Read Пәймана Ну (Инщил) Луԛа 8 Bible Online

Луԛа 8 - Пәймана Ну (Инщил) bible

Луԛа 8

¹Пәй ве йәкерʼа Иса гӧнд у бажара дьгәрʼийа, даннасин дькьр, Мьзгинийа Пʼадшатийа Хԝәде дьда у һәр донздәһ шагьрт жи Перʼа бун,

²ӧса жи чәнд кʼӧлфәтед кӧ жь рʼӧһʼед хьраб у нәхԝәшийа ԛәнщ бьбун: Мәрйәма кӧ жерʼа Мәждәлани дьготьн, йа кӧ һʼәфт щьн же дәркʼәтьбун

³у Йоһана, жьна Хузайе ԝәкʼилхәрще мала Һеродәс, Сосьн у гәләкед майин, кӧ ԝана бь һәбука хԝәва ԝанрʼа бәрдәсти дькьрьн.

⁴У гава әʼлаләтәкә гьран жь гәләк бажара щәм Иса щьвийа, Әԝи мәсәләк гот:

⁵«Тʼохьмрʼәш рʼабу чу кӧ тʼохьм бьрʼәшинә. Гава дьрʼәшанд, һьнәк кʼәтьнә дәве рʼе һатьнә пʼепәскьрьне у тәйрәдед әʼзмен һатьн әԝ хԝарьн.

⁶У һьнәк жи кʼәтьнә щийе кәвьри, гава шин бун, жь дәст кемасийа шьлайе һʼьшк бун.

⁷У һьнәк жи кʼәтьнә нава стьрийа, стьри жи перʼа шин бун у әԝ хәньԛандьн.

⁸Һьнәкед дьн жи кʼәтьнә нава әʼрде ԛәнщ у шин бун, сәд щар бәр дан». Гава әв йәк гот, кьрә гази: «Гӧһе кʼейи бьһистьне һәйә бьра бьбьһе!»

⁹Шагьртед Ԝи же пьрсин: «Мәʼна әве мәсәле чь йә?»

¹⁰Әԝи гот: «Ԝәрʼа һатийә дайине, кӧ һун сӧрʼед Пʼадшатийа Хԝәде бьзаньбьн, ле йед майинрʼа бь мәсәла те хәбәрдане кӧ: ‹Бьньһерʼьн у нәбиньн, бьбьһен у фәʼм нәкьн›[39].

¹¹Әв ә мәʼна ве мәсәле: Тʼохьм хәбәра Хԝәде йә.

¹²Тʼохьмед кӧ кʼәтьнә дәве рʼе әԝ ьн, йед кӧ хәбәре дьбьһен, ле мирещьн те хәбәре жь дьле ԝан дәрдьхә, кӧ нәбә баԝәр бькьн у хьлаз бьн.

¹³Тʼохьмед кӧ кʼәтьнә щийе кәвьри әԝ ьн, йед кӧ гава хәбәре дьбьһен, бь әшԛ у ша ԛәбул дькьн. Ле чьмки рʼаԝед ԝан тʼӧнәнә, дәмәкә кьн баԝәр дькьн у ԝәхте щерʼьбандьне дькʼәвьн.

¹⁴Тʼохьмед кӧ кʼәтьнә нава стьрийа әԝ ьн, йед кӧ хәбәре дьбьһен, хәмед дьнева, дәԝләт у шабуна ви әʼмьрива мьжул дьбьн, дьхәньԛьн у бәред ԝан нагьһижьн.

¹⁵У тʼохьмед кʼәтьнә нав әʼрде ԛәнщ әԝ ьн, йед кӧ бь дьле сах у ԛәнщ хәбәре дьбьһен, дьле хԝәда хԝәй дькьн у бь сәбьр бәре хԝә дьдьн.

¹⁶Тʼӧ кәс чʼьра вехьсти накә бьн фьраԛе, нә жи дькә бьн щи-ньвине, ле датинә сәр пʼечʼьре, ԝәки әԝед кӧ дькʼәвьнә һьндӧрʼ, рʼонайе бьбиньн.

¹⁷Чьмки тьштәки вәшарти тʼӧнә кӧ дәрнәйе у нә жи тьштәки дьзива, кӧ хӧйа нәбә у нәйе бәр рʼонайе.

¹⁸Аԝа дина хԝә бьдьне кӧ һун чаԝа дьбьһен, чьмки кʼерʼа кӧ һәйә, ԝе һе ле зедә бә у кʼерʼа кӧ тʼӧнә, әԝе кӧ ԝи тʼьре һәйә жи, ԝе же бе стандьне».

¹⁹Һьнге де у бьрайед Ԝи һатьнә щәм Ԝи, ле жь дәст зәʼфбуна әʼлаләте нькарьбун незики Ԝи буна.

²⁰Щаб данә Ԝи кӧ: «Дийа Тә у бьрайед Тә дәрва сәкьни нә у дьхԝазьн Тә бьбиньн».

²¹Әԝи жи ль ԝан вәгәрʼанд у гот: «Де у бьрайед Мьн әԝ ьн, йед кӧ хәбәра Хԝәде дьбьһен у дьԛәдиньн».

²²Рʼожәке Иса шагьртед Хԝәва кʼәтә ԛәйьке у готә ԝан: «Әм дәрбази ԝи бәри голе бьн». У рʼекʼәтьн.

²³Гава ԛәйькеда дьчун, Әԝ хәԝрʼа чу. У фьртонәк ль голе рʼабу, ԛәйьк тʼьжи ав дьбу, әԝ ԛәзийеда бун.

²⁴Һьнге шагьрт незики Ԝи бун, Әԝ һʼьшйар кьрьн у готьне: «Мамоста, Мамоста! Әм ӧнда дьбьн!» Әԝ рʼабу, ль байе у пелед аве һьлат, әԝ сәкьнин у сәԛьрʼин.

²⁵Һьнге Әԝи ԝанрʼа гот: «Баԝәрийа ԝә кʼане йә?» У ԝана бь хоф, әʼщебмайи һәврʼа готьн: «Гәло әв кʼи йә, кӧ әʼмьри сәр бе у аве жи дькә у ельми Ԝи дьбьн?»

²⁶Әԝана бь ԛәйьке чунә тʼопрахед Гьрасине, пешбәри Щәлиле.

²⁷Гава Әԝ дәркʼәтә бәже, жь ԝи бажари мәрьвәк дәркʼәтә пешийа Ԝи, кӧ щьн нав ԝида бун. Әԝи зува нә кʼьнщ ль хԝә дькьрьн у нә жи малда дьсәкьни, нава горʼьстанада дьма.

²⁸Гава әԝи Иса дит, кьрә ԛирʼин кʼәтә бәр Ԝи у бь дәнгәки бьльнд гот: «Тӧ чь жь мьн дьхԝази Исайе Кӧрʼе Хԝәдейе Һәри Жорьн? Әз рʼәща жь Тә дькьм, мьн нәдә щәфе!»

²⁹Чьмки Иса әʼмьри сәр рʼӧһʼе һʼәрам кьрьбу, кӧ жь ԝи мәрьви дәркʼәвә. Әԝ гәләк щара щьна дькʼәт, гава бь ԛәйд у зьнщира жи гьредьдан, әԝи диса ԛәйд дьԛәтандьн у щьна әԝ чола дьхьст.

³⁰Һьнге Иса жь ԝи пьрси у готе: «Наве тә чь йә?» Әԝи гот: «Кʼомәскәр[40]», чьмки гәләк щьн кʼәтьбунә нава ԝи.

³¹У щьна лава Ԝи дькьр, кӧ әʼмьр нәкә әԝ һәрʼьнә гәлийе һәй-ԝайе.

³²Ль ԝи щийи сурики бәразайи мәзьн һәбу, кӧ сәре чʼийе дьчʼерийа. Щьна рʼәща же дькьр, кӧ изьне бьдә ԝан, әԝ һәрʼьн бькʼәвьнә нава бәраза. Әԝи изьн да.

³³У щьн жь нав ԝи мәрьви дәркʼәтьн, чун кʼәтьнә нава бәраза у әԝ сури жорда рʼәви, хԝә жь кәнделда авитьнә голе хәньԛин.

³⁴Гава бәразвана әв йәк дит, рʼәвин чунә бажар у гӧнда, әв йәк гьли кьрьн.

³⁵Мәрьв рʼабун чун, кӧ тьште буйи бьбиньн. Гава һатьнә щәм Иса, дина хԝә дане, ԝе әԝ мәрьве кӧ щьн же дәркʼәтьбун, кʼьнще ԝи ле, сәр һʼьше хԝәда һати, ль бәр ньгед Иса рʼуньшти йә. Һьнге әԝ тьрсийан.

³⁶Әԝед кӧ әв йәк дитьбун, йед майинрʼа готьн, кӧ чаԝа әԝи щьнакʼәти ԛәнщ бу.

³⁷Һьнге һʼәму бьнәлийед дор-бәред Гьрасине һиви жь Иса кьрьн, кӧ жь ԝан дур кʼәвә, чьмки саԝәкә мәзьн әԝ гьртьбун. Әԝ жи кʼәтә ԛәйьке у пашда вәгәрʼийа.

³⁸Ле әԝ мәрьве кӧ щьн же дәркʼәтьбун лава Ԝи кьр, кӧ әԝ жи тʼәви Ԝи һәрʼә. Ле Иса әԝ вәрʼекьр у гот:

³⁹«Вәгәрʼә мала хԝә у чь кӧ Хԝәде бона тә кьр гьли кә». У әԝ чу, чь кӧ Иса бона ԝи кьрьбу тʼәмамийа бажерда дьгот у дькьрә дәнги.

⁴⁰У чахе Иса вәгәрʼийа, әʼлаләте Әԝ ԛәбул кьр, чьмки һʼәму жи һивийа Ԝи бун.

⁴¹Һьнге мәрьвәки наве ԝи Йайиро, сәрԝере кʼьниште, һат хԝә авитә ньгед Иса у һиви же кьр, кӧ һәрʼә мала ԝи.

⁴²Чьмки тʼәне ԛизәкә ԝийә донздәһ сали һәбу у әԝ жи бәр мьрьне бу. Гава Иса дьчу, әʼлаләте зәʼмәт дьда Ԝи.

⁴³Ԝьр кʼӧлфәтәк жи һәбу, кӧ донздәһ сале ԝе бун[41], сәр хуне вәбьбу. Әԝе һʼәму һәбука хԝә дабу һʼәкима, ле тʼӧ кәси чʼарә ле нәкьрьбу.

⁴⁴Әва пьштева һат ль рʼишийед кʼьнще Ԝи кʼәт у дәстхԝәда хун же чʼькийа.

⁴⁵Иса гот: «Әԝ кʼи бу кӧ ль Мьн кʼәт?» Гава һʼәмуйа инкʼар кьр, Пәтрус[42] гот: «Мамоста, әʼлаләт Тә дәʼф дьдә, тәнгасийе дьдә Тә[43]».

⁴⁶Ле Иса гот: «Йәк ль Мьн кʼәт, чьмки Әз пе һʼәсийам кӧ жь Мьн ԛәԝат дәркʼәт».

⁴⁷У гава кʼӧлфәте дит кӧ нәһатә вәшартьне, ләрьзи, һат хԝә авитә бәр Ԝи у ль бәр тʼәмамийа щьмәʼте Ԝирʼа гот, кӧ бона чь ль Ԝи кʼәт у чаԝа перʼа-перʼа ԛәнщ бу.

⁴⁸Әԝи ԝерʼа гот: «Әʼвде![44] Баԝәрийа тә тӧ ԛәнщ кьри. Бь хер у сьламәт һәрʼә».

⁴⁹Әԝи һе хәбәр дьда, жь мала сәрԝере кʼьниште йәки һат у гот: «Ԛиза тә мьр, иди зәʼмәте нәдә дәрсдар».

⁵⁰Гава Иса әв йәк бьһист, ԝирʼа гот: «Нәтьрсә, тʼәне баԝәр бькә у ԝе ԛәнщ бә».

⁵¹Гава Әԝ чу мал, нәһьшт кәсәк һәрʼә һьндӧрʼ, пештьри Пәтрус, Йуһʼәнна, Аԛуб у де у баве ԛизьке.

⁵²Һʼәму дьгьрийан у шина ԝе дькьрьн, ле Иса гот: «Нәгьрин. Әԝ нәмьрийә, ле һеньжийә».

⁵³Ԝана ԛәрфе хԝә Пе дькьр, чьмки заньбун кӧ әԝа мьрийә.

⁵⁴[45] У Иса дәсте ԝе гьрт, дәнг да ԝе у гот: «Ԛизьк, рʼабә!»

⁵⁵У рʼӧһʼе ԝе ле вәгәрʼийа, перʼа-перʼа рʼабу сәр хԝә. Иса әʼмьр кьр, кӧ хӧрәк бьдьнә ԝе.

⁵⁶Де у баве ԝе зәндәгьрти ман. Ле Әԝи тʼәми ль ԝан кьр, кӧ ве йәке кәсирʼа нәбежьн.