Read Пәймана Ну (Инщил) Луԛа 7 Bible Online

Луԛа 7 - Пәймана Ну (Инщил) bible

Луԛа 7

¹Гава Иса әԝ готьнед кӧ ԝе гӧһдарарʼа бьгота хьлаз кьрьн, чу Кәфәрнаһуме.

²У хӧламе сәрсәдәки, кӧ бона ԝи йәки һежа бу, нәхԝәш бәр мьрьне бу.

³Гава әԝи бона Иса бьһист, рʼуспийед щьһуйа шандьнә щәм Ԝи у же һиви кьр, кӧ бе хӧламе ԝи хьлаз кә.

⁴Әԝана һатьнә щәм Иса, гәләки һиви же кьрьн у готьн: «Әԝ һежа йә кӧ Тӧ әве ԛәнщийе жерʼа бьки,

⁵чьмки әԝ мьләте мә һʼьз дькә у кʼьништ жи бона мә чекьрийә».

⁶Һьнге Иса тʼәви ԝан чу. Гава незики мале бу, сәрсәд чәнд достед хԝә шандьнә пешийа Ԝи, Ԝирʼа гот: «Хӧдан, зәʼмәте нәбинә, чьмки әз нә һежа мә кӧ Тӧ бейи мала мьн.

⁷Бона ве йәке мьн хԝә лайиԛи Тә нәгьрт, кӧ бьһатама пәй Тә жи. Тʼәне хәбәрәке бежә у хӧламе мьне ԛәнщ бә.

⁸Чьмки әз хԝәха жи мәрьвәки бьн һʼӧкӧмда мә у бьн дәсте мьнда жи әскәр һәнә. Әз йәкирʼа дьбежьм: ‹Һәрʼә›, дьчә, йәки дьнрʼа дьбежьм: ‹Ԝәрә›, те у жь хӧламе хԝәрʼа дьбежьм: ‹Әви тьшти бькә›, дькә».

⁹Гава Иса әв йәк бьһист, сәр ԝи зәндәгьрти ма у вәгәрʼийа сәр ԝе щьмәʼта кӧ пәй Ԝи дьчу, гот: «Әз ԝәрʼа дьбежьм, Мьн Исраеледа жи баԝәрикә аһа йәкида нәдитийә».

¹⁰У әԝед шанди вәгәрʼийанә мал, дитьн кӧ ԝе әԝ хӧлам ԛәнщ буйә.

¹¹Рʼожәкә дьн Иса чу бажарәки, кӧ наве ԝи Найин бу у шагьртед Ԝи жи тʼәви әʼлаләтәкә гьран Ԝирʼа дьчун.

¹²Гава незики дәргәһе бажер бу, ва мьрик дәрдьхьстьн. Әԝ кӧрʼе жьнәбикә тайе тʼәне бу у гәләк һәԝари жи жь бажер перʼа дьчун.

¹³Гава Хӧдан де дит, гӧне Ԝи ле һат у ԝерʼа гот: «Нәгьри».

¹⁴Әԝ незики дарбәсте бу гьрт у әԝед кӧ дьбьрьн сәкьнин, Иса гот: «Хорто! Әз тәрʼа дьбежьм, рʼабә!»

¹⁵Мьри рʼабу рʼуньшт, дәстпекьр хәбәр да у Иса әԝ да дийа ԝи.

¹⁶У саԝ кʼәтә сәр һʼәмуйа, шькьри дьданә Хԝәде у дьготьн: «Пʼехәмбәрәки мәзьн нава мәда дәркʼәтийә!» у: «Хԝәде сәрик дайә мьләте Хԝә!»

¹⁷Нав у дәнге Ԝи тʼәмамийа Щьһустане у дор-бәре ԝе бәла бу.

¹⁸Шагьртед Йуһʼәнна Йуһʼәннарʼа бона ван һʼәму тьшта готьн. Йуһʼәнна жи гази дӧ шагьртед хԝә кьр

¹⁹у әԝ шандьнә щәм Хӧдан, ԝәки же бьпьрсьн: «Тӧ Әԝ и, Йе кӧ гәрәке бьһата, йан әм һивийа йәки дьн бьн?»

²⁰Әԝ мәри һатьнә щәм Иса у готьн: «Йуһʼәннайе ньхӧмдар әм шандьнә щәм Тә, кӧ жь Тә бьпьрсьн, Тӧ Әԝ и, Йе кӧ гәрәке бьһата, йан әм һивийа йәки дьн бьн?»

²¹У ԝе дәме Иса гәләк жь нәхԝәшийа, дәрба, жь рʼӧһʼед хьраб ԛәнщ кьрьн у чʼәʼвед гәләк кора вәкьрьн.

²²Иса ль ԝан вәгәрʼанд у гот: «Һәрʼьн, чь кӧ ԝә дит у бьһист Йуһʼәннарʼа бежьн: Кор дьбиньн, сәԛәт дьгәрʼьн, кʼоти паԛьж дьбьн, кәрʼ дьбьһен, мьри рʼадьбьн у фәԛирарʼа жи Мьзгини те дайине.

²³У хԝәзи ль ԝи, кӧ жь Мьн пʼьшк набә».

²⁴Гава әԝед кӧ Йуһʼәнна шандьбун чун, Иса бона Йуһʼәнна әʼлаләтерʼа дәстпекьр гот: «Һун дәркʼәтьнә бәрʼийе чь бьбиньн? Ԛамишәки кӧ жь байе дьһʼәжә?

²⁵Йан дәркʼәтьн чь бьбиньн? Мәрьвәки кʼьнще назьк ль хԝә кьри? Нә әԝед кӧ кʼьнще назьк хԝә дькьн у әʼмьре рʼьнд дәрбаз дькьн, әԝ малед пʼадшада нә?

²⁶Йан һун дәркʼәтьн чь бьбиньн? Пʼехәмбәрәки? Бәле, Әз ԝәрʼа дьбежьм, жь пʼехәмбәрәки жи мәстьр ә.

²⁷Әва әԝ ә, бона кʼижани ньвисар ә: ‹Ва йә Әзе ԛасьде Хԝә пешийа Тәва бьшиньм. Әԝе рʼийа Тә пешийа Тәва һазьр кә›[36].

²⁸Әз ԝәрʼа дьбежьм, жь нава әԝед кӧ жь кʼӧлфәта дьне кʼәтьнә, тʼӧ кәс жь Йуһʼәнна мәстьр нәбуйә, ле Пʼадшатийа Хԝәдеда йе һәри бьчʼук жь ԝи мәстьр ә».

²⁹Гава тʼәмамийа щьмәʼте, ӧса жи хәрщгьра әв йәк бьһист, тʼьвдира Хԝәде рʼаст һʼәсаб кьрьн, чьмки бь ньхӧмандьна Йуһʼәнна һатьбунә ньхӧмандьне.

³⁰Ле ферьси у ԛанунзана бона хԝә тʼьвдира Хԝәде тʼәхсир кьрьн, чьмки ԝана нәхԝәст кӧ жь Йуһʼәнна бенә ньхӧмандьне.

³¹Иса сәрда зедә кьр гот: «Әз мәрьвед ви ньсьли мина чь бьшьбиньм? Йан әԝ мина чь нә?

³²Әԝ мина ԝан зарʼа нә, йед кӧ базареда рʼуньшти нә, гази һәвдӧ дькьн у дьбежьн: ‹Мә бона ԝә зӧрʼне хьст, һун нәрʼәԛьсин у бона ԝә бәйтʼ гот, һун нәгьрийан›.

³³Йуһʼәннайе ньхӧмдар һат, нә нан дьхԝар, нә жи шәрав вәдьхԝар[37], ԝә дьгот: ‹Щьн ԝида һәйә›.

³⁴Кӧрʼе Мерьв һат, дьхԝә у вәдьхԝә, һун бона Ԝи дьбежьн: ‹Ва Әԝ йәки пәй хԝарьн у вәхԝарьне кʼәти йә, досте хәрщгьр у гӧнәкʼара йә›.

³⁵Ле һʼәмуйед кӧ пәй сәрԝахтийе дьчьн әԝ кʼьфш дькьн кӧ сәрԝахти рʼаст ә[38]».

³⁶Йәки ферьси һиви жь Иса кьр, кӧ тʼәви ԝи хԝарьне бьхԝә. Әԝ жи чу мала ԝи ферьсийи, сәр сьфре рʼуньшт.

³⁷У ԝи бажарида кʼӧлфәтәкә чʼәʼвдәр һәбу. Гава ԝе бьһист кӧ Әԝ мала ферьсида сәр сьфре рʼуньштийә, дәрданәкә алабастьрейи рʼуне бинхԝәш ани,

³⁸пьштева бәр ньгед Ԝи сәкьни гьрийа, бь һесьред хԝә ньгед Ԝи шьл кьрьн у бь пʼорʼе сәре хԝә жи зьһа кьрьн. Паше ньгед Ԝи рʼамусан, бь рʼуне бинхԝәш жи рʼун кьрьн.

³⁹Гава ԝи ферьсийе кӧ әԝ тʼәглиф кьрьбу әв йәк дит, дьле хԝәда гот: «Һәгәр Әва пʼехәмбәр буйа, ԝе бьзаньбуйа кӧ кʼи йә у йәкә чаԝа йә дәсте хԝә дайә Ԝи», чьмки йәкә чʼәʼвдәр бу.

⁴⁰Иса ԝирʼа гот: «Шьмһʼун, Әз дьхԝазьм тьштәки тәрʼа бежьм». Әԝи жи гот: «Кʼәрәм кә бежә, дәрсдар». Иса гот:

⁴¹«Дӧ дәйндаред йәки һәбун, йәк пенсьд зиви дәйндаре ԝи бу, йәк жи пенщи.

⁴²Ле чьмки тьштәки ԝан тʼӧнәбу кӧ дәйне хԝә бьдана, әԝи бахшандә һәр дӧйа жи. Ньһа жь ԝан һәр дӧйа кʼижане гәләки ԝи һʼьз бькә?»

⁴³Шьмһʼун ле вәгәрʼанд у готе: «Тʼәхмина мьн әԝе кӧ гәләк жерʼа һатә бахшандьне». Иса ԝирʼа гот: «Тә рʼаст те дәрхьст».

⁴⁴У сәр кʼӧлфәтеда вәгәрʼийа, Шьмһʼунрʼа гот: «Ве кʼӧлфәте тӧ дьбини? Әз һатьмә мала тә, бона ньгед Мьн тә ав нәда, ле әве бь һесьред хԝә ньгед Мьн шьл кьрьн у бь пʼорʼе сәре хԝә жи зьһа кьрьн.

⁴⁵Тә рʼамусанәк нәда Мьн, ле жь һьнгева кӧ Әз һатьмә вьр, әве дәст жь рʼамусана ньгед Мьн нәкʼьшандийә.

⁴⁶Тә сәре Мьн рʼун нәкьр, ле әве бь рʼуне бинхԝәш ньгед Мьн рʼун кьрьн.

⁴⁷Бона ве йәке Әз тәрʼа дьбежьм, гӧнед ве кӧ гәләк бун һатьнә бахшандьне, ләма әве гәләк һʼьз кьр. Чьмки кʼерʼа гәләк тенә бахшандьне, гәләк жи һʼьз дькә. Ле кʼерʼа һьндьк тенә бахшандьне, әԝ һьндьки һʼьз дькә».

⁴⁸У ԝерʼа гот: «Гӧнед тә һатьнә бахшандьне».

⁴⁹Һьнге әԝед кӧ тʼәви Ԝи сәр сьфре рʼуньштьбун нав хԝәда дьготьн: «Әва кʼи йә, һʼәта кӧ гӧна жи дьбахшинә?»

⁵⁰У Иса ԝе кʼӧлфәтерʼа гот: «Баԝәрийа тә тӧ хьлаз кьри. Бь хер у сьламәт һәрʼә».