Read Пәймана Ну (Инщил) Луԛа 1 Bible Online

Луԛа 1 - Пәймана Ну (Инщил) bible

Луԛа 1

¹Тʼейофилойе хԝәйиԛәдьр, ньһа гәләка дәстпекьрийә сәрһатийа ԝан тьштед нава мәда буйи ӧса рʼез кьн,

²чаԝа әԝед кӧ пешийе бь чʼәʼве хԝә дитьбун у әв Мьзгини бәла дькьрьн, мәрʼа готьн.

³Әз жи чаԝа йәки һе зува рʼаст пәй ԝан һʼәму тьшта дьчум, мьн рʼе терʼа дит кӧ бь һур-гьли тәрʼа бьньвисьм,

⁴ԝәки тӧ рʼастийа ԝан тьштед кӧ һин буйи, бьзаньби.

⁵Чахе Һеродәс пʼадшайе Щьһустане бу, кʼаһинәк жь бәрәка Әбийа һәбу, наве ԝи Зәкәрийа бу. Жьна ԝи жи жь әʼсьле Һарун бу, наве ԝе Елизабет.

⁶Әвана һәр дӧ жи ль бәр Хԝәде рʼаст бун у нав һʼәму тʼәми у ԛанунед Хӧданда беԛӧсур дьчун.

⁷Ле зарʼед ԝан тʼӧнәбун, чьмки Елизабете зарʼ нәданин у һәр дӧйа жи әʼмьре хԝә дәрбаз кьрьбун.

⁸Аԝа чахе Зәкәрийа дора бәрәка хԝәда хьзмәткʼарийа кʼаһинтийе ль бәр Хԝәде дькьр,

⁹бь әʼдәте кʼаһинтийеда пʼәшк ԝирʼа кʼәт, кӧ һәрʼә пʼарьстгәһа Хӧдан, бьхуре бьшәԝьтинә.

¹⁰У дәма шәԝьтандьна бьхуре, тʼәмамийа щьмәʼте дәрва дӧа дькьр.

¹¹Һьнге мьлйакʼәте Хӧдан ԝива хӧйа бу у алийе рʼастева кʼеләка горигәһа бьхуре сәкьни.

¹²Чахе Зәкәрийа дит, тʼәвиһәв бу у саԝ кʼәтә сәр ԝи.

¹³Ле мьлйакʼәт ԝирʼа гот: «Зәкәрийа, нәтьрсә! Дӧа тә һатә бьһистьне, кʼӧлфәта тә Елизабете тәрʼа кӧрʼәки бинә у те наве ԝи Йуһʼәнна дайни.

¹⁴Әԝе тәрʼа бьбә әшԛ у шайи у гәләке бь буйина ԝи ша бьн.

¹⁵Чьмки әԝе ль бәр Хӧдан мәзьн бә. Тʼӧ щар гәрәке шәрав-араԛе вәнәхԝә[1]. У һе зьке дийа хԝәда, ԝе бь Рʼӧһʼе Пироз тʼьжи бә.

¹⁶Ԝе жь зарʼед Исраеле гәләка бәрбь Хӧдан Хԝәдейе ԝан вәгәрʼинә.

¹⁷Әԝе бь рʼӧһʼ у ԛәԝата Елйас пʼехәмбәр пешийа Хӧданва һәрʼә[2], ԝе дьле бава сәр зарʼада у нәельма бәрбь фәʼмдарийа рʼаста вәгәрʼинә, ԝәки щьмәʼтәке бона Хӧдан һазьр кә».

¹⁸Зәкәрийа мьлйакʼәтрʼа гот: «Әзе ве йәке чаԝа бьзаньбьм? Әз кал ьм у кʼӧлфәта мьн жи әʼмьре хԝә иди дәрбаз кьрийә»[3].

¹⁹Мьлйакʼәт ле вәгәрʼанд у готе: «Әз Щьбрайил ьм, кӧ ль бәр Хԝәде дьсәкьньм. У әз һатьмә шандьне, кӧ тәрʼа бежьм у ве мьзгинийе бьдьмә тә[4].

²⁰Ва те лал би у нькарьби хәбәр ди, һʼәта ԝе рʼожа кӧ әв тьшт бенә сери, чьмки тә әԝ готьнед мьн баԝәр нәкьрьн, кӧ ԝе ԝәхте хԝәда бенә сери».

²¹Һʼәта һьнге щьмәʼт һивийа Зәкәрийа бу у әʼщебмайи дьман, кӧ әԝ пʼарьстгәһеда дәрәнги дькʼәт.

²²У чахе әԝ дәркʼәтә дәрва, иди нькарьбу ԝанарʼа хәбәр да. Ԝана шьк бьр, кӧ пʼарьстгәһеда тьшт һатийә ль бәр чʼәʼва. У әԝи бь нишана ԝанарʼа хәбәр дьда у лал ма.

²³Гава рʼожед хьзмәткьрьна ԝи хьлаз бун, чу мала хԝә.

²⁴Пәй ԝан рʼожарʼа, кʼӧлфәта ԝи, Елизабет һʼәмлә дәркʼәт, пенщ мәһа әԝе хԝә вәдьшарт у дьгот:

²⁵«Әв чь йәк бу ван рʼожада Хӧдан бона мьн кьр, һʼале мьнда ньһерʼи у ԛара мьн жь нав мәрьва да һьлдане».

²⁶Мәһа шәшада Хԝәде мьлйакʼәт Щьбрайил шандә бажарәки Щәлиле кӧ наве ԝи Ньсрәт бу,

²⁷щәм ԛизәкә бькʼьр, йа кӧ мәрьвәки бь наве Усьве мала Даԝьдрʼа нишанкьри бу. Наве ԛизьке Мәрйәм бу.

²⁸Мьлйакʼәт ԝева хӧйа бу у готе: «Сьлав ль тә ԛизька кʼәрәм ле буйийе, Хӧдан тʼәви тә йә[5]».

²⁹Әԝа сәр готьна ԝи тʼәвиһәв бу у фькьри: «Гәло әв чь сьлав ә?»

³⁰У мьлйакʼәт жерʼа гот: «Мәрйәм, нәтьрсә! Чьмки тә кʼәрәм жь Хԝәде станд.

³¹Ва те һʼәмлә дәрейи Кӧрʼәки бини у наве Ԝи Иса дайни.

³²Әԝе мәзьн бә у Кӧрʼе Йе Һәри Жорьн ԝе бе готьне. У Хӧдан Хԝәде ԝе тʼәхте баве Ԝи Даԝьд бьдә Ԝи.

³³Әԝе һʼәта-һʼәтайе пʼадшатийе сәр мала Аԛуб бькә у хьлазийа Пʼадшатийа Ԝи ԝе тʼӧнәбә».

³⁴Мәрйәме мьлйакʼәтрʼа гот: «Әв йәке чаԝа бьбә, чьмки әз һәла һе ԛиз ьм?»

³⁵Мьлйакʼәт ле вәгәрʼанд у гот: «Рʼӧһʼе Пироз ԝе бе сәр тә у ԛәԝата Йе Һәри Жорьн ԝе сәр тә бькә си. Бона ве йәке әԝ Пирозе кӧ ԝе жь тә бьбә, әԝ Кӧрʼе Хԝәде ԝе бе готьне.

³⁶Ва йә омьда тә Елизабет жи, йа кӧ безӧрʼәт дьһатә готьне, ԝе мәзьнайийа хԝәда әва мәһа шәша йә кӧрʼәкида һʼәмлә йә.

³⁷Чьмки щәм Хԝәде тьштәки нәбуйине тʼӧнә».

³⁸Ԝи чахи Мәрйәме гот: «Әз щарийа Хӧдан ьм. Бьра анәгори готьна тә бона мьн бьбә». У мьлйакʼәт жь щәм ԝе чу.

³⁹Ԝан рʼожада Мәрйәм рʼабу ләз чу алийе чʼийа, бажарәки Щьһуда.

⁴⁰Әԝ кʼәтә мала Зәкәрийа у сьлав да Елизабете.

⁴¹Гава Елизабете сьлава Мәрйәме бьһист, зарʼок зьке ԝеда львийа. Елизабет Рʼӧһʼе Пирозва тʼьжи бу

⁴²у бь дәнгәки бьльнд кьрә гази гот: «Тӧ нав кʼӧлфәтада бьмбарәк и у бәре зьке тәда жи бьмбарәк ә.

⁴³Әв чь бәхтәԝарик ә кӧ дийа Хӧдане мьн сәр мьнда һат?

⁴⁴Гава дәнге сьлава тә кʼәтә гӧһе мьн, зарʼок зьке мьнда жь шабуна лист.

⁴⁵Хԝәзи ль ԝе, кӧ готьна Хӧдан баԝәр дькә, кӧ чь жерʼа һатийә готьне, ԝе бе сери».

⁴⁶Мәрйәме гот[6]: «Нәфса мьн пәсьне Хӧдан дьдә

⁴⁷у рʼӧһʼе мьн бь Хԝәде Хьлазкьре мьн ша дьбә,

⁴⁸чьмки Әԝи бәре Хԝә мьлуктийа щарийа Хԝәда кьр. Ва жь вьр шунда һʼәму ньсьле хԝәзийа хԝә ль мьн биньн,

⁴⁹чьмки Хԝәдейе Зор бона мьн тьштед пʼьрʼ мәзьн кьрьн. Наве Ԝи пироз ә.

⁵⁰Рʼәʼма Ԝи ԛьрʼнә-ԛьрʼнә ль сәр ԝан ә, йед кӧ жь Ԝи дьтьрсьн.

⁵¹Ԛәԝата дәсте Хԝә Әԝи да кʼьфше у йед кӧ дьле хԝәда кʼӧбар-бабах ьн бәла-бәлайи кьрьн.

⁵²Йед ԛәԝат жь кʼӧрсийа анин хԝаре у йед мьлук бьльнд кьрьн[7].

⁵³Йед бьрʼчи бь тьштед ԛәнщ тʼер кьрьн у йед дәԝләти дәствала вәрʼекьрьн.

⁵⁴Рʼәʼма Хԝә ани бира Хԝә, али хӧламе Хԝә, Исраел кьр,

⁵⁵чаԝа кал-бавед мә, Бьраһим у зӧрʼәта ԝирʼа бона һʼәта-һʼәтайе созе Хԝә дабу»[8].

⁵⁶Мәрйәм ԝәкә се мәһа щәм Елизабете ма, паше вәгәрʼийа мала хԝә.

⁵⁷Аԝа дәма ԝәльдандьна Елизабете перʼа гьһишт, кӧрʼәк жерʼа бу.

⁵⁸Һәвал-һогьред ԝе бьһистьн кӧ Хӧдан рʼәʼма хԝәйә мәзьн бона ԝе кьрийә, тʼәви ԝе ша дьбун.

⁵⁹Рʼожа һʼәйштада һатьн кӧ кӧрʼьк сьнәт кьн у наве баве ԝи Зәкәрийа ле кьн.

⁶⁰Ле дийа ԝи гот: «На, наве ԝи гәрәке Йуһʼәнна бә».

⁶¹Ԝерʼа готьн: «Нава мәрьвед тәда бь ԝи нави кәсәк тʼӧнә».

⁶²Һьнге ԝана бь нишана жь баве ԝи пьрсин кӧ чь нави дьхԝазә ԝи кә.

⁶³Әԝи жи тʼәхтәк хԝәст у ль сәр ньвиси: «Наве ԝи Йуһʼәнна йә». Һʼәму әʼщебмайи ман.

⁶⁴Дәстхԝәда зар-зьмане ԝи вәбу, хәбәр да, шькьри да Хԝәде.

⁶⁵Тьрсе һʼәму щинаред ԝан гьрт у тʼәмамийа чʼийайед Щьһустанеда бона ве йәке дьһатә готьне.

⁶⁶Һʼәмуйед кӧ дьбьһистьн, бира хԝәда хԝәй дькьрьн, дьготьн: «Гәло әв кӧрʼьке бьбә чь?» Чьмки дәсте Хӧдан перʼа бу.

⁶⁷Баве ԝи Зәкәрийа бь Рʼӧһʼе Пироз тʼьжи бу, пʼехәмбәрти кьр у гот:

⁶⁸«Шькьр жь Хӧдан Хԝәдейе Исраелерʼа кӧ сәрик да щьмәʼта Хԝә у азайи жерʼа ани[9].

⁶⁹Жь мала хӧламе Хԝә Даԝьд бона мә Хьлазкьрәки зор[10] рʼакьр,

⁷⁰чаԝа Әԝи һе бәреда бь дәве пʼехәмбәред Хԝәйә пироз готийә,

⁷¹кӧ әм жь дьжмьнед хԝә у дәсте һʼәму хернәхԝаза хьлаз бьн[11],

⁷²рʼәʼме кал-бавед мә бькә, пәймана Хԝәйә пироз

⁷³у ԝе сонда кӧ баве мә Бьраһимрʼа хԝар бир бинә[12],

⁷⁴ԝәки жь дәсте дьжмьна азабуйи, әм бькарьбьн бе тьрс у хоф,

⁷⁵һʼәму рʼожед әʼмьре хԝәда, рʼаст у һʼәлал Ԝи бьһʼәбиньн.

⁷⁶Тӧ, ло кӧрʼько, те пʼехәмбәре Йе Һәри Жорьн бейи готьне, те пешийа Хӧданва һәрʼи, ԝәки рʼийа Ԝи һазьр ки[13]

⁷⁷у занәбуна азайийе бьди щьмәʼта Ԝи бь бахшандьна гӧнед ԝан.

⁷⁸Жь рʼәʼм у һʼӧба Хԝәдейе мә чаԝа жорда рʼо кӧ дәрте, ӧса ԝе сәрики бьдә мә,

⁷⁹ԝәки йед кӧ тәʼристанийе у бьн сийа мьрьнеда дьминьн рʼонайи кә у ньгед мә дайнә сәр рʼийа әʼдьлайийе»[14].

⁸⁰Кӧрʼьк мәзьн дьбу у бь рʼӧһʼ ԛәԝат дьгьрт у һʼәта рʼожа Исраелева хӧйа бу жи ль бәрʼийе дьма.