Read Пәймана Ну (Инщил) Луԛа 4 Bible Online

Луԛа 4 - Пәймана Ну (Инщил) bible

Луԛа 4

¹Иса бь Рʼӧһʼе Пирозва тʼьжи жь Урдӧне вәгәрʼийа, Рʼӧһʼ бәрʼийеда рʼебәрийа Ԝи дькьр,

²чьл рʼожи жь мирещьн һатә щерʼьбандьне. Әԝи ԝан рʼожада тьштәк нәхԝар у гава әԝ рʼож дәрбаз бун, бьрʼчи бу.

³Һьнге мирещьн Ԝирʼа гот: «Һәгәр Тӧ Кӧрʼе Хԝәде йи, ви кәвьрирʼа бежә кӧ бьбә нан».

⁴Иса ле вәгәрʼанд у гот: «Ньвисар ә: ‹Инсан тʼәне бь нен нажи›[24] [25]».

⁵Һьнге мирещьн Әԝ рʼакьрә сәр щики бьльнд, дәԛеда һʼәму пʼадшатийед дьнйайе нишани Ԝи дан

⁶у готә Ԝи: «Әзе рʼәԝш у сәрԝертийа ван һʼәмуйа бьдьмә дәсте Тә, чьмки мьнрʼа һатийә дайине у кʼерʼа кӧ бьхԝазьм әзе бьдьме.

⁷Һәгәр ньһа Тӧ сәре хԝә ль бәр мьн дайни, әв һʼәму ԝе пʼара Тә бьн».

⁸Иса ле вәгәрʼанд у гот: «Ньвисар ә: ‹Сәре хԝә ль бәр Хӧдан Хԝәдейе хԝә дайнә у тʼәне Ԝи бьһʼәбинә!›[26]»

⁹Паше мирещьн Иса бьрә Оршәлиме, Әԝ сәр бьльндщийа бане пʼарьстгәһе да сәкьнандьне у готә Ԝи: «Һәгәр Тӧ Кӧрʼе Хԝәде йи, дә Хԝә жь вьр бавежә хԝаре.

¹⁰Чьмки ньвисар ә: ‹Хԝәде ԝе тʼәмийа Тә бьдә мьлйакʼәтед Хԝә, кӧ Тә хԝәй кьн›

¹¹у: ‹Әԝе Тә сәр дәсте хԝә бьгьрьн, ԝәки ньге Тә кәвьр нәкʼәвә›[27]».

¹²Иса ле вәгәрʼанд у гот: «Һатийә готьне кӧ: ‹Хӧдан Хԝәдейе хԝә нәщерʼьбинә!›[28]»

¹³У гава мирещьн һʼәму щерʼьбандьн хьлаз кьрьн, дәмәке жь Ԝи дур кʼәт.

¹⁴Иса бь ԛәԝата Рʼӧһʼ вәгәрʼийа Щәлиле у нав-дәнге Ԝи һʼәму алийед ԝи ԝәлатида бәла бу.

¹⁵Әԝи кʼьништед ԝанда һин дькьр у һʼәмуйа пәсьне Ԝи дьдан.

¹⁶Әԝ һатә Ньсрәте, ԝи щийе кӧ Әԝ ле мәзьн бьбу, мина әʼдәте Хԝә рʼожа шәмийе Әԝ кʼәтә кʼьниште у рʼабу кӧ бьхунә.

¹⁷Кʼьтеба Ишайа пʼехәмбәр данә Ԝи у гава кʼьтеба гӧломатккьри вәкьр, әԝ щи дит кӧ аһа ньвисар бу:

¹⁸«Рʼӧһʼе Хӧдан ль сәр Мьн ә, чьмки Әԝи Әз бь рʼункьрьне кʼьфш кьрьм, ԝәки Мьзгинийе бьдьмә фәԛира, у Әз шандьмә һесирарʼа бой сәрбәстийе у корарʼа бой дитьне даннасин кьм, азайийе бьдьмә бьндәста

¹⁹у сала Хӧданә рʼәʼме[29] жи бьдьмә наскьрьне»[30].

²⁰У кʼьтеб гӧломатк кьр да бәрдәсти рʼуньшт у кʼьништеда һʼәму зурʼ бьбун ль Ԝи дьньһерʼин.

²¹Әԝи дәстпекьр ԝанарʼа гот: «Әва ньвисара иро һатә сери, гава ԝә бьһист».

²²Һʼәмуйа жи бона Ԝи ԛәнщ хәбәр дьдан у сәр хәбәрдана Ԝийә мәʼрифәт зәндәгьрти мабун у дьготьн: «Әва нә кӧрʼе Усьв ә?»

²³Әԝи ԝанрʼа гот: «Һуне рʼаст ве готьне сәр Мьн бежьн: ‹Һʼәкимо! Дә һʼәкимтийе ль хԝә бькә. У әԝ тьштед мә бьһистьн кӧ Тә Кәфәрнаһумеда кьрьн, ль вьр щи-мьскʼәне хԝәда жи бькә›».

²⁴У гот: «Әз рʼаст ԝәрʼа дьбежьм, пʼехәмбәр щи-мьскʼәне хԝәда беԛәдьр ә.

²⁵Әз рʼастийе ԝәрʼа дьбежьм, гәләк жьнәби Исраеледа һена Елйасда һәбун, чахе се сал у шәш мәһа әʼзман һатә гьртьне у тʼәмамийа ԝәлетда бу хәлайикә гьран.

²⁶Ле Елйас кәсәкирʼа нәһатә шандьне, пештьри жьнәбийа жь бажаре Сәрәпта Сайдерʼа[31].

²⁷У гәләк кʼоти жи Исраеледа һена Елиша пʼехәмбәрда һәбун у жь ԝан тʼӧ кәс паԛьж нәбу, пештьри Нәʼмане жь Сурйайе»[32].

²⁸Гава һʼәмуйед кʼьништеда әв йәк бьһистьн, һерс кʼәтьн.

²⁹Рʼабун Әԝ жь бажер дәрхьстьн, бьрьн сәр ԝи чʼийайе ль кʼӧ бажаре ԝан һатьбу чекьрьне, ԝәки Ԝи жь кәнделда бавежьн.

³⁰Ле Әԝ нав ԝанрʼа дәрбаз бу чу.

³¹Иса бәржер бу һатә бажаре Кәфәрнаһума Щәлиле у рʼожа шәмийе әԝ һин дькьрьн.

³²Әԝ ль сәр һинкьрьна Ԝи зәндәгьрти мабун, чьмки хәбәрдана Ԝи бь һʼӧкӧм бу.

³³У кʼьништеда мәрьвәк һәбу, кӧ рʼӧһʼе щьнайи һʼәрам перʼа һәбу. Әԝи бь дәнгәки бьльнд кьрә ԛирʼин:

³⁴«Ԝәйе! Тӧ чь жь мә дьхԝази Исайе Ньсрәте? Тӧ һатийи ԛьрʼа мә бини? Әз заньм Тӧ кʼи йи. Тӧ Пирозе Хԝәде йи!»

³⁵Иса ле һьлат у гот: «Кәрʼ бә у же дәркʼәвә!» Щьн әԝ бәр ԝан ль әʼрде хьст у бе зьрардайин жь ԝи дәркʼәт.

³⁶Һʼәму зәндәгьрти ман, һәврʼа дьготьн: «Әв чь готьн ә? Әԝ бь һʼӧкӧм у ԛәԝате әʼмьри ль рʼӧһʼед һʼәрам дькә у дәрдькʼәвьн?»

³⁷У бәʼса Ԝи һʼәму дор-бәра бәла дьбу.

³⁸Әԝ жь кʼьниште дәркʼәт чу мала Шьмһʼун. Хԝәсийа Шьмһʼун тәʼл тʼайеда дьнәʼлийа у бона ԝе жь Ԝи һиви кьрьн.

³⁹Иса сәр ԝерʼа сәкьни, ль тʼайе һьлат у тʼайе же бәрʼда. Дәстхԝәда рʼабу сәр хԝә, бәрдәсти ԝанрʼа кьр.

⁴⁰Гава рʼо дьчу ава, һʼәмуйед кӧ щурʼә-щурʼә нәхԝәшийед ԝан һәбун анинә щәм Ԝи. Әԝи дәсте Хԝә дани сәр ԝан һәр йәки у әԝ ԛәнщ кьрьн.

⁴¹Жь гәләка жи щьн дәрдькʼәтьн, дькьрьнә ԛирʼин у дьготьн: «Тӧ Кӧрʼе Хԝәде йи!» Ле Иса ль ԝан һьлат у нәдьһьшт әԝ хәбәр дьн, чьмки заньбун кӧ Әԝ Мәсиһ ә.

⁴²Сьбәһ кӧ зәлал бу, Иса рʼабу чу щики хәԝлә. Әʼлаләт ль Ԝи дьгәрʼийан у һʼәта щәм Ԝи һатьн, нәдьһьштьн кӧ Әԝ дәст жь ԝан бькʼьшинә.

⁴³Ле Әԝи ԝанрʼа гот: «Гәрәке Әз бажаред дьнда жи Мьзгинийа Пʼадшатийа Хԝәде бьдьм, чьмки Әз бона ԝе йәке һатьмә шандьне».

⁴⁴У кʼьништед Щьһустанеда[33] даннасин дькьр.