Read Пәймана Ну (Инщил) Йуһʼәнна 11 Bible Online

Йуһʼәнна 11 - Пәймана Ну (Инщил) bible

Йуһʼәнна 11

¹Мәрьвәк һәбу наве ԝи Лазар, әԝ нәхԝәш кʼәт. Әԝ жь Бәйтанйайе бу, жь ԝи гӧнде Мәрйәме у хушка ԝе Мәртʼайе.

²Әва әԝ Мәрйәма бу, йа кӧ рʼуне бинхԝәш ль Хӧдан дабу у бь пʼорʼе хԝә ньгед Ԝи паԛьж кьрьбун, әԝ Лазаре бьре ԝе бу нәхԝәш.

³Аԝа һәр дӧ хушка Исарʼа щаб шандьн у готьн: «Хӧдан, ва әԝи кӧ Тӧ же һʼьз дьки нәхԝәш ә».

⁴Иса гава әв йәк бьһист, гот: «Әв нә нәхԝәшийа мьрьне йә, ле бона рʼумәта Хԝәде йә, ԝәки бь ԝе йәке рʼумәта Кӧрʼе Хԝәде бьльнд бә».

⁵Иса Мәртʼа, хушка ԝе у Лазаре бьре ԝан һʼьз дькьрьн.

⁶Ле гава Ԝи бьһист кӧ Лазар нәхԝәш ә, Әԝ дӧ рʼожед дьн жи ль ԝи щийи дәрәнги бу.

⁷Пәйрʼа Ԝи шагьртед Хԝәрʼа гот: «Ԝәрьн әм диса һәрʼьнә Щьһустане».

⁸Шагьрта жерʼа гот: «Дәрсдар, чәндәк пешда щьһуйа дькьр кӧ Тә бьдьнә бәр кәвьра, Тӧ диса дьчи ԝе дәре?»

⁹Иса ль ԝан вәгәрʼанд у гот: «Нә рʼож донздәһ сьһʼәт ә? Һәгәр йәк рʼоже бьгәрʼә әԝ налькʼӧмә, чьмки рʼонайа ве дьнйайе дьбинә.

¹⁰Ле һәгәр йәк шәве бьгәрʼә, әԝ дьлькʼӧмә, чьмки тʼәви ԝи рʼонайи тʼӧнә».

¹¹Пәй ве хәбәрданерʼа Әԝи ԝанрʼа гот: «Пьсмаме мә Лазар хәԝрʼа чуйә, ле Әзе һәрʼьм кӧ ԝи һʼьшйар кьм».

¹²Шагьрта жерʼа гот: «Хӧдан, һәгәр әԝ рʼазайә, ԝе рʼабә сәр хԝә».

¹³Иса дәрһәԛа мьрьна ԝида дьгот, ле ԝан тʼьре кӧ Әԝ бона рʼазана ԝи дьбежә.

¹⁴Һьнге Иса ашкәрә ԝанрʼа гот: «Лазар мьр.

¹⁵У Әз ша мә кӧ нә ль ԝьра бум, чьмки әва йәка ԝе бона кʼара баԝәрийа ԝә бә. Ле диса ԝәрьн әм һәрʼьнә щәм ԝи».

¹⁶Һьнге Тʼумайе кӧ дьготьне «Һәвал-щеԝи», шагьртед һәвалед хԝәрʼа гот: «Әм жи һәрʼьн, кӧ тʼәви Ԝи бьмьрьн».

¹⁷Гава Иса чу, Ԝи дит кӧ иди әԝ чар рʼоже Лазар бу дәфьн кьрьбун.

¹⁸Бәйтанйа незики Оршәлиме бу, ԝәкә се километьра же дур бу.

¹⁹Гәләк щьһу һатьбунә сәрхԝәшийа Мәртʼа у Мәрйәме, бона мьрьна бьре ԝан.

²⁰Гава Мәртʼайе бьһист кӧ Иса те, әԝ пешийа Ԝида чу, ле Мәрйәм малда ма.

²¹Мәртʼайе готә Иса: «Хӧдан, һәгәр Тӧ вьр буйайи, бьре мьн нәдьмьр.

²²Ле ньһа жи әз заньм Тӧ чь жь Хԝәде бьхԝази, Әԝе бьдә Тә».

²³Иса готә ԝе: «Бьре тәйе жь мьрьне рʼабә».

²⁴Мәртʼайе ле вәгәрʼанд: «Әз заньм Рʼожа Ахрәте, Рʼожа Рʼабуне әԝе рʼабә».

²⁵Иса готә ԝе: «Әз ьм рʼабун у жийин! Әԝе кӧ баԝәрийа хԝә Мьн бинә, һәгәр бьмьрә жи ԝе бьжи.

²⁶У әԝе кӧ дьжи у баԝәрийа хԝә Мьн тинә, әԝ ԛәт намьрә. Тӧ ве йәке баԝәр дьки?»

²⁷Мәртʼайе Ԝирʼа гот: «Бәле Хӧдан, әз баԝәр дькьм, кӧ Тӧ Мәсиһ и, Кӧрʼе Хԝәде, Йе кӧ ԝе бьһата дьнйайе».

²⁸Пәй ве готьнерʼа, чу гази хушка хԝә Мәрйәме кьр у дьзива готе: «Дәрсдар һатийә у гази тә дькә».

²⁹Гава кӧ ԝе бьһист, зу рʼабу чу.

³⁰Иса һе нәкʼәтьбу гӧнд, ле ль ԝи щийи мабу, кʼидәре Мәртʼа рʼасти Ԝи һатьбу.

³¹Щьһуйед кӧ маледа тʼәви ԝе бун у ль бәр дьле ԝеда дьһатьн, гава дитьн кӧ Мәрйәм зу рʼабу дәркʼәтә дәрва, данә пәй ԝе чун. Ԝан тʼьре кӧ әԝ дьчә сәр тʼьрбе бьгьри.

³²Гава Мәрйәм гьһиштә ԝи щийи кӧ Иса ле бу, Әԝ дит, хԝә авитә бәр ньга у готе: «Хӧдан, һәгәр Тӧ ль ве дәре буйайи, бьре мьн нәдьмьр».

³³Гава кӧ Иса чʼәʼв гьрийе ԝе у гьрийе щьһуйед кӧ перʼа һатьбун кʼәт, кʼәсәра кʼур һате у дьле Ԝи ешийа.

³⁴У жь ԝан пьрси: «Ԝә әԝ ль кʼӧ дәфьн кьрийә?» Ԝирʼа готьн: «Хӧдан, ԝәрә у бьбинә».

³⁵Иса гьрийа.

³⁶Һьнге щьһуйа гот: «Дина хԝә бьдьне, чьԛас же һʼьз дькьр!»

³⁷Жь ԝан һьнәка жи гот: «Әви кӧ чʼәʼвед йе кор вәкьрьн, нькарьбу ӧса бькьра, кӧ әв мәрьва жи нәмьра?»

³⁸Ль сәр ве йәке Иса диса кʼур кʼәсәр кʼьшанд у чу сәр тʼьрбе. Әԝ тʼьрб шкәфтәк бу у кәвьрәк бәр дәве ԝе бу.

³⁹Иса гот: «Ви кәвьри ԝеда кьн». Хушка йе мьри, Мәртʼайе Ԝирʼа гот: «Хӧдан, иди ньһа бин кʼәтийе, иро чаре ԝи йә мьрийә».

⁴⁰Иса готә ԝе: «Мьн тәрʼа нәгот, һәгәр тӧ баԝәр бьки, те рʼумәта Хԝәде бьбини?»

⁴¹Һьнге кәвьр ԝеда кьрьн. Иса сәре Хԝә бьльнд кьр у гот: «Баво, Әз зәʼф рʼази мә кӧ Тә дәнге Мьн бьһист.

⁴²Әз заньм кӧ Тӧ һәр гав дәнге Мьн дьбьһейи, ле Мьн бона хатьре ве щьмәʼта сәкьни гот, ԝәки баԝәр бькьн кӧ Тә Әз шандьмә».

⁴³Пәй ве готьнерʼа бь дәнгәки бьльнд кьрә гази: «Лазар, дәркʼәвә!»

⁴⁴Йе мьри жи дәст у пʼийед ԝи бь кʼьтан кʼәфәнкьри у сәрчʼәʼве ԝи бь дәстмаләке ньхамти дәркʼәтә дәрва. Иса ԝанрʼа гот: «Ԝи вәкьн у бьһельн бьра һәрʼә».

⁴⁵Һьнге гәләк щьһуйед кӧ һатьбунә щәм Мәрйәме, әв кьрьна Иса кӧ дитьн, баԝәрийа хԝә Ԝи анин.

⁴⁶Ле жь ԝан һьнәк жи чунә щәм ферьсийа у әв кьрьна Иса ԝанрʼа готьн.

⁴⁷У һьнге ферьси у сәрәкед кʼаһина щьвина гьрәгьра гиһандьнә һәв у готьн: «Әме чь бькьн? Әва мәрьва гәләк нишана дькә.

⁴⁸Һәгәр әм Ԝи аһа бьһельн, һʼәму ԝе баԝәрийа хԝә Ԝи биньн у рʼомайи жи ԝе бен, щийе мәйи пироз ԝеран кьн у кʼока мьләте мә жи биньн».

⁴⁹Йәки жь ԝан, Ԛәйафайе кӧ ԝе сале сәрәккʼаһин бу, ԝанрʼа гот: «Һун ԛәт тьштәки фәʼм накьн!

⁵⁰Нә жи дьгьһижьнә гьлийа кӧ мәрʼа һе дәст дьдә мәрьвәк бьмьрә бона щьмәʼте, нә кӧ тʼәмамийа мьләт ӧнда бә».

⁵¹Әв йәка әԝи һʼәмде хԝә нәгот, ле чьмки әԝ сәрәккʼаһине ԝе сале бу, пʼехәмбәрти кьр, кӧ Исайе бәр мьләтва бьмьрә.

⁵²У нә кӧ тʼәне бона мьләт, ле бона зарʼед Хԝәдейә бәлабуйи жи, кӧ ԝан бьщьвинә у бькә йәк.

⁵³Аԝа иди пәй ԝе рʼожерʼа шеԝьра кӧштьна Иса кьрьн.

⁵⁴Бона ве йәке Иса иди ашкәрә нава щьһуйада нәдьгәрʼийа, ле жь ԝьр чу бәрʼийе щики незики бажаре кӧ жерʼа Әфрайим дьготьн у тʼәви шагьртед Хԝә ль ԝе дәре ма.

⁵⁵Щәжьна щьһуйайә Дәрбазбуне незик бу, гәләк мәрьвед жь дор-бәра бәри щәжьне һәвраз чунә Оршәлиме, ԝәки ль гора әʼдәт хԝә бьшон-вәшон.

⁵⁶Һьнге әԝана ль ԝе дәре Иса дьгәрʼийан у пʼарьстгәһеда дьсәкьнин, жь һәвдӧ дьпьрсин: «Һун чь дьбежьн? Әԝе әʼсә нәйе ве щәжьне?»

⁵⁷Ферьси у сәрәкед кʼаһина жи әʼмьр дәрхьстьбун, һәгәр кәсәк бьзаньбә Әԝ ль кʼӧ дәре йә, гәрәке гӧһе ԝан пе хьн, ԝәки әԝ Ԝи бьгьрьн.