Read Пәймана Ну (Инщил) Луԛа 12 Bible Online

Луԛа 12 - Пәймана Ну (Инщил) bible

Луԛа 12

¹Ԝи чахи, гава бь һʼәзара мәри щьвийан, ӧса кӧ сәр һәврʼа дәрбаз дьбун, Әԝи пешийе дәстпекьр шагьртед Хԝәрʼа гот: «Һʼәвза хԝә жь һәвиртьрʼшке ферьсийа бькьн, Әз тиньмә сәр дӧрʼутийа ԝан.

²Тьштәки дьзива тʼӧнә кӧ дәрнәйе у нә жи вәшарти кӧ кʼьфш нәбә.

³Ԝә чь тәʼрийеда готийә, әԝе рʼонайеда бе бьһистьне у ԝә чь ль мале гӧһада хәбәр дайә, әԝе сәр бана бьбә дәнги.

⁴Әз ԝә пьсмамед Хԝәрʼа дьбежьм, жь ԝана нәтьрсьн, йед кӧ бәдәне дькӧжьн, жь ԝе пештьр тьштәки дьн нькарьн бькьн.

⁵Ле Әзе ԝәрʼа бежьм, кӧ һун жь кʼе бьтьрсьн. Жь Ԝи бьтьрсьн, Йе кӧ пәй кӧштьнерʼа жи һʼӧкӧме Ԝи һәйә бавежә щәʼньме. Бәле, Әз ԝәрʼа дьбежьм жь Ԝи бьтьрсьн!

⁶Нә пенщ чʼьвик бь дӧ дьравед чарԛӧрʼуше тенә фьротане? Ле Хԝәде жь ԝан йәки жи бир накә.

⁷Ӧса жи һәр тʼеләки пʼорʼед сәре ԝә жьмарти йә. Нәтьрсьн, һун жь гәләк чʼьвика ԛимәттьр ьн.

⁸Әз ԝәрʼа дьбежьм, кʼи кӧ бәр мәрьва Мьн иԛрар кә, Кӧрʼе Мерьв жи ԝе ԝи бәр мьлйакʼәтед Хԝәде иԛрар кә.

⁹У кʼи кӧ Мьн бәр мәрьва инкʼар кә, әԝе жи бәр мьлйакʼәтед Хԝәде бе инкʼаркьрьне.

¹⁰У кʼи кӧ тьштәки мьԛабьли Кӧрʼе Мерьв бежә, ԝе бе бахшандьне. Ле кʼи кӧ готьнәкә хьраб мьԛабьли Рʼӧһʼе Пироз бежә, ль ԝи найе бахшандьне.

¹¹У гава ԝә бьбьнә кʼьништа йан бәр һʼакьм йан сәрԝеред һʼӧкӧмәте, һун хәм нәкьн кӧ һуне чаԝа щаба хԝә бьдьн йан чь бежьн.

¹²Чьмки Рʼӧһʼе Пироз әԝе дәме ԝе ԝә һин кә, чь лазьм ә кӧ һун бежьн».

¹³Жь нава әʼлаләте йәки Ԝирʼа гот: «Дәрсдар, бежә бьре мьн, бьра миратʼа баве мьн мьнрʼа пʼарәвәкә».

¹⁴Әԝи ԝирʼа гот: «Һәвал, кʼе Әз сәр ԝә һʼакьм йан жи пʼаркьр кʼьфш кьрьмә?»

¹⁵У готә ԝан: «Һаш жь хԝә һәбьн у һʼәвза хԝә жь һәр щурʼә тьмайе бькьн, чьмки әʼмьре инсен зедәбуна һәбука ԝива гьредайи нинә».

¹⁶Әԝи мәсәләк жи ԝанрʼа гот: «Зәвийа мәрьвәки дәԝләти гәләк бәр да.

¹⁷У әԝи дьле хԝәда гот: ‹Әз чаԝа бькьм? Щи жи тʼӧнә кӧ дәрәмәта хԝә текьме›.

¹⁸У гот: ‹Әзе аһа бькьм, әʼмбаред хԝә һьлшиньм у һе йед мәзьн чекьм, һʼәму дәрәмәт у һәбука хԝә жи бькьмә ԝьр.

¹⁹У хԝәха хԝәрʼа бежьм: Әʼвдо! Тә бона хԝә тʼера гәләк сала, гәләк һәбук дайә сәр һәв, рʼуне бьхԝә, вәхԝә у ша бә›.

²⁰Ле Хԝәде готә ԝи: ‹Бефәʼмо! Ишәв рʼӧһʼе тәйе жь тә бе стандьне. Әв һәбука тә бәрәв кьрийә ԝе кʼерʼа бьминә?›

²¹Ӧса жи ԝе бе сәре һәр кәси, йе кӧ бона хԝә хьзне тʼоп дькә у пе Хԝәде дәԝләти набә».

²²Һьнге Әԝи шагьртед Хԝәрʼа гот: «Ләма Әз ԝәрʼа дьбежьм, бона әʼмьре хԝә хәма нәкьн, кӧ һуне чь бьхԝьн, нә жи бона бәдәна хԝә, кӧ һуне чь ль хԝә кьн.

²³Чьмки әʼмьр жь хԝарьне ԛимәттьр ә у бәдән жи жь кʼьнща.

²⁴Дина хԝә бьдьнә ԛарʼԛарʼа, нә дьрʼәшиньн, нә дьдьрун у нә жи әʼмбар йан кʼиләред ԝан һәнә, ле Хԝәде рʼьсԛе ԝан дьгьһинә. Һун чьԛаси жь тәйрәда ԛимәттьр ьн!

²⁵Иди жь ԝә кʼи дькарә бь хәмед хԝә дәԛәке сәр әʼмьре хԝәда зедә кә[63]?

²⁶Һәгәр һун ԝи тьште һәри бьчʼук нькарьн бькьн, иди чьма бона тьштед майин хәм дькьн?

²⁷Дина хԝә бьдьнә сосьна, чаԝа шин дьбьн, нә дьхәбьтьн у нә дьрʼесьн. Әз ԝәрʼа дьбежьм, кӧ Сьлеман жи нава тʼәмамийа ԝе хер-хьзна хԝәда мина жь ԝан йәке хԝә нәкьр.

²⁸Һәгәр гиһайе чоле, кӧ иро һәйә у сьбе давежьнә нава егьр, Хԝәде ӧса дьхәмьлинә, ле чьԛас зедә ԝе ль ԝә кә, кембаԝәрно?

²⁹Ль ван тьшта нәгәрʼьн, кӧ һуне чь бьхԝьн йан чь вәхԝьн. Бәр хԝә нәкʼәвьн.

³⁰Чьмки пʼутпʼарьстед дьнйайе ль пәй ԝан һʼәму тьшта дькʼәвьн, ле Баве ԝә занә кӧ һун һʼәԝще ԝан тьшта нә.

³¹Ле бәр ԝева һун ль Пʼадшатийа Ԝи бьгәрʼьн у әԝе ԝәрʼа бенә дайине.

³²Нәтьрсә, кәрийе пези бьчʼук! Чьмки ль Баве ԝә хԝәш һат, кӧ пʼадшатийе бьдә ԝә.

³³Һәбука хԝә бьфьрошьн у хԝәрʼа хера бькьн. Хԝәрʼа кʼиське кӧ нарʼьзә у хьзна әʼзманайә кӧ кем набә ԛазьнщ кьн. Ль ԝе дәре нә дьзе незик бе у нә жи ԝе бьзузе бьхԝә.

³⁴Чьмки хьзна ԝә кʼидәре бә, дьле ԝәйе жи ль ԝе дәре бә.

³⁵Бьра пьшта ԝә гьредайи у чʼьред ԝә вехьсти бьн.

³⁶Һун мина ԝан мәрьва бьн, йед кӧ һивийа ахайе хԝә нә, кӧ әԝе кʼәнге жь дәʼԝате вәгәрʼә, кӧ чахе бе дери хә, перʼа-перʼа рʼабьн дери вәкьн.

³⁷Хԝәзи ль ԝан хӧлама, кӧ чахе ахайе ԝан бе, ԝан һʼьшйар бьбинә. Әз рʼаст ԝәрʼа дьбежьм, әԝе пьшта хԝә гьредә, ԝан сәр сьфре бьдә рʼуньштандьне у бәрдәстийе ԝанрʼа бькә.

³⁸У һәгәр ахайе ԝан ниве шәве йан жи бәрбанга сьбәһе бе у ԝан ӧса бьбинә, әԝ хӧламана хԝәзьли нә.

³⁹Ле һун ве йәке бьзаньбьн, һәгәр хԝәйе мале бьзаньбуйа кӧ дьзе кʼижан сьһʼәте бьһата, ԝе нәһьшта кӧ мала ԝи дәрәвәкьра.

⁴⁰Аԝа һун жи һазьр бьн, чьмки әԝ сьһʼәта кӧ дьле ԝәрʼа дәрбаз набә, Кӧрʼе Мерьв ԝе бе».

⁴¹Пәтрус гот: «Хӧдан, әва мәсәла тә тʼәне бона мә гот йан бона һʼәмуйа?»

⁴²Хӧдан гот: «Кʼи йә әԝ ԝәкʼилхәрще амьн у сәрԝахт, кӧ ахайе ԝи, ԝе ԝи сәр хӧламед хԝә сәрԝер кʼьфш кә, кӧ ԝәхтда хԝарьна ԝан бьдә ԝан.

⁴³Хԝәзи ль ԝи хӧлами, кӧ чахе ахайе ԝи бе, әԝи ӧса бьбинә.

⁴⁴Әз рʼаст ԝәрʼа дьбежьм, әԝе ԝи бькә сәрԝере тʼәмамийа һәбука хԝә.

⁴⁵Ле һәгәр әԝ хӧлам дьле хԝәда бежә: ‹Ахайе мьн һатьна хԝә дәрәнги дехә› у дәстпекә ль хӧлам у щарийа хә, бьхԝә, вәхԝә у сәрхԝәш бә,

⁴⁶ахайе ԝи хӧлами ԝе рʼожәкә ӧса бе, кӧ әԝ нә һивийе йә у сьһʼәтәкә ӧса, кӧ әԝ ньзанә. Ԝе ԝи ԛәт-ԛәти кә у пʼара ԝи тʼәви пʼара беамьна кә.

⁴⁷У әԝ хӧламе кӧ хԝәстьна ахайе хԝә занә у кʼаре хԝә накә, нә жи ль гора хԝәстьна ԝи дькә, ԝе гәләки бе кʼӧтане.

⁴⁸Ле әԝе кӧ жь нәзанийа хԝә тьштәки һежайи кʼӧтане дькә, ԝе һьндьки бе кʼӧтане. Кʼерʼа гәләк һатийә дайине, гәләк жи ԝе же бе хԝәстьне у кʼерʼа гәләк һатийә спартьне, щабдарийа ԝи жи ԝе гәләк бә.

⁴⁹Әз һатьм, ԝәки егьр бавежьмә сәр дьне у Мьн чаԝа дьхԝәст ԝәки иди алав бьда.

⁵⁰Ле ньхӧмандьнәкә Мьн һәйә, кӧ Әз гәрәке пе бемә ньхӧмандьне у дьле Мьн ԛәт нә рʼьһʼәт ә һʼәта кӧ әԝ бе сери.

⁵¹Ԝә тʼьре Әз һатьм әʼдьлайийе бьдьмә дьне? Әз ԝәрʼа дьбежьм на, ле бона щӧдәбуне.

⁵²Жь вьр шунда маләкеда пенщ мәрьве жь һәв щӧдә бьн, сьсе ԝе мьԛабьли дӧда бьн, дӧдӧ мьԛабьли сьсийа.

⁵³Баве рʼабә мьԛабьли кӧрʼ, кӧрʼ жи баве, де ԛизе, ԛиз жи де, хԝәси буке у бук жи хԝәсийе».

⁵⁴У Әԝи әʼлаләтерʼа жи гот: «Чахе жь рʼоавайе әʼԝр дәрте, һун дәстхԝәда дьбежьн: ‹Баране бьбарә› у ӧса жи дьбә.

⁵⁵У гава байе башуре те, һун дьбежьн: ‹Һәԝайе гәрм бә› у ӧса дьбә.

⁵⁶Дӧрʼуно! Һун рʼуйе әʼзмен әʼнәнә дькьн һәԝайе чаԝа бә, ле чаԝа ви зәмани әʼнәнә накьн?

⁵⁷Һун чьма хԝәха надьнә ль бәр һʼәсаба, кӧ кʼижан ә рʼаст?

⁵⁸Чахе нәйаре тә тә кʼаши щәм һʼакьм дькә, ӧса бькә, кӧ рʼева тʼәви ԝи ль һәв бейи. Нәбә әԝ тә бьдә дәсте һʼакьм, һʼакьм жи тә бьдә дәсте сәрәскәр у әԝ жи тә бавежә кәле.

⁵⁹Әз тәрʼа дьбежьм, тӧ жь ԝьр тʼӧ щар дәрнакʼәви һʼәта поле пашьн нәди».