Read Пәймана Ну (Инщил) Луԛа 20 Bible Online

Луԛа 20 - Пәймана Ну (Инщил) bible

Луԛа 20

¹У рʼожәкә жь ԝан рʼожада, гава Әԝи пʼарьстгәһеда хәлԛ һин дькьр у Мьзгини дьда, сәрәкед кʼаһина у ԛанунзан тʼәви рʼуспийа һатьнә щәм Ԝи

²у готьн: «Бежә мә, Тӧ бь чь һʼӧкӧми ван кьра дьки? Кʼе әв һʼӧкӧм дайә Тә?»

³Әԝи ль ԝан вәгәрʼанд у гот: «Әз жи тьштәки жь ԝә бьпьрсьм у һун Мьнрʼа бежьн:

⁴Һʼӧкӧме ньхӧмандьна Йуһʼәнна жь әʼзмен бу йан жь мәрьва?»

⁵Әԝана нав һәвда шеԝьрин у готьн: «Һәгәр әм бежьн: ‹Жь әʼзмен бу›, Әԝе бежә: ‹Ле ԝә чьма әԝ баԝәр нәкьр?›

⁶Ле һәгәр әм бежьн: ‹Жь мәрьва бу›, тʼәмамийа щьмәʼте ԝе мә бьдә бәр кәвьра, чьмки әԝ әʼсәйи баԝәр дькьн, кӧ Йуһʼәнна пʼехәмбәр бу».

⁷Ԝана щаба Ԝи да у готьн: «Әм ньзаньн жь кʼӧ бу».

⁸Иса ԝанрʼа гот: «Әз жи ԝәрʼа набежьм, кӧ бь чь һʼӧкӧми ван кьра дькьм».

⁹У Иса дәстпекьр әв мәсәлә щьмәʼтерʼа гот: «Мәрьвәки рʼәзе тьрийа дани у әԝ бь кʼьре да рʼәзвана, ԝәхтәки дьреж чу ԝәлатәки дьн.

¹⁰У ԝәхтда хӧламәк шандә щәм рʼәзвана, ԝәки жь ԝи рʼәзи бәре пʼара ԝи ԝирʼа бьшиньн, ле рʼәзвана хӧламе ԝи кʼӧта у дәствала вәрʼекьрьн.

¹¹Ахе хӧламәки дьн жи шанд, ԝана әԝ жи кʼӧта, әԝ рʼобәт кьрьн у дәствала вәрʼекьрьн.

¹²Йе сьсийа жи шанд, вана әва жи бьриндар кьр у жь рʼәз дәрхьстьн.

¹³Хԝәйе рʼәз гот: ‹Әз чь бькьм? Кӧрʼе хԝәйи дәлал бьшиньм, һьлбәт ԝе жь ԝи шәрм бькьн›.

¹⁴Ле гава рʼәзван чʼәʼв ԝи кʼәтьн, ль һәв шеԝьрин у готьн: ‹Әв ԝаре ԝи йә! Ԝәрьн әм ԝи бькӧжьн, кӧ миратʼа ԝи мәрʼа бьминә›.

¹⁵У әԝ жь рʼәз дәрхьстьнә дәр у кӧштьн. Аԝа хԝәйе рʼәз ԝе чь бинә сәре ԝан?

¹⁶Нә әԝе бе ԛьрʼа ԝан рʼәзвана бинә у рʼәз бьдә һьнәкед дьн». Гава әв йәк бьһистьн, готьн: «Хԝәде нәкә».

¹⁷У Иса ль ԝан ньһерʼи у гот: «Ле әԝ чь йә, кӧ ньвисар ә? ‹Әԝ кәвьре кӧ һоста тʼәхсир кьр, әԝ бу сәре әʼнишке›[79].

¹⁸Һәр кәсе кӧ бькʼәвә сәр ԝи кәвьри, ԝе һурдәхԝәши бә у әԝ кәвьр бькʼәвә сәр кʼе, ԝе ԝи бьһʼьнщьрʼинә».

¹⁹Сәрәкед кʼаһина у ԛанунзана ԝе дәме кьрьн кӧ Ԝи бьгьрьн, чьмки фәʼм кьрьн, кӧ Әԝи әв мәсәлә ани сәр ԝан, ле жь щьмәʼте тьрсийан.

²⁰У чʼәʼвед ԝан ль Иса бун, чәнд мәрьвед щәʼсус шандьн, кӧ бь дӧрʼути хԝә дәԝса рʼаста данибун, ԝәки Ԝи бь хәбәра бьгьрьн у бьдьнә дәсте һʼӧкӧмәте у диԝана ԝәли.

²¹Ԝана жь Ԝи пьрси у готьне: «Дәрсдар, әм заньн кӧ Тӧ рʼаст хәбәр дьди у һин дьки, нав мәрьвада фьрԛийе жи данайни, ле рʼийа Хԝәде рʼаст һин дьки.

²²Гәло рʼаст ә кӧ әм хәрщ бьдьнә Ԛәйсәр йан на?»

²³Әԝи кӧ фелбазийа ԝан заньбу ԝанарʼа гот[80]:

²⁴«Зивәки нишани Мьн кьн. Әв наве ньвисар у сьфәт йе кʼе йә сәр?»

²⁵Ԝана гот: «Йед Ԛәйсәр ьн». Әԝи ԝанрʼа гот: «Ԝәки ӧса йә, чь кӧ йед Ԛәйсәр ьн, бьдьнә Ԛәйсәр у чь йед Хԝәде нә бьдьнә Хԝәде».

²⁶У нькарьбун бәр щьмәʼте нава хәбәра Ԝида Әԝ бьгьртана, сәр щабдайина Ԝи зәндәгьрти дәнге хԝә бьрʼин.

²⁷Садуԛи, кӧ дьбежьн рʼабуна мьрийа тʼӧнә, һьнәкә жь ԝан һатьнә щәм Ԝи жь Ԝи пьрсин у готьн:

²⁸«Дәрсдар, Муса мәрʼа ньвисийә: ‹Һәгәр бьре йәки бьзәԝьщә у безӧрʼәт бьмьрә, бьра бьре ԝи жьна ԝи бьстинә у ԝаре бьре хԝә шин кә›[81].

²⁹Аԝа һʼәфт бьра һәбун. Бьре мәзьн жьнәк станд, безӧрʼәт мьр.

³⁰Пәйрʼа йе дӧда

³¹у паше йе сьсийа әԝ жьн станд, һәйнәсәр ԝан һәр һʼәфта жи әԝ жьн станд у зарʼ пәй ԝан нәкʼәтьн, мьрьн.

³²Пәй гьшкарʼа әԝ кʼӧлфәта жи мьр.

³³Дә ижар ԝе Рʼожа Рʼабуна мьрийа әԝ кʼӧлфәте бьбә жьна кʼижани? Чьмки һәр һʼәфта жи әԝ стандьбу».

³⁴Иса ль ԝан вәгәрʼанд у гот: «Мәрьве ве дьне дьзәԝьщьн у мер дькьн.

³⁵Ле әԝед кӧ һежайи ԝе дьне бьн у бьгьһижьнә рʼабуна мьрийа, нә ԝе бьзәԝьщьн у нә жи мер кьн.

³⁶Әԝе иди нькарьбьн бьмьрьн, әԝ ԝәкә мьлйакʼәта нә. Әԝ зарʼед Хԝәде нә, чьмки пʼара рʼабуна мьрийа нә.

³⁷Ле бона рʼабуна мьрийа, Муса жи дайә кʼьфше. Әԝ сәрһатийа дара дьрʼийеда бона Хӧдан дьбежә: ‹Хԝәдейе Бьраһим, Хԝәдейе Исһаԛ, Хԝәдейе Аԛуб›[82].

³⁸Аԝа Хԝәде нә Хԝәдейе мьрийа йә, ле йе зендийа йә, чьмки бона Ԝи һʼәму жи сах ьн».

³⁹Жь ԛанунзана һьнәка ле вәгәрʼанд у готьне: «Дәрсдар, Тә ԛәнщ гот».

⁴⁰У иди кәсәки нәԝерьбу кӧ тьштәки жи жь Ԝи бьпьрсә.

⁴¹У Иса ԝанарʼа гот: «Чаԝа дьбежьн кӧ Мәсиһ кӧрʼе Даԝьд ә?

⁴²Даԝьд хԝәха кʼьтеба Зәбурада дьбежә: ‹Хӧдан готә Хӧдане мьн: Ль мьле Мьни рʼасте рʼуне,

⁴³һʼәта кӧ дьжмьнед Тә бькьмә бьне пʼийед Тә›[83].

⁴⁴Аԝа һәгәр Даԝьд Ԝи ‹Хӧдан› һʼәсаб дькә, иди Әԝ чаԝа дьбә кӧрʼе Даԝьд?»

⁴⁵Һе тʼәмамийа щьмәʼте гӧһдари дькьр, Әԝи шагьртед Хԝәрʼа гот:

⁴⁶«Һʼәвза хԝә жь ԝан ԛанунзана бькьн, йед кӧ һʼьз дькьн бь чӧхед дьреж бьгәрʼьн, базарада сьлаве бьдьнә ԝан, кʼьништада кʼӧрсийед пешьн бьгьрьн у шайийада жи һәрәма жорьн рʼунен.

⁴⁷Әвана аликива малед жьнәбийа һʼуфи хԝә дькьн, алийе дьнва жи бона хԝәкʼьфшкьрьне дӧайе хԝә дьреж дькьн. Диԝана ԝане һе гьран бә».