼфьрандийә һʼәта ньһа нәбуйә у нә жи ԝе бьбә.

²⁰Һәгәр Хӧдан әԝ рʼож кьн нәкьрьна, тʼӧ кәс хьлаз нәдьбу, ле бона хатьре ԝан бьжартийед кӧ Ԝи бьжартьнә, әԝ рʼож кьн кьрьнә.

²¹Һьнге, һәгәр йәк ԝәрʼа бежә: ‹Мәсиһ ва йә ль вьр ә›, йан жи: ‹Ԝа йә дәра һан ә›, баԝәр нәкьн.

²²Чьмки мәсиһ у пʼехәмбәред дәрәԝ ԝе дәрен. Ԝе нишан у кʼәрәмәта бькьн, һәгәр дәст ԝанва бе, ԝе бьжартийа жи бьхальфиньн.

²³Ле һун һаш жь хԝә һәбьн! Мьн һәр тьшт пешда ԝәрʼа гот.

²⁴Ле ԝан рʼожада, пәй ԝе тәнгасийерʼа, ‹рʼуйе рʼойе ԝе бе гьртьне у һиве рʼонайа хԝә нәдә,

²⁵стәйрке жь әʼзмен бькʼәвьн, у тʼопед әʼзмана ԝе жь рʼийед хԝә дәрен[45]›[46].

²⁶У һьнге ԝе бьбиньн, Кӧрʼе Мерьв бь ԛәԝата мәзьн у рʼумәт әʼԝрава те[47].

²⁷Ԝи чахи Әԝе мьлйакʼәтед Хԝә бьшинә у бьжартийед Хԝә жь һәр чар ԛӧлба бәрәв кә, жь пʼәрʼед әʼрде гьрти һʼәта пʼәрʼед әʼзмен.

²⁸Жь дара һежире дәрсәке һин бьн: Чахе кӧ чʼьԛьлед ԝе тәрʼ дьбьн у бәлгед ԝе дьбьшкьвьн, иди һун заньн кӧ һавин незик ә.

²⁹Ӧса жи гава һун бьбиньн кӧ әв йәк дьԛәԝьмьн, бьзаньбьн кӧ Әԝ незик ә, ль бәр шемике йә.

³⁰Әз рʼаст ԝәрʼа дьбежьм, әва ньсьла дәрбаз набә, һʼәта кӧ әв һʼәму тьшт нәԛәԝьмьн.

³¹Әʼрд у әʼзмане дәрбаз бьн, ле готьнед Мьн тʼӧ щар дәрбаз набьн.

³²Ле бона ԝе рʼоже у ԝе сьһʼәте тʼӧ кәс ньзанә, нә мьлйакʼәтед әʼзмен у нә жи Кӧрʼ, ле тʼәне Бав.

³³Һаш жь хԝә һәбьн! Һʼьшйар бьминьн![48] Чьмки һун ньзаньн кʼәнге ԝәхте перʼа бьгьһижә.

³⁴Әв йәк мина мәрьвәки йә, кӧ мала хԝә дьһелә у дәрдькʼәвә рʼеԝитийе. Бәри чуйине тʼәмийа мала хԝә дьдә хӧламед хԝә, шьхӧле ԝан һәр кәси дьде у әʼмьри сәр дәргәһван дькә, кӧ һʼьшйар бьминә.

³⁵Бона ве йәке һʼьшйар бьминьн, чьмки һун ньзаньн малхе мале ԝе кʼәнге бе, еваре йан ниве шәве, йан ԝәхте бангдана дика, йан сәре сьбәһе.

³⁶Нәбә кӧ ньшкева Әԝ бе у ԝә хәԝеда бьгьрә.

³⁷Әз чь ԝәрʼа дьбежьм, һʼәмуйарʼа дьбежьм: Һʼьшйар бьминьн!»