Read Пәймана Ну (Инщил) Йуһʼәнна 10 Bible Online

Йуһʼәнна 10 - Пәймана Ну (Инщил) bible

Йуһʼәнна 10

¹Әз рʼаст бе хельф ԝәрʼа дьбежьм, әԝе кӧ дерирʼа накʼәвә ахьле пез, ле щики дьнрʼа дькʼәве, әԝ дьз у ԛачах ә.

²Ле әԝе кӧ дерирʼа дькʼәве, әԝ шьване пез ә.

³Дәргәһван дәри ль бәр вәдькә, пәз дәнге ԝи дьбьһе у әԝ бь нава гази пәзед хԝә дькә у ԝан дәрдьхә дәрва.

⁴Гава әԝ пәзед хԝә гьшки дәрдьхә, пешийе дькʼәвә у пәз жи пәй ԝи дьчә, чьмки дәнге ԝи нас дькьн.

⁵Әԝ тʼӧ щар пәй йәки хәриб начьн, ле жь ԝи дьрʼәвьн, чьмки дәнге йе хәриб нас накьн».

⁶Иса әв мәсәлә ԝанрʼа гот, ле ԝан фәʼм нәкьр, кӧ Әԝ чь ԝанрʼа дьбежә.

⁷Аԝа Иса диса ԝанрʼа гот: «Әз рʼаст бе хельф ԝәрʼа дьбежьм, Әз ьм дәре пез.

⁸Әԝ һʼәмуйед кӧ бәри Мьн һатьнә дьз у ԛачах ьн, ле пез гӧһдарийа ԝан нәкьрийә.

⁹Әз ьм дәри. Йе кӧ бь дәсте Мьн бькʼәвә һьндӧрʼ, ԝе хьлаз бә. Әԝе бькʼәвә һьндӧрʼ, дәркʼәвә у чʼере бьбинә.

¹⁰Дьз тʼәне бона дьзийе, кӧштьне у ԛьрʼкьрьне те. Ле Әз һатьмә кӧ жийина ԝан һәбә, жийина сәр жийине.

¹¹Әз ьм шьване ԛәнщ. Шьване ԛәнщ әʼмьре Хԝә бона пәзе Хԝә дьдә.

¹²Ле йе пʼигар, кӧ нә шьван ә у пәз жи нә йе ԝи йә, гава дьбинә гӧр те, әԝ пез дьһелә у дьрʼәвә. Гӧр жи дькʼәвә нава пез тʼурʼ-тʼурʼи дькә.

¹³Пʼигар дьрʼәвә, чьмки әԝ пʼигар ә у ль бәр пез накʼәвә.

¹⁴Әз ьм шьване ԛәнщ. Әз йед Хԝә нас дькьм у йед Мьн жи Мьн нас дькьн,

¹⁵чаԝа кӧ Бав Мьн нас дькә, Әз жи ӧса Ԝи нас дькьм у әʼмьре Хԝә бона пәзед Хԝә дьдьм.

¹⁶Пәзед Мьнә дьн жи һәнә, йед кӧ нә ви ахлида нә. Гәрәке Әз ԝана жи биньм у әԝе дәнге Мьн бьбьһен у бьбьнә кәрик бәр шьванәки.

¹⁷Бона ве йәке Бав Мьн һʼьз дькә, чьмки Әз әʼмьре Хԝә дьдьм, ԝәки Әз ԝе диса бьстиньм.

¹⁸Тʼӧ кәс ԝи әʼмьри жь Мьн настинә, ле Әз Хԝәха ԝи дьдьм. Һʼӧкӧме Мьн һәйә, Әз ԝи бьдьм у һʼӧкӧме Мьн һәйә диса ԝи бьстиньм. Мьн әв тʼәми жь Баве Хԝә стандийә».

¹⁹Бона ве хәбәрдане диса нава щьһуйада бу дӧтирәти.

²⁰Жь ԝан гәләка дьгот: «Әва щьнакʼәти йә у дин ә. Чьма һун гӧһдарийа Ԝи дькьн?»

²¹Һьнәкед дьн жи дьготьн: «Әва хәбәрдана нә йа щьнакʼәтийа йә. Ԛәт щьн дькарьн чʼәʼвед кора вәкьн?»

²²Һьнге ль Оршәлиме Щәжьна Пирозкьрьна Пʼарьстгәһе[28] һат у зьвьстан бу.

²³Иса ль пʼарьстгәһе һеԝангәһа Сьлеманда дьгәрʼийа.

²⁴Щьһуйа ль дора Ԝи гьрт у же пьрсин: «Һʼәта кʼәнге Те мә шькеда бьһели? Һәгәр Тӧ йи Мәсиһ, мәрʼа ашкәрә бежә!»

²⁵Иса ль ԝан вәгәрʼанд у гот: «Мьн ԝәрʼа гот, ле ԝә баԝәр нәкьр. Әԝ кьред кӧ Әз бь наве Баве Хԝә дькьм, әԝ бона Мьн шәʼдәтийе дьдьн,

²⁶ле һун баԝәр накьн, чьмки һун нә жь пәзед Мьн ьн.

²⁷Пәзед Мьн дәнге Мьн дьбьһен, Әз жи ԝан нас дькьм у әԝ пәй Мьн тен.

²⁸Әз жийина һʼәта-һʼәтайе дьдьмә ԝан у әԝ тʼӧ щар ӧнда набьн у тʼӧ кәсе ԝан жь дәсте Мьн дәрнәхә.

²⁹Әԝед кӧ Баве Мьн данә Мьн, сәр һәр тьштирʼа нә[29] у тʼӧ кәс нькарә ԝан жь дәсте Баве Мьн дәрхә.

³⁰Әз у Бав йәк ьн».

³¹Ль ԝьр щьһуйа диса кәвьр һьлдан, кӧ Ԝи бьдьнә бәр кәвьра.

³²Иса ԝанрʼа гот: «Мьн жь Баве гәләк кьред ԛәнщ нишани ԝә кьрьн. Һун бона кʼижан кьри Мьн дьдьнә бәр кәвьра?»

³³Щьһуйа ле вәгәрʼанд у готьне: «Әм бона кьред ԛәнщ Тә надьнә бәр кәвьра, ле чьмки Тӧ Хԝәде беһӧрмәт дьки! Тӧ мәрьв и, ле Хԝә дьки Хԝәде».

³⁴Иса ль ԝан вәгәрʼанд у гот: «Нә Ԛануна ԝәда ньвисар ә, кӧ Хԝәде гот: ‹Һун Хԝәде нә›[30]?

³⁵Һәгәр Әԝ ԝан ‹Хԝәде› һʼәсаб дькә, кʼижанарʼа хәбәра Хԝәде һатийә дайине (у набә жи кӧ әԝ ньвисар бәтал бә),

³⁶дә ижар һун Ԝирʼа чаԝа дьбежьн: ‹Тӧ Хԝәде беһӧрмәт дьки›, Йе кӧ Баве пироз кьр[31] у шандә дьнйайе, чьмки Мьн гот: ‹Әз Кӧрʼе Хԝәде мә›.

³⁷Һәгәр Әз кьред Баве Хԝә накьм, Мьн баԝәр нәкьн.

³⁸Ле ԝәки дькьм, һәгәр һун Мьн баԝәр накьн жи, һәма ԝан кьред кӧ Әз дькьм баԝәр бькьн, ԝәки һун бьзаньбьн у фәʼм кьн, кӧ Бав нава Мьнда йә у Әз нава Ԝида мә».

³⁹Һьнге диса хԝәстьн кӧ Ԝи бьгьрьн, ле Иса жь дәсте ԝан дәркʼәт.

⁴⁰Иса диса дәрбази ԝи алийе чʼәме Урдӧне бу у ль ԝе дәре ма, ԝи щийе кӧ Йуһʼәнна пешда дьньхӧманд.

⁴¹Гәләк мәрьв дьһатьнә щәм Ԝи у нав хԝәда дьготьн: «Йуһʼәнна тʼӧ нишан нәкьр, ле чь тьштед кӧ Йуһʼәнна дәрһәԛа Ви мәрьвида готьнә, һʼәму рʼаст дәркʼәтьн».

⁴²У ль ԝе дәре гәләка баԝәрийа хԝә Ԝи ани.