Read Пәймана Ну (Инщил) Марԛос 14 Bible Online

Марԛос 14 - Пәймана Ну (Инщил) bible

Марԛос 14

¹Аԝа дӧ рʼож шунда ԝе Щәжьна Дәрбазбуне у Щәжьна Нане Шкәва бьбуйа. Сәрәкед кʼаһина у ԛанунзана мәщаләке дьгәрʼийан, кӧ чаԝа Иса дьзива бь фелбазийе бьгьрьн, бькӧжьн

²у дьготьн: «Бьра әв йәк щәжьнеда нибә, ԝәки щьмәʼт рʼанәбә сәр ньга».

³Гава Иса ль Бәйтанйайе мала Шьмһʼуне кʼотида, ль сәр сьфре рʼуньшти бу, кʼӧлфәтәк һат, дәрданәкә ԝейә алабастьрейи рʼуне нардейи сафи у гәләки бьһа һәбу. Ԝе әԝ шушә шкенанд у әԝ рʼун рʼетә сәр сәре Иса.

⁴Һьнәкә ԝьр һерс кʼәтьн у һәврʼа дьготьн: «Һʼәйфа ви рʼуни! Чьма әва зийана бу?

⁵Мә дькарьбу әв рʼуна сесьд зиви зедәтьр бьфьрота у бәлайи фәԛира кьра». Бь ви аԝайи әԝ кʼӧлфәта рʼәзил кьрьн.

⁶Ле Иса гот: «Жь ԝе кʼӧлфәте вәгәрʼьн! Чьма һун хатьре ԝе дькʼәвьн? Әԝе тьштәки ԛәнщ бона Мьн кьр.

⁷Фәԛире һәр гав тʼәви ԝә бьн. Кʼәнге һун бьхԝазьн, һун дькарьн ԛәнщийе ԝанрʼа бькьн. Ле Әзе һәр гав нав ԝәда нибьм.

⁸Чь жь дәсте ԝе дьһат әԝе кьр. Әԝе пешда бәдәна Мьн дәфьнкьрьнерʼа рʼун кьр.

⁹Әз рʼаст ԝәрʼа дьбежьм, дьнйайеда кʼидәре әва Мьзгинийа бе даннасинкьрьне, ԝе кьрьна ве кʼӧлфәте жи бона биранина ԝе бе готьне».

¹⁰Һьнге Щьһудайе Исхәрйоти, йәки жь һәр донздәһа, чу щәм сәрәкед кʼаһина, ԝәки Иса бьдә дәсте ԝан.

¹¹Ԝан жи гава әв йәк бьһист, ша бун у пʼәрә ԝирʼа соз дан. У Щьһуда жь һьнгева мәщаләке дьгәрʼийа кӧ чаԝа Иса бьдә дәсте ԝан.

¹²Рʼожа пешьнә Щәжьна Нане Шкәвада кӧ бәрхе ԛӧрбана Щәжьна Дәрбазбуне дьһатә сәржекьрьне, шагьрта жь Иса пьрси: «Тӧ ль кʼӧ дьхԝази Шива Щәжьна Дәрбазбуне бьхԝи, ԝәки әм һәрʼьн тәрʼа һазьр кьн?»

¹³Иса дӧ шагьртед Хԝә шандьн у ԝанрʼа гот: «Һәрʼьнә бажер. Мәрьвәке рʼасти ԝә бе, щерʼе аве ль сәр мьла. Пәй ԝи һәрʼьнә ԝе мала кӧ әԝ дьче

¹⁴у бежьнә хԝәйе мале: ‹Дәрсдар дьбежә: Кʼане әԝ ода мевана, йа кӧ Әзе теда тʼәви шагьртед Хԝә шива Щәжьна Дәрбазбуне бьхԝьм?›

¹⁵Һьнге әԝе ль ԛате жорьн одәкә мәзьнә һәвдайи у һазьр нишани ԝә кә, ль ԝе дәре шиве бона мә һазьр кьн».

¹⁶Шагьрта да сәр рʼе чунә бажер у чаԝа кӧ ԝанарʼа готьбу ӧса жи дитьн у шива Щәжьна Дәрбазбуне һазьр кьрьн.

¹⁷Гава рʼо чу ава, Иса тʼәви һәр донздәһа чу ԝе дәре.

¹⁸Чахе ль сәр сьфре рʼуньштьн у нане хԝә дьхԝарьн, Иса гот: «Әз рʼаст ԝәрʼа дьбежьм, йәки жь ԝә ԝе нәмамийа Мьн бькә, йе кӧ тʼәви Мьн нен дьхԝә».

¹⁹Әԝ бәр хԝә кʼәтьн у дәстпекьрьн йәк-йәк жь Ԝи пьрсин: «Дьбә кӧ әз ьм?»

²⁰Әԝи ԝанрʼа гот: «Әԝ йәк нава ԝә һәр донздәһада йә, йе кӧ пәʼрийе хԝә тʼәви Мьн тʼаседа дькә.

²¹Рʼаст Кӧрʼе Мерьв ԝе ӧса һәрʼә чаԝа кӧ бона Ԝи һатийә ньвисаре. Ле ԝәй ль ԝи мәрьве кӧ нәмамийа Кӧрʼе Мерьв бькә! Ԝирʼа һе ԛәнщ бу кӧ әԝ ԛәт дьне нәкʼәта».

²²Гава ԝана һе нан дьхԝар, Иса нан һьлда шькьри да, кәркьр да шагьрта у гот: «Һан һьлдьн! Әва бәдәна Мьн ә».

²³Пәйрʼа кʼас һьлда шькьри да у да ԝан. Һʼәмуйа жи жь ԝе вәхԝар.

²⁴У ԝанрʼа гот: «Әва хуна Мьн ә бона пәймане[49], кӧ бона гәләка те рʼетьне.

²⁵Әз рʼаст ԝәрʼа дьбежьм, иди Әз жь вьр шунда тʼӧ щар жь мәйа тьрийе вәнахԝьм, һʼәта ԝе рʼожа кӧ Әзе Пʼадшатийа Хԝәдеда жь йа ну вәхԝьм».

²⁶Паше ԝана зәбурәк стьра, дәркʼәтьн чунә чʼийайе Зәйтʼуне.

²⁷У Иса ԝанрʼа гот: «Һун һʼәмуйе жи жь Мьн пʼьшк бьн һәрʼьн, чьмки ньвисар ә: ‹Әзе ль шьвен хьм у пәзе жи бәла-бәлайи бә›[50].

²⁸Ле гава кӧ Әз жь мьрьне рʼабьм, Әзе бәри ԝә һәрʼьмә Щәлиле».

²⁹Пәтрус жерʼа гот: «Һәгәр һʼәму жи жь Тә пʼьшк бьн һәрʼьн, ле әз на».

³⁰Иса ԝирʼа гот: «Әз рʼаст тәрʼа дьбежьм, һәма ишәв һе бәри кӧ дик дӧ щара банг дә, те се щара Мьн инкʼар ки».

³¹Ле Пәтрус сәр йа хԝә дьма у дьгот: «Һәгәр щи бе, әзе тʼәви Тә бьмьрьм жи, ле тʼӧ щар Тә инкʼар накьм!» Һʼәмуйа жи аһа дьгот.

³²Пәй ԝе йәкерʼа әԝ чунә ԝи щийе кӧ жерʼа Гетшәмани дьбежьн у Әԝи шагьртед Хԝәрʼа гот: «Вьра рʼунен, һʼәта кӧ Әз дӧа бькьм».

³³Ԝи Пәтрус, Аԛуб у Йуһʼәнна тʼәви Хԝә бьрьн у дәстпекьр кʼәсәр кʼьшанд у Хԝәда шәԝьти.

³⁴Ԝи ԝанрʼа гот: «Дьле Мьн һаԛас дәрд у кʼәдәр ә, мина бәр мьрьне. Вьра бьминьн у һʼьшйар бьн».

³⁵Һьнәки пешда чу, Хԝә дәвәрʼу авитә әʼрде у дӧа кьр, кӧ һәгәр мәщал һәбә, әва сьһʼәта сәр Ԝирʼа дәрбаз бә.

³⁶У гот: «Абба, Баво! Һәр мәщал жь дәсте Тә те. Әве кʼасе жь Мьн дур хә. Ле бьра хԝәстьна Мьн нибә, ле йа Тә бә».

³⁷Паше һатә щәм шагьрта, әԝ рʼазайи дитьн у готә Пәтрус: «Шьмһʼун, тӧ рʼазайи? Тә нькарьбу кӧ сьһʼәтәке тӧ һʼьшйар бьмайи?

³⁸Һʼьшйар бьминьн у дӧа бькьн, ԝәки һун нәкʼәвьнә нава щерʼьбандьне. Бәле рʼӧһʼ рʼази йә, ле бәдән сьст ә».

³⁹Диса чу дӧа кьр, хут әԝ хәбәр готьн.

⁴⁰У һат диса әԝ хәԝеда дитьн, чьмки чʼәʼвед ԝан жь хәԝе вәнәдьбун. У ньзаньбун чь щаба Ԝи бьдана.

⁴¹Щара сьсийа жи һат у ԝанрʼа гот: «Һун һәла һе рʼазайи нә у рʼьһʼәт дьбьн? Бәс ә! Ԝәхт перʼа гьһишт. Ва йә Кӧрʼе Мерьв дькʼәвә дәсте гӧнәкʼара.

⁴²Рʼабьн әм һәрʼьн. Ва йә әԝе кӧ нәмамийа Мьн дькә незик бу».

⁴³Һәма һьнге гава Ԝи һе хәбәр дьда, Щьһудайе кӧ йәк жь һәр донздәһа бу, һат. Әԝи тʼәви хԝә жь алийе сәрәкед кʼаһина, ԛанунзана у рʼуспийада әʼлаләтәкә гьран анибу, бь дара у шура.

⁴⁴Аԝа нәмаме Ԝи әʼшәрәт дабу ԝан у готьбу: «Әз кʼижани кӧ рʼамусьм, Әԝ ә, Ԝи бьгьрьн у бь фәсал бьбьн».

⁴⁵Һәма һьнге жи Щьһуда һатә щәм Иса у гот: «Дәрсдар![51]» у рʼамуса.

⁴⁶Ԝана дәст авитә Иса у Әԝ гьртьн.

⁴⁷Ле йәки жь йед кӧ тʼәви Ԝи сәкьни бун, шуре хԝә кʼьшанд ль хӧламе сәрәккʼаһин хьст у гӧһе ԝи пәканд.

⁴⁸Һьнге Иса ԝанрʼа гот: «Те бежи ԝә сәр ԛачахәкида гьртийә, кӧ һун бь дара у шура һатьнә Мьн бьгьрьн?

⁴⁹Нә Әз һәр рʼож тʼәви ԝә пʼарьстгәһеда бум Мьн һун һин дькьрьн, ле ԝә Әз нәдьгьртьм. Ле бона кӧ ньвисар бенә сери, әв йәк ԛәԝьми».

⁵⁰Һьнге һʼәму шагьрта Әԝ һьшт у рʼәвин.

⁵¹Хортәк пәй Ԝи дьчу, пʼарчʼәки кʼьтане ль бәдәна ԝийә тәʼзи пʼечʼайи бу. Әʼлаләте әԝ гьрт,

⁵²ле ԝи әԝ кʼьтан һьшт у рʼут-тәʼзи жь дәсте ԝан рʼәви.

⁵³Иса бьрьнә щәм сәрәккʼаһин. Һʼәму сәрәкед кʼаһина, рʼуспи у ԛанунзан ԝьр щьвийан.

⁵⁴Пәтрус дурва пʼе-пʼе пәй Ԝи чу, һʼәта кʼәтә һʼәԝша сәрәккʼаһин. Ԝьр тʼәви нобәдара ль бәр егьр рʼуньшт у хԝә гәрм дькьр.

⁵⁵Сәрәкед кʼаһина у тʼәмамийа щьвина гьрәгьра жи ль шәʼдәтикә мьԛабьли Иса дьгәрʼийан, ԝәки Ԝи бькӧжьн, ле нә дьдитьн.

⁵⁶Гәләка мьԛабьли Ԝи шәʼдәтийа дәрәԝ дьда, ле шәʼдәтийа ԝан һәвдӧ нәдьгьрт.

⁵⁷Һьнге һьнәк рʼабун у мьԛабьли Ԝи шәʼдәтийа дәрәԝ дан у готьн:

⁵⁸«Мә бьһист кӧ Ви мәрьви гот: ‹Әзе ве пʼарьстгәһа кӧ бь дәста һатийә чекьрьне һьлшиньм у се рʼожада пʼарьстгәһәкә дьнә бе дәстлекʼәтьн чекьм›».

⁵⁹Ле шәʼдәтийа ԝан жи һәвдӧ нәдьгьрт.

⁶⁰Һьнге сәрәккʼаһин рʼабу нава ԝанда сәкьни у жь Иса пьрси: «Бона ван шәʼдәтийа кӧ әвана мьԛабьли Тә дьдьн Тӧ чьма щабәке нади?»

⁶¹Ле Әԝи дәнге Хԝә нәкьр у тʼӧ щаб нәда. Сәрәккʼаһин диса жь Ԝи пьрси у готе: «Тӧ йи Мәсиһ, Кӧрʼе Йе һежайи шькьрийе?»

⁶²Иса готе: «Әз ьм. У һуне Кӧрʼе Мерьв ль кʼеләка Йе Һәри Зор, ль мьле ԝийи рʼасте рʼуньшти у ль сәр әʼԝред әʼзмен те бьбиньн»[52].

⁶³Һьнге сәрәккʼаһин кʼьнщед хԝә ԛәлаштьн у гот: «Иди шәʼдә чи мәрʼа нә?

⁶⁴Ԝә бьһист Әԝи чаԝа Хԝәде беһӧрмәт кьр! Ԝәва чаԝа хӧйа дьбә?» Һʼәмуйа жи Әԝ нәһәԛ кьрьн готьн, кӧ Әԝ йе кӧштьне йә.

⁶⁵Һьнге һьнәка дәстпекьр тʼуйи Ԝи кьрьн, рʼуйе Ԝи ньхамтьн, данә бәр кʼӧлма у жерʼа готьн: «Дә пʼехәмбәртийе бькә!» Нобәдара жи Әԝ бьр у данә бәр шәмаԛа.

⁶⁶Гава Пәтрус ль жере һʼәԝшеда бу, жь щарийед сәрәккʼаһин йәк һатә ԝьр.

⁶⁷Әԝе кӧ дит Пәтрус хԝә ль бәр егьр гәрм дькә, ль ԝи ньһерʼи у гот: «Тӧ жи тʼәви әԝи ньсрәти буйи, тʼәви Иса».

⁶⁸Ле әԝи инкʼар кьр у гот: «Әз ньзаньм у фәʼм накьм кӧ тӧ чь дьбежи». Әԝ жь һʼәԝше дәркʼәт чу сьвдәра ль бәр дәргәһ, дик банг да.

⁶⁹Гава кӧ щарийе әԝ ль ԝе дәре дит, диса готә йед дор-бәра сәкьни бун: «Әва жи йәки жь ԝан ә».

⁷⁰Ле әԝи диса инкʼар кьр. У хеләке шунда, йед кӧ ԝьр сәкьни бун, диса Пәтрусрʼа готьн: «Һәбә-тʼӧнәбә тӧ жи жь ԝан и, чьмки тӧ жь Щәлиле йи у хәбәрдана тә жи тә дьфьрошә[53]».

⁷¹Ле Пәтрус дәст бь ньфьрʼа кьр, сонд хԝар у гот: «Әз Ԝи мәрьви нас накьм, бона кʼижани һун дьбежьн».

⁷²Перʼа-перʼа дик щара дӧда банг да. У Пәтрус әԝ готьна Иса кӧ ԝирʼа готьбу ани бира хԝә: «Бәри кӧ дик дӧ щара банг дә, те се щара Мьн инкʼар ки». Ль сәр ве йәке дәстпекьр гьрийа.