Read Пәймана Ну (Инщил) Луԛа 11 Bible Online

Луԛа 11 - Пәймана Ну (Инщил) bible

Луԛа 11

¹Щарәке Иса щики дӧа дькьр, гава хьлаз кьр, жь шагьртед Ԝи йәки жерʼа гот: «Хӧдан, мә һини дӧакьрьне кә, чаԝа Йуһʼәнна шагьртед хԝә һин кьрьн».

²Әԝи ԝанарʼа гот: «Гава һун дӧа дькьн, аһа бежьн: Баво[56], Наве Тә пироз бә. Пʼадшатийа Тә бе[57].

³Нане мәйи рʼоже рʼож бь рʼож бьдә мә.

⁴У гӧнед мә бьбахшинә, чьмки әм жи дьбахшиньнә һʼәму дәйндаред хԝә у мә нәбә щерʼьбандьне[58]».

⁵У ԝанарʼа гот: «Жь ԝә кʼижан ә кӧ достәки ԝи һәбә у ниве шәве һәрʼә мала ԝи жерʼа бежә: ‹Досто, се нана дәйни бьдә мьн.

⁶Чьмки пьсмамәки мьн жь рʼе дагәрʼийайә һатийә мала мьн, тьштәки мьни хԝарьне тʼӧнә, кӧ дайньмә бәр ԝи›.

⁷У әԝ жи һьндӧрʼда ле вәгәрʼинә у бежә: ‹Дәри иди дада йә, әз у зарʼед хԝәва жи нава щи-ньвинада нә, зәʼмәте нәдә мьн, әз нькарьм рʼабьм бьдьмә тә›.

⁸Әз ԝәрʼа дьбежьм, һәгәр әԝ бона достийе жи рʼанәбә нен нәдә ԝи, ле бона беарзийа ԝи ԝе рʼабә чьԛас жерʼа лазьм бә бьдә ԝи.

⁹Әз ԝәрʼа дьбежьм, бьхԝазьн һуне бьстиньн, бьгәрʼьн һуне бьбиньн, дәри хьн ԝе бәр ԝә вәбә.

¹⁰Чьмки кʼи кӧ дьхԝазә дьстинә, кʼи кӧ дьгәрʼә дьбинә у кʼи кӧ дәри дьхә бәр ԝи вәдьбә.

¹¹Жь ԝә кʼижан ә әԝ бав, кӧ кӧрʼе ԝи мәʼси бьхԝазә, дәԝса мәʼси мәʼр бьде[59],

¹²йан жи һеке бьхԝазә, дупʼьшке бьде?

¹³Һун кӧ хьраб ьн, заньн тьштед ԛәнщ бьдьнә зарʼед хԝә, ле Баве әʼзмана ԝе чьԛас зедә Рʼӧһʼе Пироз бьдә әԝед кӧ жь Ԝи дьхԝазьн».

¹⁴Щарәке Иса щьне лал жь йәки дәрдьхьст, чахе кӧ щьн дәркʼәт, әԝи лал хәбәр да у әʼлаләт зәндәгьрти ма.

¹⁵Ле жь ԝан һьнәка гот: «Әԝ бь һʼӧкӧме Бәлзәбуле сәрԝере щьна щьна дәрдьхә».

¹⁶Һьнәка жи Әԝ дьщерʼьбанд, нишанед әʼзмен жь Ԝи дьхԝәстьн.

¹⁷Ле нетед дьле ԝан Исава әʼйан бун у ԝанарʼа гот: «Һәр пʼадшатийа кӧ нава ԝеда тʼьфаԛ тʼӧнәбә ԝе ԝеран бә у мала кӧ бетʼьфаԛи бькʼәве, әԝ мал наминә.

¹⁸Һун дьбежьн, кӧ Әз бь һʼӧкӧме Бәлзәбул щьна дәрдьхьм. Ле һәгәр мирещьн нава хԝәда бетʼьфаԛ бә, пʼадшатийа ԝи ԝе чаԝа бьминә?

¹⁹У һәгәр Әз бь Бәлзәбул щьна дәрдьхьм, ле йед кӧ пәй ԝә тен[60] бь чь дәрдьхьн? Һәгәр ӧса бә, әԝе ԝә ломәкʼар кьн.

²⁰Ле һәгәр Әз бь тʼьлийа Хԝәде щьна дәрдьхьм, ԝәки ӧса йә Пʼадшатийа Хԝәде гьһиштийә ԝә.

²¹Чахе йәки ԛәԝат бь чʼәк хԝәйитийе мала хԝә дькә, тʼӧ тьште ԝи зьрар ле набә.

²²Ле гава йәки жь ԝи ԛәԝаттьр бе у ԝи бьгьрә, ԝе әԝ чʼәке кӧ ԝи гӧмана хԝә дабу сәр же бьстинә, һәбука ԝи жи бәла кә.

²³Кʼи кӧ нә тʼәви Мьн ә, мьԛабьли Мьн ә у кʼи кӧ тʼәви Мьн тʼоп накә, бәла дькә.

²⁴Чахе рʼӧһʼе һʼәрам жь мерьв дәрте, щийе бе ав дьгәрʼә, кӧ рʼьһʼәтийе бьбинә у гава набинә, дьбежә: ‹Әз вәгәрʼьмә ԝе мала хԝәйә кӧ же дәркʼәтьмә›.

²⁵У гава те, паԛьжкьри у һәвдайи дьбинә.

²⁶Һьнге дьчә һʼәфт щьнед дьнә жь хԝә хьрабтьр жи тинә, дькʼәвьнә ԝьр дьжин. У ахьрийа ԝи мәрьви жь пешийе хьрабтьр дьбә».

²⁷Чахе Иса һе хәбәр дьда, жь нава әʼлаләте кʼӧлфәтәке дәнге хԝә бьльнд кьр у Ԝирʼа гот: «Хԝәзи ль ԝи бәтʼьни, кӧ Тӧ хԝәда хԝәйкьри у ԝан бьстана, кӧ шир данә Тә».

²⁸Ле Әԝи гот: «Һе хԝәзи ль ԝан, йед кӧ хәбәра Хԝәде дьбьһен у пек тиньн».

²⁹Чахе әʼлаләт сәр Ԝи дьщьвийа, Иса дәстпекьр у гот: «Әва ньсьла хьраб ә, нишанәке дьхԝазә, ле жерʼа нишанәкә дьн найе дайине пештьри нишана Уньс пʼехәмбәр.

³⁰Чаԝа Уньс бона Нинәԝайа бу нишан, ӧса жи Кӧрʼе Мерьв ԝе ви ньсьлирʼа бьбә нишан[61].

³¹Пʼадша Башуре ԝе Рʼожа Ахрәте тʼәви мәрьвед ви ньсьли рʼабә у ԝан нәһәԛ кә, чьмки әԝа жь сәре дьне һат, кӧ сәрԝахтийа Сьлеман бьбьһе у ва йә Йәки жь Сьлеман мәстьр ль вьр һәйә[62].

³²Мәрьвед Нинәԝайе Рʼожа Ахрәте ԝе тʼәви ви ньсьли рʼабьн у ԝан нәһәԛ кьн, чьмки әԝана бь даннасинийа Уньс жь гӧнәкьрьне вәгәрʼийан. Ва йә Йәки жь Уньс мәстьр ль вьр һәйә.

³³Кәсәк чʼьре венахә у данайнә щийе хәԝлә, нә жи дькә бьне фьраԛе, ле датинә сәр пʼечʼьре, ԝәки әԝе кӧ дькʼәвьнә һьндӧрʼ, рʼонайе бьбиньн.

³⁴Чʼьра бәдәна тә чʼәʼве тә йә. Һәгәр чʼәʼве тә пʼак ә, тʼәмамийа бәдәна тәйе рʼонайи бә. Ле һәгәр чʼәʼве тә хьраб ә, бәдәна тәйе жи тәʼри бә.

³⁵Аԝа һаш жь хԝә һәбә, дьбә кӧ әԝ рʼонайа нава тәда тәʼри йә.

³⁶Һәгәр тʼәмамийа бәдәна тә рʼонайи йә у пʼарәкә тәʼри тʼӧнә, һʼәмуйе жи рʼонайи бә, чаԝа чʼьра бь шәԝԛа хԝә тә рʼонайи дькә».

³⁷Гава хәбәрдана Хԝә хьлаз кьр, йәки ферьси һиви же кьр кӧ һәрʼә тʼәви ԝи нан бьхԝә. Әԝ жи чу, ль сәр сьфре рʼуньшт.

³⁸Гава ферьси дит кӧ Әԝи пешийа нанхԝарьне ль гора әʼдәте дин дәстед Хԝә нәшуштьн, зәндәгьрти ма.

³⁹Ле Хӧдан ԝирʼа гот: «Аԝа һун ферьсийа тʼас у финщана рʼуйе дәрвава паԛьж дькьн, ле дьле ԝә һьндӧрʼва бь тьмайе у хьрабийава тʼьжи йә.

⁴⁰Бефәʼмно! Әԝе кӧ дәрва чекьр, һьндӧрʼ ченәкьр?

⁴¹Аԝа бь чьва тʼас у финщанед ԝә тʼьжи нә, бь ԝан хԝәрʼа хера бькьн у һәр тьште ԝәрʼа һʼәлал бә.

⁴²Ле ԝәй ль ԝә ферьсийа! Һун дәһәке пунге, щәʼтʼрийе у һʼәму пʼьнщарʼа дьдьн, ле һәԛийе у һʼьзкьрьна Хԝәде давежьнә пьшт гӧһе хԝә. Ԝә гәрәке әв йәк бькьрана у дәст жь йед майин нәкʼьшанда.

⁴³Ԝәй ль ԝә ферьсийа, кӧ һун кʼьништада кʼӧрсийед пешьн һʼьз дькьн, базарада жи сьлава.

⁴⁴Ԝәй ль ԝә! Һун мина тʼьрбед бе нав-нишан ьн, кӧ мәрьв сәр ԝан дьгәрʼьн у ньзаньн».

⁴⁵Жь ԛанунзана йәки ле вәгәрʼанд у гот: «Дәрсдар, Тӧ бь ван хәбәра мә жи беһӧрмәт дьки».

⁴⁶Әԝи гот: «Ԝәй ль ԝә ԛанунзана жи, чьмки һун баред гьран дьдьнә сәр мьле мәрьва, ле тʼьликә хԝә жи надьнә ԝан бара.

⁴⁷Ԝәй ль ԝә, кӧ һун тʼьрбед ԝан пʼехәмбәра чедькьн, йед кӧ кал-бавед ԝә әԝ кӧштьнә.

⁴⁸Бь ԝе йәке һун шәʼдәтийа хԝә дьдьн, кӧ һун һавьжийа хԝә кьрьнед кал-бавед хԝә тиньн. Әԝана пʼехәмбәр дькӧштьн у һун тʼьрбед ԝан чедькьн.

⁴⁹Ләма жи сәрԝахтийа Хԝәде гот: ‹Әзе пʼехәмбәр у шандийа бьшиньмә щәм ԝан, жь ԝан һьнәка ԝе бькӧжьн, һьнәка жи бьзериньн›.

⁵⁰Бона ве йәке хуна һʼәму пʼехәмбәра, кӧ жь ԝәхте әʼфьрандьна дьнйайеда һатийә рʼетьне, жь ви ньсьли ԝе бе хԝәстьне,

⁵¹жь хуна Һабил һʼәта хуна Зәкәрийа, йа кӧ нав горигәһе у пʼарьстгәһеда һатә рʼетьне. Әз рʼаст ԝәрʼа дьбежьм, жь ви ньсьли ԝе бе хԝәстьне.

⁵²Ԝәй ль ԝә ԛанунзана, кӧ ԝә кʼьлита занәбуне һьлдайә. Нә һун кʼәтьне у нә жи ԝә һьштийә йед кӧ дьхԝазьн бькʼәвьне».

⁵³У гава Әԝ рʼабу кӧ һәрʼә, ԛанунзан у ферьси ԛьлԛьлин, бона гәләк тьшта Ԝирʼа кʼәтьнә дәʼԝе.

⁵⁴У бәр дәве Ԝи сәкьни бун, ԝәки бь хәбәрәке бькарьбьн Ԝи бьгьрьн у гӧнәкʼар кьн.