Read Пәймана Ну (Инщил) Марԛос 9 Bible Online

Марԛос 9 - Пәймана Ну (Инщил) bible

Марԛос 9

¹У Әԝи ԝанрʼа гот: «Әз рʼаст ԝәрʼа дьбежьм, кӧ һьнәкед ль вьр сәкьни һәнә ԝе мьрьне нәбиньн, һʼәта кӧ нәбиньн Пʼадшатийа Хԝәде бь ԛәԝат те».

²Пәй шәш рʼожарʼа Иса тʼәви Хԝә Пәтрус, Аԛуб у Йуһʼәнна һьлдан у рʼакьрьнә чʼийаки бьльнд, ль ԝьр әԝ тʼәне бун. Һьнге рʼәнге Ԝи ль бәр чʼәʼве ԝан һатә гӧһастьне.

³Кʼьнщед Ԝи ӧса чил-ԛәрԛаш бун у һаԛаси бьрьԛин, кӧ ль сәр рʼуйе әʼрде тʼӧ тьштәки кʼьнщсьпикьрьне нькарьбу әԝ һаԛаси сьпи бькьра.

⁴Һьнге Елйас у Муса ԝанва хӧйа бун у тʼәви Иса хәбәр дан.

⁵Пәтрус Исарʼа гот: «Дәрсдар, чаԝа рʼьнд ә кӧ әм вьр ьн! Дә әме се һʼолька чекьн, йәке Тәрʼа, йәке Мусарʼа у йәке жи Елйасрʼа».

⁶Әԝ ӧса тьрсийа бун, кӧ Пәтрус ньзаньбу чь бежә.

⁷Ԝе гаве әʼԝрәк дәркʼәт ль сәр ԝан кьрә си у дәнгәк жь әʼԝр һат: «Әв ә Кӧрʼе Мьни дәлал! Гӧһдарийа Ԝи бькьн!»

⁸Ньшкева шагьрта ль дора хԝә ньһерʼи, пештьри Иса кәсәк нәдитьн.

⁹Чахе жь чʼийе дьһатьнә хԝаре, Иса тʼәми ль ԝан кьр гот: «Чь кӧ ԝә дит тʼӧ кәсирʼа нәбежьн, һʼәта кӧ Кӧрʼе Мерьв жь мьрьне рʼанәбә».

¹⁰Шагьрта әв тʼәми хԝәй кьр у жь һәвдӧ пьрсин, кʼа мәʼна ве рʼабуна жь мьрьне чь йә.

¹¹У ԝана же пьрси: «Гәло чьма ԛанунзан дьбежьн пешийе гәрәке Елйас бе?»[17]

¹²Әԝи жи ԝанрʼа гот: «Рʼаст ә, пешийе Елйасе бе у һәр тьшти ԝе диса бинә щи. Ле чьма һатийә ньвисаре, кӧ Кӧрʼе Мерьв ԝе гәләки щәфе бькʼьшинә у бе беһӧрмәткьрьне?

¹³Ле Әз ԝәрʼа дьбежьм, Елйас һатийә жи у чаԝа кӧ бона ԝи һатьбу ньвисаре, ӧса жи сәре ԝи кьрьн, чаԝа кӧ дьле ԝан хԝәст».

¹⁴Гава вәгәрʼийанә щәм шагьртед дьн, дитьн ль дора ԝан әʼлаләтәкә гьран гьртийә у ԛанунзан жи ԝанрʼа кʼәтьбунә дәʼԝе.

¹⁵Һьнге тʼәмамийа әʼлаләте кӧ Иса дит, гәләки әʼщебмайи ма, бәрбь Ԝи бәзин у сьлав дане.

¹⁶Иса жь шагьрта пьрси: «Һун бона чь ԝанрʼа кʼәтьнә дәʼԝе?»

¹⁷Жь нав әʼлаләте мәрьвәки ле вәгәрʼанд у гот: «Дәрсдар! Мьн кӧрʼе хԝәйи рʼӧһʼе лалва гьрти ани щәм Тә.

¹⁸Кʼидәре кӧ пе дьгьрә ԝи әʼрде дьхә, кʼәф дев дькʼәвә, дьран ле дькьнә чʼьркә-чʼьрк у рʼәԛ дьбә. Мьн һиви жь шагьртед Тә кьр, кӧ ви рʼӧһʼи дәрхьн, ле нькарьбун».

¹⁹Иса ль ԝан вәгәрʼанд у гот: «Һәй ньсьле нәбаԝәр! Һʼәта кʼәнге Әзе тʼәви ԝә бьм? Һʼәта кʼәнге Әзе ль ԝә сәбьр кьм? Ԝи биньнә щәм Мьн».

²⁰Ԝана кӧрʼьк анинә щәм Иса. Гава кӧ рʼӧһʼе һʼәрам Иса дит, перʼа-перʼа кӧрʼьк вәчʼьрʼьканд. Әԝ кʼәтә әʼрде, кʼәф дев кʼәт у пʼьрпьти.

²¹Иса жь баве ԝи пьрси: «Жь кʼәнгева әв йәка тʼәви ԝи дьԛәԝьмә?» Әԝи гот: «Жь зарʼотийеда.

²²У ви рʼӧһʼи гәләк щара әва авитийә нава егьр у аве, кӧ ԝи бькӧжә. Ле һәгәр жь дәсте Тә те, тьштәки бькә бьра гӧне Тә ль мә бе, аликʼарийа мә бькә!»

²³Иса ԝирʼа гот: «Тә гот чь? ‹Һәгәр жь дәсте тә те?› Бона йе баԝәр дькә һәр тьшт дьбә».

²⁴Ԝе гаве баве кӧрʼьк кьрә ԛирʼин у гот: «Әз баԝәр дькьм. Аликʼарийа нәбаԝәрийа мьн бькә!»

²⁵Гава Иса дит кӧ әʼлаләт дьбәзә, тʼопи сәр Ԝи дьбә, ль рʼӧһʼе һʼәрам һьлат у гот: «Һәй рʼӧһʼе кәрʼ у лал, Әз әʼмьри сәр тә дькьм: Жь кӧрʼьк дәркʼәвә у щарәкә дьн нәкʼәви нава ԝи!»

²⁶Рʼӧһʼ кьрә ԛирʼин, кӧрʼьк ԛайим вәчʼьрʼьканд же дәркʼәт. У кӧрʼьк бу мина мьрийа, ӧса кӧ гәләка дьгот: «Әԝ мьр!»

²⁷Ле Иса дәсте ԝи гьрт, әԝ рʼакьр. Кӧрʼьк жи рʼабу сәкьни.

²⁸Чахе Иса кʼәтә мале, шагьртед Ԝи башԛә же пьрсин: «Мә чьма нькарьбу әԝ щьн дәрхьста?»

²⁹Иса ль ԝан вәгәрʼанд у гот: «Щьне ви щурʼәйи бь тʼӧ тьшти дәрнайе, пештьри бь дӧа[18]».

³⁰Жь ԝьр чун у нав Щәлилерʼа дәрбаз бун. Иса нәдьхԝәст кӧ кәс ве йәке бьһʼәсә,

³¹чьмки Әԝи шагьртед Хԝә һин дькьр у ԝанрʼа дьгот: «Кӧрʼе Мерьв ԝе бькʼәвә дәсте мәрьва, әԝе Ԝи бькӧжьн, ле пәй кӧштьнерʼа рʼожа сьсийа ԝе рʼабә».

³²Ле ԝана әв готьн фәʼм нәдькьр, дьтьрсийан жи кӧ жь Ԝи бьпьрсьн.

³³У әԝ һатьнә Кәфәрнаһуме. Гава Иса малда бу, жь шагьрта пьрси: «Һун рʼеда бона чь һәврʼа кʼәтьбунә дәʼԝе?»

³⁴Ԝана дәнге хԝә нәкьр, чьмки рʼеда нав һәвда хәбәр дабун, кʼа жь ԝан кʼи йә йе һәри мәзьн.

³⁵Иса рʼуньшт, гази һәр донздәһа кьр у ԝанрʼа гот: «Һәгәр йәк дьхԝазә бьбә йе пеш, гәрәке әԝ бьбә йе һәри паш у хӧламе һʼәмуйа».

³⁶У дәсте зарʼокәке гьрт, нав ԝанда да сәкьнандьне, паше әԝ зарʼок да һʼәмеза Хԝә у ԝанрʼа гот:

³⁷«Кʼи зарʼокәкә аһа бь наве Мьн ԛәбул кә, әԝ Мьн ԛәбул дькә. У кʼи кӧ Мьн ԛәбул кә, әԝ нә кӧ Мьн, ле Йе кӧ Әз шандьмә ԛәбул дькә».

³⁸Йуһʼәнна Исарʼа гот: «Дәрсдар! Мә мәрьвәк дит кӧ бь наве Тә щьн дәрдьхьстьн, ле мә кьр кӧ әм нәһельн, чьмки әԝ пәй мә найе».

³⁹Ле Иса гот: «Пешийе ль ԝи нәгьрьн. Кәсәк тʼӧнә кӧ бь наве Мьн кʼәрәмәтәке бькә у перʼа-перʼа бькарьбә һьндава Мьнда хьраб хәбәр дә.

⁴⁰Чьмки әԝе кӧ нә мьԛабьли мә йә, әԝ пьшта мә йә.

⁴¹Әз рʼаст ԝәрʼа дьбежьм, әԝе кӧ тʼасә ав бьдә ԝә бона хатьре ԝе йәке, кӧ һун пʼара Мәсиһ ьн, әԝе һәԛе хԝә ԛәт ӧнда нәкә.

⁴²Кʼи кӧ жь ван бьчʼука йәки, йе кӧ баԝәрийа хԝә Мьн тинә жь рʼе дәрхә, ԝирʼа һе ԛәнщ ә, кӧ бәрашәк стуйе ԝива бе гьредане у бе авитьне нава бәʼре.

⁴³Һәгәр дәсте тә, тә жь рʼе дәрдьхә, ԝи жекә! Бона тә һе ԛәнщ ә, кӧ тӧ ԛоп бькʼәви жийине, нә кӧ дӧ дәстед тә һәбьн у һәрʼи щәʼньме, нава агьре кӧ ԛәт натәмьрә.[19]

⁴⁴

⁴⁵Һәгәр ньге тә, тә жь рʼе дәрдьхә, ԝи жекә! Бона тә һе ԛәнщ ә, кӧ тӧ бе ньг бькʼәви жийине, нә кӧ дӧ ньгед тә һәбьн у бейи авитьне щәʼньме.

⁴⁶

⁴⁷Һәгәр чʼәʼве тә, тә жь рʼе дәрдьхә, ԝи дәрхә! Бона тә һе ԛәнщ ә, кӧ тӧ бь чʼәʼвәки бькʼәви Пʼадшатийа Хԝәде, нә кӧ дӧ чʼәʼве тә һәбьн у бейи авитьне щәʼньме.

⁴⁸Ԝе дәре ‹әԝе жь кӧрме нәмьри бенә котьне у агьре жи нәтәмьрә›[20].

⁴⁹Чьмки һәр мәрьвәке бь егьр бе хԝекьрьне[21].

⁵⁰Хԝе тьштәки ԛәнщ ә. Ле һәгәр хԝе шорʼайийа хԝә ӧнда кә, һуне чаԝа диса шорʼайийа ԝе биньнә щи? Бьра тәʼма хԝе нава ԝәда бә у бь һәврʼа әʼдьлайийеда бьжин».